އައްޑޫ ސިޓީ ހިތަދޫ ޕޯޓަކީ ރާއްޖޭގެ ދެކުނުގެ އިގްތިސާދީ މަރުކަޒަށް ވެގެންދާނެ ކަމަށް ހިތަދޫ ޕޯޓް ލިމިޓެޑް (އެޗްޕީއެލް) ގެ ސީއީއޯ މުހައްމަދު ރިޝްވާން ވިދާޅުވެއްޖެއެވެ. ރިޝްވާން މިހެން ވިދާޅުވީ ވިޔަފާރި ފުޅާކުރުމަށާއި ލޮޖިސްޓިކްސް ވަރުގަދަކުރުމަށް ސަރުކާރުން ހިތަދޫ ޕޯޓުގައި ތައާރަފްކުރި ތިން ހިދުމަތެއް އިފްތިތާހު ކުރުމަށް ބޭއްވި ރަސްމިއްޔާތުގައި ވާހަކަދައްކަވަމުންނެވެ.
ރިޝްވާން ވިދާޅުވީ ހިތަދޫ އަދި ކައްދޫ ކޮމާޝަލް ޕޯޓް ތަރައްގީ ކުރުމަކީ މައި ވިޔަފާރި ބަނދަރު ތިލަފުއްޓަށް ބަދަލުކުރުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ގެންގުޅުއްވާ ތަސައްވުރުގެ މުހިންމު ބައެއް ކަމަށެވެ.
"މިއަދު އިފްތިތާހު ކުރެވުނު ޑިއުޓީ ފްރީ ބޮންޑަޑް ޒޯނާއެކު މި ތަސައްވުރަށް އިތުރު ކުރިއެރުމެއް ލިބިގެންދާނެ. މީގެ ސަބަބުން ހިތަދޫ ޕޯޓް ވެގެންދާނީ ދެކުނުގެ އިގްތިސާދީ މަރުކަޒަށް،" ރިޝްވާން ވިދާޅުވިއެވެ.
އިގްތިސާދީ ތަރައްގީއާއި ވިޔަފާރިއާ ބެހޭ ވަޒީރު މުހައްމަދު ސައީދު ވަނީ ހިތަދޫ ޕޯޓުގައި ތިން މުހިންމު ޚިދުމަތެއް އިފްތިތާހު ކޮށްދެއްވާފައެވެ. އެއީ:
- ކާބޯތަކެއްޗާއި މުހިންމު ސާމާނު ރައްކާކުރާ ޑިއުޓީ ފްރީ ސްޓޯރޭޖް ޒޯން
- ބޮންޑަޑް ވެއާހައުސް
- ބަލްކް ކާގޯ ހޭންޑްލިން ފެސިލިޓީ
މި ހިދުމަތްތައް ގާއިމްކުރުމުގެ އެއްބަސްވުމުގައި ސޮއިކުރީ އިގްތިސާދީ ތަރައްގީއާއި ވިޔަފާރިއާ ބެހޭ ވުޒާރާއާއި މޯލްޑިވްސް ޕޯޓްސް ލިމިޓެޑް (އެމްޕީއެލް) އާ ދެމެދުގައެވެ.
ވަޒީރު ސައީދު ވިދާޅުވީ މިއީ އައްޑޫ ސިޓީއަކީ ވިޔަފާރީގެ މައި ހަބަކަށް ހެދުމަށް ރައީސް ވެވަޑައިގެންފައިވާ ވައުދުފުޅު ފުއްދުމުގެ ފެށުން ކަމަށެވެ.
ވަޒީރު އިތުރަށް ވިދާޅުވީ ކައްދޫ އަދި ހިތަދޫ ޕޯޓަކީ ޑިއުޓީ ފްރީ ބަނދަރުތަކަކަށް ވެގެންދާނެ ކަމަށެވެ. މީގެ ސަބަބުން ހިލަޔާއި ހިލަވެލި ފަދަ ތަކެތި ޑިއުޓީއާ ނުލައި ރައްކާކުރެވޭނެ އިންތިޒާމު ހަމަޖެހިގެންދާނެއެވެ.
މާލޭގެ ވިޔަފާރި ބަނދަރު ތިލަފުއްޓަށް ބަދަލުކުރުމުގެ މަޝްރޫއަކީ ފާއިތުވި 40 އަހަރު ތެރޭގައި ހިންގޭ އެންމެ ބޮޑު ޕޯޓް ތަރައްގީގެ މަޝްރޫއު ކަމަށްވެސް ވަޒީރު ފާހަގަކުރެއްވިއެވެ.
ސަރުކާރުގެ އަމާޒަކީ 2027 ވަނަ އަހަރުގެ ނޮވެމްބަރު މަހުގެ ނިޔަލަށް ރާއްޖޭގެ ބަނދަރުތަކުގެ ނިޒާމަށް ގެންނަ މި ބޮޑު ބަދަލު ފުރިހަމަކުރުމެވެ. މި ބަދަލުތަކުގެ ސަބަބުން މާލޭ ބަނދަރަށް ބާރުބޮޑުވުން ކުޑަވެ، މުދާ އުފުލުމުގެ އަގު ހެޔޮވެ، މުޅި ރާއްޖޭގެ ވިޔަފާރިތަކަށް ބޮޑު ކުރިއެރުމެއް ލިބޭނެ ކަމަށް ކަމާބެހޭ ފަރާތްތަކުން ލަފާކުރެއެވެ.
Hithadhoo Port Positioned as Southern Economic Hub as New Services Launched
