އިންޑިއާ އާއި އޮސްޓްރޭލިއާއިން ދަނީ އިންޑިއާ ކަނޑުގެ ސަރަހައްދުގައި އެ ގައުމުތަކުގެ އަސްކަރީ އަދި ލޮޖިސްޓިކް ގާބިލުކަން އިތުރުކުރުމަށްޓަކައި ސްތްރެޓެޖިކް މަސައްކަތްތަކެއް ކުރަމުންނެވެ. މި ސިޔާސަތުގެ އެންމެ މުހިންމު މަރުކަޒުތަކެއްގެ ގޮތުގައި ފާހަގަކުރެވެނީ އިންޑިއާ ކަނޑުގެ އިރުމަތީ ބިތުގައި އޮންނަ އޮސްޓްރޭލިއާގެ ކޮކޯސް (ކީލިންގ) ޖަޒީރާއާއި، އިންޑޮނޭޝިއާގެ ސަބާންގް، އަދި އިންޑިއާގެ ކާރ ނިކޯބާރެވެ.
ދެކުނު ޗައިނާ ކަނޑާއި އިންޑިއާ ކަނޑު ގުޅުވައިދޭ މުހިންމު މަގުތައް ކަމަށްވާ ސުންޑާ އަދި ލޮމްބޮކް ކަނޑުއޮޅިތަކާ ކައިރީގައި އޮންނަ ކޮކޯސް ޖަޒީރާގައި ބޮޑެތި ކުރިއެރުންތަކެއް ދަނީ ހޯދަމުންނެވެ. އެގޮތުން، އިންޑިއާގެ "ގަގަންޔާން" ޖަޒީރާ މިޝަންއަށް އެހީތެރިވުމަށްޓަކައި އެ ރަށުގައި ވަގުތީ ސްޕޭސް-ޓްރެކިންގ ޓާމިނަލެއް ގާއިމުކުރުމަށް ނިންމާފައިވާއިރު، އެ ރަށުގެ އެއަރޕޯޓުގެ ރަންވޭ ބޮޑުކޮށް ބޮޑެތި އަސްކަރީ އަދި މަދަނީ މަތިންދާބޯޓުފަހަރަށް ޚިދުމަތް ދެވޭގޮތަށް ބަދަލުކުރުމުގެ މަސައްކަތް ދަނީ ކުރެވެމުންނެވެ. އަދި ދެ ގައުމުގެ ދެމެދުގައި ހަދާފައިވާ "މިއުޗުއަލް ލޮޖިސްޓިކްސް ސަޕޯޓް އެގްރީމެންޓް" ގެ ދަށުން، އިންޑިއާގެ އަސްކަރީ މަތިންދާބޯޓުތަކަށް މި ރަށް ބޭނުންކުރުމުގެ މަގު ވަނީ ތަނަވަސްވެފައެވެ.
އަންޑަމާން އަދި ނިކޯބާރ ކޮމާންޑުން ބެންގާލް ކަނޑުއޮޅިއާއި މަލާކާ ކަނޑުއޮޅި ބަލަހައްޓަމުންދާއިރު، ކޮކޯސް ޖަޒީރާގެ ސަބަބުން އިންޑިއާ ކަނޑުގެ ދެކުނާއި ހުޅަނގުގެ ސަރަހައްދުތައް ބެލެހެއްޓުމުގެ އިތުރު ގާބިލުކަން އިންޑިއާއަށް ލިބިގެންދާނެއެވެ.
މީގެ ސަބަބުން ސަބްމެރިންތައް ހޯދައި ބެލެހެއްޓުމަށާއިސަބްމެރިންގެ ހަނގުރާމައާއި ކަނޑުގެ ސަރަހައްދު ސަވޭކުރުމަށް ބޮޑު ކުރިއެރުމެއް ލިބޭނެއެވެ.
އޭގެ އިތުރުން، އިންޑިއާގެ ބޮޑުވަޒީރު ނަރެންދުރަ މޯދީ އިންޑޮނޭޝިއާއަށް ކުރެއްވި ޒިޔާރަތާއެކު، އިންޑޮނޭޝިއާގެ "ސަބާންގް" ބަނދަރާއި އިންޑިއާގެ "ކާރ ނިކޯބާރ" ގުޅުވާލައިގެން ކަނޑުގެ ސަރަހައްދު ބެލެހެއްޓުމުގެ މަސައްކަތް ވަނީ ވަރުގަދަކޮށްފައެވެ.
މިއީ މަލާކާ، ސުންޑާ އަދި ލޮމްބޮކް ކަނޑުއޮޅިތަކުގެ ސެކިއުރިޓީ ބެލެހެއްޓުމަށް އެޅުނު މުހިންމު ފިޔަވަޅެކެވެ.
އިންޑިއާ ކަނޑުގައި ޗައިނާގެ އަސްކަރީ ހަރަކާތްތައް އިތުރުވަމުންދާ މާހައުލެއްގައި، އިންޑިއާ، އޮސްޓްރޭލިއާ އަދި އިންޑޮނޭޝިއާއިން ގުޅިގެން ގާއިމުކުރާ މި ނެޓްވޯކަކީ ޗައިނާގެ ނުފޫޒު ކޮންޓްރޯލްކުރުމަށް އެޅޭ މުހިންމު ފިޔަވަޅެކެވެ.
މިއީ އިންޑޯ-ޕެސިފިކް ސަރަހައްދުގައި ބާރުގަދަކޮށް ބޮޑެތި އަސްކަރީ އެއްބަސްވުންތަކަށްވުރެ ބޮޑަށް، މިފަދަ މުހިންމު ކަނޑުގެ މަގުތަކުގައިވާ ޖަޒީރާތަކާއި ބަނދަރުތައް ވަރުގަދަކޮށްގެން 3 ގައުމުން ކުރާ މަސައްކަތެކެވެ.
