ބްރިކްސް ގްރޫޕްގެ ގައުމުތަކުން މި ހަފްތާގައި މަޝްވަރާކުރި ޑޮލަރުގެ ބަދަލު އެހެން ފައިސާއަކުން މުއާމަލާތާ ގުޅޭ މައުލޫމާތު ސާފު ކުރަން ބޭނުންވާ ކަމަށް އައިއެމްއެފް އިން ބުނެފިއެވެ. ރަޝިޔާގެ ކާޒާން ސިޓީގައި ކުރިއަށް ދިޔަ ބްރިކްސްގެ މަހާސިންތާގައި ޑޮލަރު ނޫން ފައިސާއަކުން އިންޓަރނޭޝަނަލް ޓްރާންސްފާ ހެދުމަށް ގައުމުތަކުން މަޝްވަރާކޮށްފައި ވެއެވެ.
ބްރިކްސް ގްރޫޕް 2009 ވަނަ އަހަރު އުފެދުނު ފަހުން މިހާރު އެޖަމާއަތް ވަނީ ވަރަށް ބޮޑަށް ފުޅާވެފައެވެ. ބްރިކްސްގައި މިހާރު ހިމެނެނީ ރަޝިޔާއާއި ޗައިނާއާއި އިންޑިއާއި ބްރަޒިލާއި ދެކުނު އެފްރިކާގެ އިތުރުން، އީރާން، މިސްރު އަދި ޔުނައިޓެޑް އަރަބް އެމިރޭޓްސް ފަދަ ކުރިއަރަމުން އަންނަ ބޮޑެތި އިގްތިސާދު ތަކެވެ. ޖުމްލަކޮށް ބަލާއިރު ދުނިޔޭގެ އިގްތިސާދީ އުފެއްދުންތެރިކަމުގެ ބޮޑު މައިނޯރިޓީއެއް ހިއްސާކުރަނީ ބްރިކްސް ކޯލިޝަނުންނެވެ.
ކާޒާން ސަމިޓުގައި ރަޝިޔާއިން ވަނީ “ބްރިކްސްގެ ތެރޭގައި ކޮރެސްޕޮންޑެންޓް ބޭންކިން ނެޓްވޯކްތައް ހަރުދަނާކޮށް، ބްރިކްސް ކްރޮސް ބޯޑާ ޕޭމަންޓްސް އިނިޝިއޭޓިވް (ބީސީބީޕީއައި) ގައި ގައުމުތަކުގެ އަމިއްލަ ފައިސާއިން ސެޓްލްމަންޓްތައް ހެދުމަށް ހިތްވަރުދޭ ޖޮއިންޓް ޑިކްލެރޭޝަނެއް ފާސްކޮށްފައެވެ.
ދުނިޔޭގައި ގައުމުތަކުގެ މެދުގައި ފައިސާ ބަދަލު ކުރާ ސްވިފްޓްގެ ނިޒާމަކީ ޔޫރަޕްގެ ނިޒާމެކެވެ. 2022 ވަނަ އަހަރު ޔޫކްރޭނަށް އަރައިގަތުމާ ގުޅިގެން ރަޝިޔާ ވަނީ ސްވިފްޓުން ބޭރުކޮށްލާފައެވެ. ރަޝިޔާއިން ހުށަހަޅާފައިވާ ބީސީބީޕީއައި އަކީ، ސްވިފްޓް ޕޭމަންޓްސް ސިސްޓަމާ ވާދަކުރުމަށް ފަރުމާކޮށްފައިވާ ނިޒާމެކެވެ.
ބުރާސްފަތި ދުވަހު ވޮޝިންޓަންގައި ހުންނަ އައިއެމްއެފްގެ މައި އޮފީހުގައި ނޫސްވެރިންނާ ވާހަކަ ދައްކަވަމުން އައިއެމްއެފްގެ މެނޭޖިން ޑިރެކްޓަރު ކްރިސްޓަލީނާ ޖޯޖިއެވާ ވިދާޅުވީ މި އައު ނިޒާމާ ގުޅޭ ގޮތުން ގޮތެއް ނިންމުމުގެ ކުރިން އެ ޕޭމަންޓް ސިސްޓަމާ ބެހޭ އިތުރު މައުލޫމާތު އައިއެމްއެފުން ބޭނުންވާ ކަމަށެވެ.
ނޫސްވެރިންގެ ބައްދަލުވުމުގައި ޖޯޖިއެވާ ވިދާޅުވީ ކުރިއަށް އޮތްތަނުގައި ފަންޑުގެ މައިގަނޑު ދެ އަމާޒަކީ ދުނިޔޭގެ އިގްތިސާދު ވަޅު ޖެހިޔަ ނުދީ ހިފެހެއްޓުމެވެ.
“މެދުއިރުމަތީގައި ހިނގާ ހިތާމަވެރި ހާދިސާ” ކަމަށް އިޝާރާތް ކުރައްވަމުން އެކަމުގެ އަސަރު މުޅި މެދުއިރުމައްޗަށް ކުރާ ކަމަށް ވިދާޅުވިއެވެ. “މިސްރަށް ކުރިން ސުއޭޒް ކެނަލުން ލިބުނު އާމްދަނީގެ 70 ޕަސެންޓް ގެއްލިގެން ދަނީ ހަނގުރާމައިގެ ސަބަބުން،” އޭނާ ވިދާޅުވި އެވެ.
މި މަހުގެ ކުރީކޮޅު މިސްރުގެ ރައީސް އަބްދުލް ފައްތާހު އެލްސީސީ ވަނީ ސުއޭޒް ނެރުގެ އާމްދަނީ ދަށްވާކަމަށް އިޝާރާތްކޮށް، މި އަހަރު މިސްރަށް “6-7 ބިލިއަން ޑޮލަރު” ގެއްލިފައިވާ ކަމަށް ވިދާޅުވެފަ އެވެ.
