ޗައިނާ އާއި ޕާކިސްތާނުގެ ދިގު މުއްދަތުގެ ޕާޓްނަޝިޕަށް ބޮޑެތި ދަތިތަކެއް ކުރިމަތިވެފައިވަނީ ޓެރަރިސްޓް ހަމަލަތަކުންނެވެ. ދެ ގައުމުން އިގްތިސާދީ، ސަލާމަތީ އަދި ޖިއޮޕޮލިޓިކަލް މައްސަލަތަކާ ކުރިމަތިލާން މަޖުބޫރު ކުރަނީ ޓެރަރިޒަމުންނެވެ.
ޕާކިސްތާނުގައި މިހާރު ހިނގަމުންދާ މާލީ ހަލަބޮލިކަމުގެ ސަބަބުން ކުރިއަށް އޮތް އިންވެސްޓްމަންޓްތައް ކުރިއަށް ގެންދެވޭނެ ގޮތާ މެދު ބެއިޖިންގައި ވަނީ ކަންބޮޑުވުންތަކެއް ފާޅުކޮށްފަ އެވެ. ދެ ގައުމުން އެއްބާރުލުން އިތުރުކުރުމަށް އަމާޒުކޮށްގެން ފަހުގެ އެއްބަސްވުންތަކެއް ހެދި ނަމަވެސް، އިތުރަށް އިންވެސްޓް ކުރަން ޗައިނާގެ ޝައުގުވެރިކަން ބިނާވެފައިވަނީ ޕާކިސްތާނުގެ އިގްތިސާދު ރަނގަޅު ކުރުމާއި ޗައިނާގެ ރައްޔިތުންގެ ސަލާމަތީ ހާލަތު ރަނގަޅު ކުރުމަށް އިސްލާމްއާބާދުން ކުރާ މަސައްކަތުގެ މައްޗަށެވެ.
ސަލާމަތީ އިންޒާރުތަކަކީ ބޮޑު މައްސަލަތަކެއްގެ ގޮތުގައި ހާމަވެފައިވާއިރު، ދާދި ފަހުން ކަރާޗީ އެއާޕޯޓް ކައިރީގައި ދިން ޖާނު ގޮއްވާލުމުގެ ހަމަލައިން ޗައިނާގެ ދެ ރައްޔިތަކު މަރުވެ، ޕާކިސްތާނުގެ ފުލުހުންގެ ބައެއް އޮފިސަރުން ޒަހަމްވެފައިވެ އެވެ. މި ހާދިސާގެ ސަބަބުން ޕާކިސްތާނުގައި ޗައިނާގެ އިންވެސްޓްމަންޓްތަކާއި މުވައްޒަފުންގެ ސަލާމަތާ ގުޅޭ ގޮތުން ޗައިނާގެ ފާރަވެރިވުން އިތުރުވެފައިވެ އެވެ.
ޗައިނާގެ އޮފިޝަލުން ވަނީ އެމީހުންގެ އިންވެސްޓްމަންޓްތަކަށް ހަމަޖެހޭ އަދި ރައްކާތެރި މާހައުލެއް ކަށަވަރުކޮށްދިނުމަށް ޕާކިސްތާން ސަރުކާރު ނުކުޅެދިފައިވާތީ މާޔޫސްކަން ފާޅުކޮށްފައެވެ. އެބޭފުޅުން ވަނީ ސަލާމަތާއި ސިޔާސީ ހަމަޖެހުމަށް ކުރިއެރުމެއް ނުލިބެނީސް އިތުރު އިންވެސްޓްމަންޓެއް ކުރުމަކީ އޮތް ކަމެއް ނޫންކަން ސާފުކޮށްދީފައެވެ.
ޕާކިސްތާންގައި ބަދަލުވަމުން އަންނަ ޖިއޮޕޮލިޓިކަލް ލޭންޑްސްކޭޕްގެ ސަބަބުން ގުޅުން ހީނަރުވާ ކަމަށް ވެސް ރިޕޯޓުތައް ބުނެ އެވެ. އެމެރިކާއާއި ހުޅަނގުގެ ގައުމުތަކާ ގުޅުން ރަނގަޅު ކުރަން ޕާކިސްތާނުން މަސައްކަތް ކުރަމުންދާއިރު، ޗައިނާއިން ވަނީ އިސްލާމްއާބާދުން ޗައިނާގެ ދިގު މުއްދަތުގެ ޕާޓްނަޝިޕާ ދުރަށް ޖެހިދާނެތީ ސަމާލުވާން ފަށާފައެވެ. ބޮޑުވަޒީރު ޝަރީފްގެ ވެރިކަމުގައި އެމެރިކާއާ ޕާކިސްތާނުން ގާތް ވުމުން ޕާކިސްތާނުގެ މައްޗަށް ޗައިނާގެ ނުފޫޒު ގެއްލިގެން ހިނގައިދާނެތީ، ބެއިޖިންގައި އިންޒާރުގެ ރަނގަބީލު ޖަހަންފަށައިފި އެވެ.
މީގެ އިތުރުން އިންޑިއާއާ ދެކޮޅަށް ޕާކިސްތާނުން ދެއްކި ވާހަކަތަކަށްވެސް ބައިނަލްއަގްވާމީ ގޮތުން ބުރަދަނެއް ދެވިފައި ނުވުމުން، އިސްލާމީ ގައުމުތަކުގެ ތާއީދު ހޯދުމަށް ޕާކިސްތާނުން ކުރި މަސައްކަތްތައް ވެސް ނާކާމިޔާބުވެފައިވެ އެވެ. އިންޑިއާ އާއި ޗައިނާއާ ދެމެދު ދާދި ފަހުން ވެފައިވާ ބޯޑަރު އެއްބަސްވުމަކީ ޗައިނާއާ ޕާކިސްތާނުގެ ގުޅުމަށް ވެސް ނުރައްކާތެރި އެއްބަސްވުމެކެވެ.
ތަޖުރިބާކާރުން އިންޒާރު ދެނީ ޕާކިސްތާނަށް އެގައުމުގެ އިގްތިސާދު ހަމައަކަށް އަޅުވައި، ބޭރުގެ އިންވެސްޓްމަންޓްތަކަށް ރައްކާތެރިކަން ކަށަވަރު ކޮށްނުދެވޭ ނަމަ ޗައިނާގެ ޝައުގުވެރިކަން އިތުރަށް ކުޑަވާނެ ކަމަށެވެ.
ޗައިނާ-ޕާކިސްތާން އިކޮނޮމިކް ކޯރިޑޯ (ސީޕެކް) އާއި ފުޅާ ދާއިރާއެއްގައި ދެ ގައުމުގެ އެއްބާރުލުން ދިނުމުގެ މުސްތަގުބަލު ބިނާވެފައިވަނީ ޓެރަރިޒަމާއި އިގްތިސާދާ ހެދި ދިމާވާ އުދަގޫ ގޮންޖެހުންތައް ފައިދާހުރި ގޮތެއްގައި ކުރިއަށް ގެންދިއުމުގެ ގާބިލްކަން އިސްލާމްއާބާދަށް ލިބުމުންނެވެ.
