ބައިނަލްއަޤުވާމީ ޑިޕްލޮމެޓިކް މިންގަނޑުތަކާއި ސިޔާދަތުގެ އެންމެ އަސާސީ އުޞޫލުތައް ފުނޑުފުނޑުކޮށްލަމުން، ޔޫރަޕްގެ ހަމަޖެހޭ މާޙައުލެއް އޮތް ސްލޮވީނިއާގައި ހުންނަ އިންޑިއާގެ އެމްބަސީގެ އިމާރާތަށް އަމާޒުކޮށް ޚާލިސްތާނީ ޓެރަރިސްޓުން ދިން ގެއްލުންތަކާއި ލިޔުންތަކުގެ މައްސަލައިގައި އިންޑިއާ ސަރުކާރުން ނުރުހުން ފާޅުކޮށްފިއެވެ.
މިއީ ހަމައެކަނި އެއް ޤައުމެއްގެ މިޝަންއަކަށް ލިބުނު ގެއްލުމެއް ނޫން ކަމަށް އިންޑިއާއިން ބުނެއެވެ. މިއީ ދުނިޔޭގެ އެކި ކަންކޮޅުތަކުގައި ޑިޕްލޮމެޓިކް މިޝަންތަކުގެ ސަލާމަތާއި ރައްކާތެރިކަން ކަށަވަރުކުރުމަށްޓަކައި ޤާއިމުކޮށްފައިވާ ބައިނަލްއަޤުވާމީ މުޢާހަދާތަކުގެ ބަދަހިކަމާމެދު ބޮޑެތި ސުވާލުތަކެއް އުފައްދައިދިން ނުރައްކާތެރި ހާދިސާއެކެވެ.
އިންޑިއާގެ ޚާރިޖީ ވުޒާރާއިން ނެރުނު ހަރުކަށި ރަސްމީ ބަޔާނެއްގައި ފާހަގަކޮށްފައިވާ ގޮތުގައި، ވިއެނާ ކޮންވެންޝަންގެ ދަށުން ޑިޕްލޮމެޓިކް އިމާރާތްތަކަކީ އެއްވެސް ޙާލެއްގައި ވަދެ ނުގަނެވޭނެ އަދި އެއްވެސް ބަޔަކަށް ނުރައްކާ ނުކުރެވޭނެ ފަދަ ޤާނޫނީ ޙިމާޔަތް ލިބިގެންވާ ތަންތަނެވެ.
"މި މައްސަލަ ސްލޮވީނިއާގެ ސަރުކާރާއެކު ނިއުދިއްލީއާއި ލުބްލިއާނާގައި ވެސް ވަރަށް ބޮޑަށް ނަގާފައިވާނެ،" ޚާރިޖީ ވުޒާރާގެ ބަޔާނުގައިވެއެވެ. އަދި މިފަދަ ނާތަހުޒީބު ޢަމަލުތައް ހިންގާ ފަރާތްތައް ޤާނޫނުގެ ކުރިމައްޗަށް ގެނެސް، އެންމެ ހަރުކަށި އަދަބު ދިނުމަށް އެ ޤައުމުގެ ކަމާބެހޭ ފަރާތްތަކަށް ވަނީ ގޮވާލާފައެވެ.
މީގެ އިތުރުން، ދުނިޔޭގެ އެހެން ޤައުމުތަކުގެ ލޯ އެންފޯސްމަންޓް އިދާރާތަކުން ވެސް މިފަދަ ހަރުކަށި ޖަމާޢަތްތަކުން ފަތުރަމުންދާ ނަފްރަތުގެ ބަސްމަގާއި ދޮގު ޕްރޮޕެގަންޑާތަކާމެދު ސަމާލުވުމަށް އިންޑިއާއިން ވަނީ ގޮވާލާފައެވެ.
މިއީ ޚާލިސްތާނީ ހަރުކަށި ފަރާތްތަކުން އިންޑިއާގެ ޑިޕްލޮމެޓިކް މިޝަންތަކަށް އަމާޒުކޮށް މިފަދަ ޢަމަލެއް ހިންގި ފުރަތަމަ ފަހަރެއް ނޫނެވެ. ފާއިތުވި އަހަރުތަކުގެ ތެރޭގައި އޮސްޓްރޭލިއާ، ކެނޑާ، ޔޫ.ކޭ، އަދި އެމެރިކާ ފަދަ ޤައުމުތަކުގައި ހުންނަ އިންޑިއާގެ އެމްބަސީތަކާއި ކޮންސުލޭޓުތަކަށް ވަނީ މިފަދަ ޙަމަލާތައް އަމާޒުކޮށްފައެވެ. އެ ތަންތަނުގައި ޚާލިސްތާނީ ދިދަ ހަރުކުރުމާއި، އިމާރާތްތައް ހަޑިކޮށް، ނުރުހުމުގެ ޝުއޫރުތައް ފާޅުކުރުމުގެ މައްސަލަތައް ވަނީ ފެންމަތިވެފެވެ.
ޔޫރަޕްގެ މެދުގައޮ އޮތް ޤައުމެއްގައި މިފަދަ ކަމެއް ހިނގުމަކީ، ދުނިޔޭގެ އެކި ކަންކޮޅުތަކުގައި ތިބޭ ޑިޕްލޮމެޓުންނާއި ޤައުމުތަކުގެ ސަފީރުންގެ ސަލާމަތާމެދު ފުންކޮށް ވިސްނަން ޖެހިފައިވާ ކަމެއްކަން ހާމަވެގެންދެއެވެ.
