އިންޑިއާ އިން އެ ޤައުމުގެ ފުރަތަމަ ހައިޑްރޮޖަން ރޭލު ތައާރަފުކުރުމަށް ތައްޔާރުވަމުންދާކަމީ، ރޭލު ދަތުރުފަތުރުގެ ނިޒާމު ތިމާވެއްޓާ ރައްޓެހި ޓެކްނޮލޮޖީއަކަށް ބަދަލުވަމުންދާކަމުގެ ނިޝާނެކެވެ. ހަރްޔާނާގެ ޖިންދު ރޭލު ސްޓޭޝަނުގައި، ޖުލައި 17 ވަނަ ދުވަހު މި ރޭލުގެ ޚިދުމަތް ރަސްމީކޮށް ފައްޓަވައިދެއްވާނީ ބޮޑުވަޒީރު ނަރެންދުރަ މޯދީ ކަމަށް ބެލެވެއެވެ. މިއީ އިންޑިއާގެ އާންމު ދަތުރުފަތުރުގެ ނިޒާމުގެ ތެރެއަށް ހައިޑްރޮޖަން ފިއުލް ސެލް ޕްރޮޕަލްޝަން، ހައިޑްރޮޖަން ބޭނުންކޮށްގެން ރޭލު ދުއްވާ ނިޒާމު ރަސްމީކޮށް ވަންނަ ފުރަތަމަ ފަހަރެވެ.
ރޭލު ދަތުރުފަތުރުގެ އޮފިޝަލުން ވިދާޅުވާ ގޮތުގައި، މި ރޭލު ފެށުމުގެ ކުރިން ސޯނިޕަތު-ޖިންދު-ނިއު ދިއްލީ ރޫޓުގައި ދެ މަހަށްވުރެ ގިނަ ދުވަސް ވަންދެން ވަނީ ޓެސްޓު ދަތުރުތައް ކޮށްފައެވެ. މި ޓެސްޓުތަކުގައި ރޭލުގެ ދުވެލި ގަޑިއަކު 75 ކިލޯމީޓަރާއި 120 ކިލޯމީޓަރާ ދެމެދުގައި ހިފެހެއްޓިފައިވެއެވެ.
ރޭލުގެ މައިގަނޑު ސިފަތައް:
- ބައިތައް: މި ރޭލުގައި ހިމެނެނީ ދުއްވުމަށް ބޭނުންވާ ދެ ޕަވަރ ކާރާއި، 8 ޕެސެންޖަރ ކޯޗެވެ. މިއީ ޖުމްލަ 2،600 މީހުންނަށް ދަތުރުކުރެވޭ ގޮތަށް ފަރުމާކޮށްފައިވާ ރޭލެއް ނަމަވެސް، އިށީނދެ ތިބެވޭނީ 682 މީހުންނަށެވެ.
- ދުވެލި: މި ރޭލަކީ ގަޑިއަކު 110 ކިލޯމީޓަރުގެ ބާރުމިނުގައި ދުއްވުމުގެ ޤާބިލުކަން ހުރި ރޭލެއް ނަމަވެސް، ކަނޑައެޅިފައިވާ ރޫޓުގައި މި ރޭލު ދުއްވާނީ ގަޑިއަކު 75 ކިލޯމީޓަރުގެ ބާރުމިނުގައެވެ.
- ދަތުރުތައް: ދުވާލަކު 356 ކިލޯމީޓަރުގެ ދުރުމިނަށް ދަތުރުކުރާނެއެވެ. ޖިންދު އާއި ސޯނިޕަތާ ދެމެދު ދުވާލަކު ދެ ފަހަރު ދެކޮޅަށް މި ރޭލު ދަތުރުކުރާނެއެވެ.
- ޓެކްނޮލޮޖީ: މި ރޭލު މަސައްކަތްކުރަނީ ހައިޑްރޮޖަން ފިއުލް ސެލް ނިޒާމަކުންނެވެ. މި ނިޒާމުން ބޭރުވަނީ ހަމައެކަނި ފެން އާވިއެވެ. ކޮންމެ ޕަވަރ ކާރަކުން 1,200 ކިލޯވޮޓްގެ ބާރު އުފައްދައިދޭއިރު، ރޭލުގެ ޖުމްލަ ބާރަކީ 2,400 ކިލޯވޮޓެވެ. މި ރޭލުގައި 440 ކިލޯގެ ހައިޑްރޮޖަން ރައްކާކުރެވޭނެއެވެ. ރޭލު ފުރިހަމައަށް ބަރުވެފައި އޮންނައިރު ދުވާލަކު 300 ކިލޯ ހައިޑްރޮޖަން ބޭނުންވާނެ ކަމަށް ލަފާކުރެވެއެވެ.
މި ރޭލުގެ ސަލާމަތީ ކަންކަމާއި ޑިޒައިން ބައިނަލްއަޤްވާމީ ފެންވަރުގައި ޔަޤީންކޮށްފައިވަނީ 'ޓީޔޫވީ ސޫޑް' ނަމަކަށް ކިޔާ ޔޫރަޕްގެ އެޖެންސީއަކުންނެވެ.
ރޭލު މަރާމާތުކުރުމަށްޓަކައި، ދިއްލީގެ ޝަކޫރުބަސްތީގައި ހުންނަ ފެސިލިޓީއަށް ގެންދާނީ ހައިޑްރޮޖަން ނިޒާމު ނިއްވާލުމަށްފަހު، ސަލާމަތީ ފިޔަވަޅުތަކާއެކު ޑީސަލް އިންޖީނެއް ބޭނުންކޮށްގެންނެވެ. މި ރޭލު ތައާރަފުކުރުމަކީ އިންޑިއާގެ ރޭލު ދަތުރުފަތުރުގެ އުމްރާނީ ވަސީލަތްތައް ޒަމާނީކޮށް، ވައި ތަޣައްޔަރުވުން ކުޑަކުރުމަށް އަޅާ މުހިންމު ފިޔަވަޅެކެވެ.
