ދުބާއީ ހޯލްޑިންގ ރިއަލް އެސްޓޭޓްގެ ދަށުން ހިންގާ ނަޚީލް ކުންފުނިން، ނަޚުލަތު ޖަބަލް ޢަލީގައި ކުރިއަށްދާ ޕާމް ސެންޓްރަލް ޕްރައިވެޓް ރެޒިޑެންސީސް މަޝްރޫޢުގެ އާ މަރުހަލާއެއް އިއްޔެ އިފްތިތާޙްކޮށްފިއެވެ. މިއީ އެ ހިސާބުގެ ގޮނޑުދޮށް ސަރަހައްދުގެ ގެދޮރަށް އޮތް ޑިމާންޑް އިތުރުވަމުންދާތީ ފެށި މަރުހަލާއެކެވެ.
- މި މަރުހަލާގައި 222 ގެދޮރު ހިމެނެއެވެ.
- މިއީ ތިން އިމާރާތަކަށް ބަހާލާފައިވާ ޔުނިޓްތަކެކެވެ.
- މީގެ ތެރޭގައި 1 ކޮޓަރިން ފެށިގެން 4 ކޮޓަރީގެ އެޕާޓްމަންޓްތައް ހިމެނެއެވެ.
- މީގެ އިތުރުން 4 ކޮޓަރި އާއި 5 ކޮޓަރީގެ "ޓައުން ހައުސް" ތައް ވެސް ހިމެނެއެވެ.
މި މަޝްރޫޢަކީ 2025 ވަނަ އަހަރުގެ އޮކްޓޯބަރު މަހު ފެށި މަޝްރޫޢުގެ ދެވަނަ ފިޔަވަޅެވެ. މި މަޝްރޫޢުގެ މާސްޓަރ ޕްލޭންގެ ދަށުން 9،000 އަކަ މީޓަރުގެ ޝޮޕިންގ ސެންޓަރަކާއި، 1،000 މީހުންނަށް ނަމާދުކުރެވޭނެ މިސްކިތެއް ވެސް އެ ސަރަހައްދުގައި ތަރައްޤީ ކުރުމަށް ވަނީ ހަމަޖެހިފައެވެ.
ނަޚުލަތު ޖަބަލް ޢަލީ މަޝްރޫޢަކީ 13.4 ކިލޯމީޓަރުގެ ދިގު، ގުޅިފައިވާ 7 ރަށުގެ މައްޗަށް އެކުލެވޭ މަޝްރޫޢެކެވެ. މި މަޝްރޫޢުގެ ޖުމްލަ ގޮނޑުދޮށް 90 ކިލޯމީޓަރަށް ވުރެ ދިގުވާނެއެވެ. ދޫބާއީ ހޯލްޑިންގ ރިއަލް އެސްޓޭޓްގެ ސީއީއޯ ޚާލިދު އަލްމާލިކް ވިދާޅުވީ، މި މަޝްރޫޢަކީ ދޫބާއީގެ ކުރިއެރުމަށް ބޮޑު އެހީތެރިކަމެއް ލިބޭނެ، ދުނިޔޭގެ ފެންވަރުގެ މުޖުތަމައެއް ބިނާކުރުމަށް އަޅާ ފިޔަވަޅެއް ކަމަށެވެ.
