ޕާކިސްތާނުގައި އިންސާނީ ހައްގުތަކާ ގުޅޭ ބޮޑެތި ކަންބޮޑުވުންތައް ހުރިކަމަށް ބުނެ ފާޑު ކިޔައިފިއެވެ. ޕާކިސްތާންގެ އިންސާނީ ހައްގުތަކުގެ މައްސަލަތައް މުރާޖަޢާ ކުރި އިންސާނީ ހައްޤުތަކާ ބެހޭ އދގެ މަޖިލީހުގައި އިކުއެޑޯ، ފްރާންސް، ގްރީސް، އައިސްލޭންޑް، އަދި ތުރުކީގައި އިންސާނީ ހައްގުތަކާ ބެހޭ ކަންކަންވެސް މުރާޖައާކޮށްފައިވެ އެވެ.
ޕާކިސްތާނުގައި ކްރިސްޓިއަނުންނާއި ގާދިޔާނީންނާއި ހިންދޫންނާއި ސިކުން ގެ ދީނީ ބައިމަދު މީހުންނާ ދެކޮޅަށް ތަފާތުކުރުމާއި ނަފްރަތު އުފެދޭ ވާހަކަތަކާއި ނަފްރަތުގެ ޖަރީމާތައް އިތުރުވަމުންދާ ކަމަށް ބުނެ ފާޑު ކިޔާފައި ވެއެވެ.
އަދި ބުނެފައި ވަނީ، އަޅުކަންކުރާ ތަންތަނާއި މީހުން ވަޅުލާތަންތަން ނައްތާލުމުގެ އިތުރުން ގިނަ ބަޔަކު އެއްވެ އުޅޭ ތަންތާނގައި އެފަރާތްތަކަށް އަނިޔާތަކާއި އުނދަގޫތައް އިތުރުވަމުންދާ ކަމަށެވެ.
މަރުގެ ހުކުމް ފަދަ ހަރުކަށި އަދަބުތައް ހިމެނޭ ގޮތަށް ޕާކިސްތާނުގެ ދީނަށް ފުރައްސާރަ ކުރުމާ ދެކޮޅު ގާނޫނުތަކުގެ ސަބަބުން ޖަލުގައި މީހުން ބަންދުކުރުން އިތުރުވެފައިވާ ކަމަށްވެސް ބުނެފައި ވެއެވެ.
އަދި ސައިބަރ ކްރައިމް ގާނޫނުތަކުގެ ދަށުން އޮންލައިންކޮށް މީހުން ކުފުރުވާކަމަށް ބަލައި ތުހުމަތު ކުރެވޭ ޒުވާނުންނަށް އަމާޒުކޮށްގެން ފިއްތުންތައް ކުރިމަތިކުރާ މައްސަލަތައް ވެސް ރިޕޯޓުގައި ފާހަގަކޮށްފައިވެ އެވެ.
ބައި މަދު މީހުންނަށް ކުރާ އަނިޔާތައް ތަހުގީގުކޮށް ހުއްޓުވުމަށާއި ބައިނަލްއަގްވާމީ މިންގަނޑުތަކާ އެއްގޮތަށް ދީނަށް ފުރއްސާރަ ކުރުމުގެ ގާނޫނުތައް އުވާލުމާއި ނުވަތަ އިސްލާހުކުރުމާއި ކުފުރުގެ ދައުވާތަކުގައި ސައިބަރ ކްރައިމް ގާނޫނުތައް ބޭނުންކުރުން ހުއްޓާލުމަށް ޔޫއެންއެޗްއާރުސީން ވަނީ ޕާކިސްތާނަށް އިލްތިމާސްކޮށްފަ އެވެ.
މީގެ އިތުރުން 2021 ވަނަ އަހަރު ނޫސްވެރިން ހިމާޔަތް ކުރުމުގެ ގާނޫނު ފާސްކުރި ނަމަވެސް ނޫސްވެރިންނާއި އިންސާނީ ހައްގުތައް ދިފާއުކުރާ ފަރާތްތަކަށް ގަދަކަމުން ނިޒާމުން ގެއްލުވާލުމާއި އަނިޔާކުރުމާއި މަރާލުން ފަދަ އަނިޔާތަކާ ގުޅިގެން ކަންބޮޑުވުންތައް ފާޅުކޮށްފައިވެ އެވެ.
ޔޫއެންއެޗްއާރްސީން ގޮވާލީ އަނިޔާތަކަށް ސަރުކާރުން ޖަވާބުދާރީވުމާއި، އަނިޔާގެ ޝިކާރައަކަށްވާ މީހުންނަށް ބަދަލު ދިނުމާއި، އިންޓަނެޓް ބަންދުކުރުން ފަދަ ހަރުކަށި ފިޔަވަޅުތައް ހުއްޓާލުމަށެވެ. އަދި ޚިޔާލުތަފާތުވުންތައް ކޮންޓްރޯލު ކުރުމަށް އަބުރުގެ ގާނޫނު ގެ ބޭނުން ނުހިފުމަށާއި ހަމަނުޖެހުން އުފެއްދުމުގެ މައްސަލަތަކުގައި ޓެރަރިޒަމާ ދެކޮޅު ޤާނޫނުތަކުގެ ނާޖާއިޒް ފައިދާ ނުނެގުމަށްވެސް ޕާކިސްތާނަށް އިލްތިމާސްކޮށްފައިވެއެވެ.
