ހޮޓެލް އޭޝިއާ އެގްޒިބިޝަންގެ ތެރެއިން، އިންޑިޔާގެ ކިރުގެ އުފެއްދުންތަކަށް މަޝްރޫހު ބްރޭންޑެއް ކަމަށްވާ "އަމުލް" ބްރޭންޑްގެ ޕްރޮޑަކްޓްތައް އެސްޓީއޯ ޖެނެރަލް ޓްރޭޑިންގ އިން ދިވެހި މާކެޓަށް ތައާރަފްކޮށްފި އެވެ.
ހުޅުމާލެ ސިންތަޓިކް ޓްރެކްގައި ކުރިއަށްދާ މިއެގްޒިބިޝަންގެ އެސްޓީއޯ ސްޓޯލްގައި ބޭއްވި ޚާއްސަ ހަފްލާއެއްގައި މިއުފެއްދުންތައް ރަސްމީކޮށް ތައާރަފްކޮށްދެއްވީ އެސްޓީއޯގެ އެކްޒެކެޓިވް ކޮމިޓީގޭ މެންބަރުންނެވެ. މިއާއެކު އަމުލް ބްރޭންޑްގެ ކިރާއި، ބަޓަރު، ޗީޒް އަދި އައިސްކްރީމްގެ އެކި ބާވަތްތައް މިއަދުން ފެށިގެން އެސްޓީއޯ ޕީޕަލްސް ޗޮއިސްއިން އާންމުންނަށް ލިބެން ހުންނާނެ އެވެ.
އަމުލް ނުވަތަ "އާނަންދު މިލްކް ޔޫނިއަން ލިމިޓެޑް" އަކީ ދުނިޔޭގެ މާކެޓްގައި "ދަ ޓޭސްޓް އޮފް އިންޑިޔާ" ގެ ނަމުން މަޝްހޫރުވެފައިވާ، ކިރުގެ ބާވަތްތައް އުފެއްދުމުގައި ދުނިޔޭގެ ފެންވަރުގެ ބޮޑު ނެޓްވޯކެކެވެ. މިއެގްޒިބިޝަންގައި އެސްޓީއޯގެ ސްޓޯލަށް ޒިޔާރަތްކުރާ ފަރާތްތަކަށް އަމުލްގެ ޕްރޮޑަކްޓްތައް ބޭނުންކޮށްގެން ތައްޔާރުކޮށްފައިވާ ފޮނިކާތަކެއްޗާއި އައިސްކްރީމް ރަހަބަލާލުމުގެ ފުރުސަތު ވަނީ ހުޅުވާލާފައެވެ.
މިސެޕްޓެމްބަރު މަހުގެ 28 އިން 30 އަށް ހުޅުމާލެ ސިންތަޓިކް ޓްރެކްގައި ކުރިއަށްދާ ހޮޓެލް އޭޝިއާ އެގްޒިބިޝަނަކީ ރާއްޖޭގެ ފަތުރުވެރިކަމާއި ހޮސްޕިޓަލިޓީ ދާއިރާއަށް ޚާއްސަކޮށްގެން ބާއްވާ އެންމެ ބޮޑު އެކްސްޕޯ އެވެ. ދިވެހި ކުންފުނިތަކުގެ ބައިވެރިވުން މަދުކަމަށް މިފަހަރު ފާހަގަ ކުރެވެއެވެ.
