ޔުނައިޓެޑް އެރަބް އެމިރޭޓްސް ގައި ބަނޑަހަޖަހާފައިވާ ފަރަންސޭސި ސިފައިންނާ ބައްދަލުކުރައްވައި،ރައީސް އިމަނުއަލް މެކްރޮން ވަނީ ނިއުކްލިއާ ހަކަތައިން ދުއްވާ މަތިންދާބޯޓު އުފުލާ އާ މަނަވަރެއް ބަނުމުގެ މަސައްކަތް ކުރިއަށް ގެންދިއުމަށް ނިންމަވާފައިވާކަން އިއުލާން ކުރައްވާފައެވެ. މިއީ ފަރަންސޭސިވިލާތުގެ ބަޖެޓަށް ދަތިތަކެއް ކުރިމަތިވެފައިވާ އަދި ޔޫރަޕްގެ ސަލާމަތީ ކަންބޮޑުވުންތައް އިތުރުވެފައިވާ ދަނޑިވަޅެއްގައި ނިންމެވި ނިންމެވުމެކެވެ.
އަބޫދާބީ ކައިރީގައި އޮންނަ ޒާއިދު މިލިޓަރީ ސިޓީގައި ވާހަކަފުޅު ދައްކަވަމުން މެކްރޮން ވިދާޅުވީ، މި އާ މަނަވަރު ބަނުމަށް ރަސްމީކޮށް ހުއްދަ ދެއްވާފައިވާ ކަމަށެވެ. މި މަނަވަރަކީ މިހާރު ފަރަންސޭސިވިލާތުން ބޭނުންކުރަމުންދާ 'ޗާލްސް ޑި ގޯލް' މަނަވަރުގެ ބަދަލުގައި ބޭނުންކުރާނެ މަނަވަރެކެވެ. ޗާލްސް ޑި ގޯލް އަކީ އެމެރިކާގެ ކަނޑުގެ ސިފައިންގެ މަނަވަރު ފިޔަވައި ނިއުކްލިއާ ހަކަތައިން ދުއްވާ ދުނިޔޭގައި އޮތް ހަމައެކަނި މަތިންދާބޯޓު އުފުލާ މަނަވަރެވެ.
މެކްރޮން ވިދާޅުވި ގޮތުގައި މި ނިންމުމަކީ ފުރިހަމަ ދިރާސާއަކަށްފަހު، ފަރަންސޭސިވިލާތުގެ ދިގު މުއްދަތުގެ އަސްކަރީ ޕްލޭނިންގ އާބެހޭ ގާނޫނުތަކާ އެއްގޮތަށް ނިންމާފައިވާ ނިންމުމެއް ކަމަށެވެ. އާ މަނަވަރު ކުރީގެ މަނަވަރަށްވުރެ ބޮޑުވާނެ ކަމަށް ބެލެވޭއިރު، މީގެ ބަރުދަނުގައި ގާތްގަނޑަކަށް 80،000 ޓަނު ހުންނާނެއެވެ. އަދި 310 މީޓަރުގެ ދިގުމިން ހުންނަ މި މަނަވަރުގައި 30 ހަނގުރާމަމަތީ ބޯޓު އުފުލުމުގެ ގާބިލުކަން ހުންނާނެ ކަމަށާއި، 2،000 އެއްހާ ފަޅުވެރިން މަސައްކަތް ކުރާނެ ކަމަށް ބެލެވެއެވެ.
މި މަޝްރޫއު އިއުލާން ކުރައްވާފައި މިވަނީ ފަރަންސޭސިވިލާތުގެ ދިފާއީ ދާއިރާގެ ބައެއް ފަރާތްތަކުގެ ފާޑުކިއުންތަކާ އެކުގައެވެ. ބައެއް ފަރާތްތަކުން ގަބޫލުކުރާ ގޮތުގައި ރަޝިޔާގެ ނުރައްކަލުން ސަލާމަތްވުމަށް ޔޫރަޕްގެ ދިފާއީ ކަންކަން ވަރުގަދަކުރުން ފަދަ މާ މުހިންމު ކަންކަމަށް ފައިސާ ބޭނުންވެފައިވާ ދަނޑިވަޅެއްގައި، މިއީ ބޮޑު ބޭކާރު ހޭދައެކެވެ.
މި ދަތުރުފުޅުގައި މެކްރޮން ވަނީ ޔޫއޭއީގެ ރައީސް މުހައްމަދު ބިން ޒާއިދު އާލަނަހްޔާންއާ ބައްދަލުކުރައްވައި، ސަރަހައްދީ ހަމަޖެހުމާއި އެއްބާރުލުން އިތުރުކުރުމާ ގުޅޭގޮތުން މަޝްވަރާ ކުރައްވާފައެވެ. ޔޫއޭއީ އަކީ ފަރަންސޭސިވިލާތުގެ އަސްކަރީ ސާމާނު އެންމެ ގިނައިން ގަންނަ އެއް ގައުމެވެ. އަދި ފަރަންސޭސިވިލާތުގެ އާ ޖީލުގެ ހަނގުރާމަމަތީ ބޯޓު އުފެއްދުމުގެ ޕްރޮގްރާމަށް ޔޫއޭއީގެ އެހީތެރިކަން ހޯދުމަށްވެސް މަޝްވަރާ ކުރެވުނެވެ.
މެކްރޮންގެ މި ޒިޔާރަތަކީ އަހަރު ނިމޭއިރު ގައުމުން ބޭރުގައި ތިބޭ ފަރަންސޭސި ސިފައިންނާ ބައްދަލުކުރެއްވުމަށް ކުރައްވާ ދަތުރުފުޅެކެވެ. ޔޫއޭއީގައި ފަރަންސޭސިވިލާތުގެ 900 އަށްވުރެ ގިނަ ސިފައިން ތިބޭއިރު، އޭގެ ތެރެއިން ގިނަ ބަޔަކު ހަރަކާތްތެރިވަނީ މަސްތުވާތަކެތީގެ ވިޔަފާރި ހުއްޓުވުމަށް ކަނޑުމަތީގައި ހިންގާ އޮޕަރޭޝަންތަކުގައެވެ. ދުބާއީގައި ތިބެގެން މަސްތުވާތަކެތީގެ ވިޔަފާރިކުރާ ކަމަށް ތުހުމަތުކުރެވޭ މީހުން ހޯދައި ހައްޔަރުކުރުމުގައި ޔޫއޭއީގެ އިތުރު އެއްބާރުލުމަށް ފަރަންސޭސިވިލާތުން ދަނީ އެދެމުންނެވެ.
