ޔޫރަޕިއަން ޔޫނިއަން (އީޔޫ) ގެ ހާރިޖީ އިދާރާ ކަމުގައިވާ 'ޔޫރަޕިއަން އެކްސްޓާނަލް އެކްޝަން ސާވިސް' ގެ ގާބިލުކަން ކުޑަވެ، އެ އިދާރާގެ ތެރޭގައި އުފެދިފައިވާ ދާޚިލީ މައްސަލަތަކުގެ ސަބަބުން އެ އިދާރާ އުވާލުމަށް އީޔޫގެ އިސް އޮފިޝަލުން ގޮވާލަން ފަށައިފިއެވެ. "ޕޮލިޓިކޯ" ނޫހުން ރިޕޯޓްކުރާ ގޮތުގައި، ކަޔާ ކަލާސް އިސްވެ ހުންނަވައިގެން ހިންގަވާ މި އިދާރާއާ މެދު އީޔޫގެ އެކި ފެންވަރުގެ މަގާމުތަކުގައި ތިއްބެވި ފަރާތްތަކުގެ މެދުގައި ވަނީ ބޮޑު ނުތަނަވަސްކަމެއް އުފެދިފައެވެ.
މިކަމާ ގުޅޭގޮތުން 10 އޮފިޝަލަކާއި ޑިޕްލޮމެޓުން އިންޒާރުދީފައިވަނީ، އެ އިދާރާ މިހާރު އޮތީ ބޮޑު ކާރިސާއެއްގެ ތެރޭގައި ކަމަށެވެ. އެގޮތުން، އެ އިދާރާގެ ވަކި އަމާޒެއް ނެތުމާއި، ޔޫރަޕިއަން ކޮމިޝަން ފަދަ މާލީ އަދި ސިޔާސީ ގޮތުން މާ ބާރުގަދަ އިދާރާތަކާ ވާދަކުރުމުގެ ގާބިލުކަން ނެތުމަކީ އެންމެ ބޮޑު އެއް މައްސަލައެވެ.
އީޔޫގެ 27 ގައުމުގެ ސަރުކާރުތައް ތަމްސީލުކުރާ ކައުންސިލާއި ކޮމިޝަންގެ ތެރޭގައި، 'ޔޫރަޕިއަން އެކްސްޓާނަލް އެކްޝަން ސާވިސް' އުވާލުމަށް މަސައްކަތްކުރާ ވަރުގަދަ ގްރޫޕެއް ހަރަކާތްތެރިވާ ކަމަށް ރިޕޯޓުތައް ބުނެއެވެ. މިކަމުގެ ސަބަބުން ކަޔާ ކަލާސްގެ މަގާމު ވަނީ ވަރަށް ބޮޑަށް ހީނަރުވެފައެވެ. މުވައްޒަފުން ސިފަކުރާ ގޮތުގައި، ކަލާސް އާއި ޔޫރަޕިއަން ކޮމިޝަންގެ ރައީސް އުރުސޫލާ ފޮން ޑެ ލަޔަންގެ ދެ އަންހެނުންގެ ދެމެދު އުފެދިފައިވާ އަމިއްލަ ޒާތީ ވާދަވެރިކަމަކީ މި ކާރިސާ އިތުރަށް ގޯސްވާން މެދުވެރިވި ސަބަބެކެވެ.
މި ހާލަތު ބަދަލުކުރުމަށްޓަކައި ފްރާންސުން ވަނީ އީޔޫގެ ޚާރިޖީ ޚިދުމަތް އަލުން ބައްޓަން ކުރުމަށް ތިން ގޮތެއް ހުށަހަޅާފައެވެ:
- ހާރިޖީ ސިޔާސަތުގެ ހުރިހާ ބާރުތަކެއް ޔޫރަޕިއަން ކޮމިޝަނަށް ބަދަލުކުރުން.
- ޑިޕްލޮމެޓިކް ހުރިހާ މަސައްކަތްތަކެއް ޔޫރަޕިއަން ކައުންސިލުގެ ދަށަށް ބަދަލުކުރުން.
- އާންމު އިސްލާހެއްގެ ތެރެއިން ކަޔާ ކަލާސްގެ ދަށުގައި އޮންނަ ބާރުތައް ފުޅާކުރުން.
"ފައިނޭންޝަލް ޓައިމްސް" އިން މީގެ ކުރިން ރިޕޯޓްކޮށްފައިވާ ގޮތުގައި، އީޔޫގެ މެމްބަރު ގައުމުތަކުން މިހާރު ދަނީ މި އިދާރާގެ މަސައްކަތްތައް ހުރި ގޮތާމެދު ހިތްހަމަނުޖެހި، މުޅި ޚިދުމަތް އާ ބައްޓަމަކަށް ގެނައުމާމެދު ފުންކޮށް ވިސްނަމުންނެވެ. ކަލާސްގެ މަސައްކަތާމެދު އުފެދިފައިވާ ނުރުހުމަކީ މި މައްސަލައިގެ މައިގަނޑު އެއް ބަޔެވެ.
