އޮސްޓްރޭލިއާގެ ޤައުމީ އެއަރލައިން ކަމަށްވާ ކުއަންޓަސްއިން އެ ކުންފުނީގެ 1،000 އާ ގާތްކުރާ ކޯޕަރޭޓް މަޤާމުތަކެއް އިންޑިއާއަށް އައުޓްސޯސްކޮށް، ބޭރު ޤައުމަކަށް ބަދަލުކުރުމުގެ މަޝްވަރާތަކެއް ފަށާފައިވާ ކަމަށް ރިޕޯޓްކޮށްފިއެވެ. މިއީ ޚަރަދު ކުޑަކުރުމާއި އާޓިފިޝަލް އިންޓެލިޖެންސް (އޭ.އައި) ބޭނުންކޮށްގެން އެ ކުންފުނީގެ އޮޕަރޭޝަންތައް ޒަމާނީ ކުރުމަށް ކުރިއަށްގެންދާ ބޮޑު މަޝްރޫޢެއްގެ ބައެއް ކަމަށް ވެއެވެ.
އޮސްޓްރޭލިއަން ފައިނޭންޝަލް ރިވިއުނޫހުން ރިޕޯޓްކޮށްފައިވާ ގޮތުގައި، "ޕްރޮޖެކްޓް އައި.ކިޔު"ގެ ނަމުގައި ކުރިއަށްދާ މި ރޭވުމުގެ ދަށުން، ދުނިޔޭގެ މަޝްހޫރު ކޮންސަލްޓިންގ ކުންފުންޏެއް ކަމަށްވާ އެކްސެންޗަރއާ އެކު މަޝްވަރާތައް ދަނީ ކުރެވެމުންނެވެ. މި މަޝްރޫޢުގެ ދަށުން މާކެޓިން، ފައިނޭންސް، ހިއުމަން ރިސޯސަސް އަދި އެހެނިހެން ބެކް-އޮފީސް ޚިދމަތްތައް އިންޑިއާއަށް ބަދަލުކުރުމުގެ ފުރުޞަތު އޮތް ކަމަށް ބެލވެއެވެ.
ކުއަންޓަސްއިން ބުނެފައިވަނީ އެކްސެންޗަރއާ އެކު ކުރެވެމުންދަނީ ފުރަތަމަ މަރުޙަލާގެ މަޝްވަރާތަކެއް ކަމަށާއި، މިކަމުގައި އަދި ވަކިގޮތެއް ނުނިންމާ ކަމަށެވެ. ކުއަންޓަސްގެ ތަރުޖަމާނު ވިދާޅުވިގޮތުގައި ކޮންމެ މުއައްސަސާއެއްވެސް ފަދައިން އެ ކުންފުނިންވެސް މަސައްކަތްކުރަމުންދަނީ ޒަމާނީ ޓެކްނޮލޮޖީއާއި އޭ.އައި ބޭނުންކޮށްގެން މަސައްކަތްތައް އަވަސްކޮށް، ކަސްޓަމަރުންނަށާއި މުވައްޒަފުންނަށް ރަނގަޅު ޚިދމަތްތަކެއް ފޯރުކޮށްދިނުމަށެވެ.
މި ޚަބަރާ ގުޅިގެން ކޯޕަރޭޓް މުވައްޒަފުން ތަމްސީލުކުރާ އޮސްޓްރޭލިއަން ސަރވިސަސް ޔޫނިއަން އިން ވަނީ ކަންބޮޑުވުން ފާޅުކޮށްފައެވެ. އޭ.އެސް.ޔޫގެ އެސިސްޓެންޓް ނޭޝަނަލް ސެކެޓްރީ ސްކޮޓް ކޯވަން ވިދާޅުވީ، އޮސްޓްރޭލިއާގެ މުވައްޒަފުންގެ ވަޒީފާއަށް އައިސްދާނެ ކުއްލި ލޮޅުމަކާމެދު ކަންބޮޑުވާ ކަމަށާއި، ޤައުމީ މަސައްކަތްތެރިންގެ ޙައްޤުތައް ހިމާޔަތްކުރުމަށް ކުއަންޓަސްއިން ވީ ވައުދުތައް ފުއްދުމަށް ގޮވާލާ ކަމަށެވެ.
ކުއަންޓަސްއިން ބުނެފައިވަނީ ޓެކްނޮލޮޖީ ބޭނުންކުރަނީ ހަމައެކަނި މުވައްޒަފުންގެ ޢަދަދު މަދުކުރުމަށް ނޫން ކަމަށާއި، ފާއިތުވި އަހަރުތަކުގައި ޕައިލެޓުންނާއި އިންޖިނޭރުން ފަދަ އޮޕަރޭޝަނަލް އެތައް ހާސް މަޤާމެއް އޮސްޓްރޭލިއާގައި އުފައްދާފައިވާނެ ކަމަށެވެ. އަދި ކުރިއަށް އޮތް ތަނުގައިވެސް އޮޕަރޭޝަނަލް ދާއިރާތަކުން މުވައްޒަފުން ހޯދުން ކުރިއަށްދާނެ ކަމަށް އެ ކުންފުނިން ފާހަގަކޮށްފައިވެއެވެ.
މިފަދަ ބަދަލުތަކަކީ އޮސްޓްރޭލިއާގެ އެހެނިހެން ބޮޑެތި ކުންފުނިތަކުންވެސް ގެންނަމުންދާ ބަދަލުތަކެކެވެ. އެގޮތުން ރީޓެއިލް ދާއިރާގެ ވުލްވޯތުސް އާއި އޮފީސްވޯކްސް އަދި ޓެލްސްޓްރާ ފަދަ ކުންފުނިތަކުންވެސް ޑިޖިޓަލް ބަދަލުތަކާއި އައުޓްސޯސިންގްގެ މަސައްކަތްތައް ފަށާފައިވާކަން ފާހަގަކުރެވެއެވެ. ކުއަންޓަސްގެ 'ޕްރޮޖެކްޓް އައި.ކިޔު' އާ މެދު އެންމެ ފަހުގެ ގޮތެއް ނިންމުން މިއަހަރުގެ ފަހުކޮޅަށް އޮންނާނެ ކަމަށް ލަފާކުރެވެއެވެ.
