އިންޑިއާގައި ކަރަންޓުގެ އެންމެ އަގުހެޔޮ ކަރަންޓަކީ މިހާރު އިރުގެ އަވިން އުފައްދާ ހަކަތަ ކަމަށް އިންޑިއާގެ މިނިސްޓްރީ އޮފް ނިއު އެންޑް ރިނިއުބަލް އެނާޖީ އިން ބުނެއެވެ.
އިންޑިއާ ސަރުކާރުން ބުނީ 2016 ވަނަ އަހަރު ސޯލާ ކަރަންޓުގެ ޔުނިޓަކަށް ޖެހުނީ 7.04 ރުޕީސް ކަމަށެވެ. އެއާ ޚިލާފަށް މިހާރު އަގުތައް ވަނީ އެއަށް ވުރެން އެތައް ގުނައަށް ދަށަށް ގޮސް މިހާރު ޔުނިޓަކަށް 3 ރުޕީސް ޖެހޭ ކަމަށް ބުނެފައި ވެއެވެ.
އިންޑިއާއިން މިކަން ހާމަކޮށްފައި ވަނީ ދާދި ފަހުން ނިއުދިއްލީގައި ބޭއްވި ހައި ލެވެލް ކޮންފަރެންސް އޮން ނިއު ޓެކްނޮލޮޖީސް ފޯ ކްލީން އެނާޖީ ޓްރާންސިޝަންގައި ވާހަކަ ދައްކަވަމުންނެވެ.
އިންޑިއާއިން ފާހަގަ ކުރާ ގޮތުގައި ކަރަންޓު އުފެއްދުން އަގު ހެޔޮވިއަސް، ކަރަންޓު ރައްކާ ކުރުމަށް ގޮންޖެހުންތަކެއް އެބަހުރި ކަމަށެވެ. އެގޮތުން ބެޓެރި އަގުހެޔޮކޮށް ލިބުމާއި، އަބި ނުދޭ ވަގުތުތަކުގައި ބެޓެރިން ކަރަންޓު ނެގޭ ގޮތް ވުމަކީ މުހިންމު ކަމެއް ކަމަށް އޭނާ ފާހަގަ ކުރައްވައެވެ.
އިންޑިއާ ސަރުކާރުން ވަނީ ކަރަންޓު ޚަރަދު ކުދަ ކުރުމަށް ރައްޔިތުންނަށް ފައިދާވާ ގޮތަށް ސްކީމެއްވެސް ފަށާފައެވެ. އޭގެ އަމާޒަކީ 75،000 ކްރޯޑް ރުޕީސްގެ ބަޖެޓަކުން 1 ކްރޯޑް ގޭބިސީތަކަށް ކަރަންޓް ދިނުމެވެ. 2030 ވަނަ އަހަރުގެ ނިޔަލަށް އިންޑިއާއިންއަމާޒު ހިފާފައި ވަނީ ތެޔޮ ނޫން ގޮތްގޮތުން 500 ގިގަވޮޓްގެ ކަރްނޓު އުފައްދާށެވެ. އިންޑިއާގެ މިހާރުގެ ހާލަތުގައިވެސް އިންޑިއާއަކީ، އިއާދަކުރަނިވި ހަކަތަގެ ދާއިރާއިން މުސްތަގުބަލުގެ ލީޑަރެއްގެ ގޮތުގައި ފާހަގަ ވާ ޤައުމެކެވެ.
