ޕާކިސްތާނުގެ ޕަންޖާބު ޕްރޮވިންސްގައި ދުން ބޯވުމުގެ ހާލަތު ބިރުވެރި މިންވަރަކަށް ގޮސްފައި ވެއެވެ. މުލްތާނުން ވަނީ ކުރިން ނުފެންނަ ފަދަ މިންވަރަކަށް ވައި ނުސާފުވެ، އެއާ ކޮލިޓީ އިންޑެކްސް (އޭކިޔުއައި) 2،000 އަށް ވުރެ މައްޗަށް އަރާފަ އެވެ. މުލްތާންގެ ޕީކް އޭކިޔުއައި 2،135 އަށް ވައި ނުސާފު ކަމަށް ދައްކައެވެ. މިވަރުން، މިއީ ދުނިޔޭގެ އެންމެ ތަޣައްޔަރު ސިޓީތަކުގެ ތެރޭގައި ހިމެނޭ ސިޓީއެކެވެ. ޕީއެމް2.5 — އެންމެ ގެއްލުން ބޮޑު ވައި ތަޣައްޔަރުކުރާ މާއްދާ — ގެ ކޮންސެންޓްރޭޝަން ދުނިޔޭގެ ސިއްހަތު ޖަމިއްޔާއިން ކަނޑައަޅާފައިވާ ސަލާމަތީ ލިމިޓަށް ވުރެ ގާތްގަނޑަކަށް 190 ގުނަ މަތީގައި މުލްތާންގައި ހުރި ކަމަށް ރެކޯޑް ކުރެވިފައި ވެއެވެ.
އެކަމާ ގުޅިގެން ޕަންޖާބުގެ ސްޓޭޓް ސަރުކާރުން ވަނީ އަވަސް ފިޔަވަޅުތަކެއް އަޅާފައެވެ. އޭގެ ތެރޭގައި މުލްތާނުގައި ‘ސްމާޓް ލޮކްޑައުން’ އަކަށް ދިއުމާއި ބާޒާރާއި ފިހާރަތައް އަވަހަށް ބަންދުކުރުމާއި މާގިނައިން ދުން ދޫކުރާ އުޅަނދުތައް ހުއްޓުވުން ހިމެނެ އެވެ.
ދުން އަރާ ކަންކަން މަދުކުރުމަށް ކަމާބެހޭ ފަރާތްތަކުން މަސައްކަތްތައް ވަރުގަދަކޮށްފައިވާއިރު، ގަސްގަހާގެހި އަންދާލުމާއި ކުނޑިބުރާފަދަ ތަކެތި ކީހައި ގާނައި ހެދުން މަނާކޮށް ގަވާއިދާ ހިލާފުވާ ތަންތަން ބަންދުކުރުން ހިމެނެ އެވެ. މި ފިޔަވަޅުތައް އެޅި ނަމަވެސް ރައްޔިތުން ގަވާއިދުތަކަށް އަމަލު ނުކުރުމުގެ ސަގާފަތެއް އަށަގަނެފައި ވެއެވެ. އަދި ފަރުވާލަކާ ނުލައި ކުޑަކުދިން އަދިވެސް ބޭރުގައި ކުޅެމުންދާއިރު ގިނަ ބަޔަކަށް ނޭވާ ލުމާއި ކަރުން މަތީގެ ސިއްހީ މައްސަލަތައް ކުރިމަތިވެފައިވާ ކަމަށް ރިޕޯޓުކޮށްފައިވެއެވެ.
ވައި ނުސާފު ވުމުގެ މިކާރިސާގެ ސަބަބުން މީހުންގެ ދުވަހުގެ ދިރިއުޅުމަށް ވަރަށް ބޮޑަށް އަސަރުކޮށްފައިވެއެވެ. އަދި ދުން ބޯ ސަރަހައްދުގެ މުހިއްމު މަގުތައް ވަނީ ބަންދުކޮށްފައެވެ.
