ދެކުނު ޗައިނާ ކަނޑުގައި ޗައިނާގެ ސިޔާދަތު ކަށަވަރު ކުރުމުގެ ގޮތުން ޗައިނާގެ އެންމެ ދެކުނުގެ ސިޓީ ކަމަށްވާ ސަންޝާގެ އަޕްޑޭޓް މެޕެއް އާންމުކޮށްފި އެވެ. މިނިސްޓްރީ އޮފް ނެޗުރަލް ރިސޯސަސް އިން ނެރުނު އާ މެޕްގައި ވަނީ އޭގެ ކުރިން ނެރުނު 2020 ވަނަ އަހަރުގެ މެޕްގައި ނުފެންނަ ޒިޝާ (ޕަރސެލްސް އައިލެންޑް) އާއި ނަންޝާ (ސްޕަރޓްލިސް) ފާހަގަކޮށް އެތަންތާނގެ ނަންތައް ހިމަނާފައެވެ.
ސަންޝާގެ އަޕްޑޭޓް އެކުލަވާލައި އާންމު ކޮށްފައި ވަނީ، ދެކުނު ޗައިނާ ކަނޑުގައި ޗައިނާއިން ދައުވާކުރާ ތަންތަނަށް ބެއިޖިންގެ ކޮންޓްރޯލް ކަށަވަރުކުރުމުގެ ގޮތުންނެވެ.
ޗައިނާއިން މި ފިޔަވަޅު އަޅާފައިވަނީ ފިލިޕީންސް އިން ކަނޑުގެ ސަރަހައްދާ ބެހޭ ގޮތުން އާ ގާނޫނުތަކެއް ފާސްކޮށް، ސަރަހައްދީ ކޯޅުން އިތުރަށް ވަރުގަދަ ކުރިތާ މާގިނަ ދުވަހެއް ނުވެ އެވެ.
މި އަޕްޑޭޓް މެޕަކީ އަވަށްޓެރި ގައުމުތަކާ އެކު ހިނގަމުންދާ މައްސަލަތަކުގެ ތެރޭގައި ސްޓްރެޓެޖިކް ގޮތުން މުހިންމު ކަނޑުގެ ސަރަހައްދުގައި ޗައިނާގެ ސިޔާދަތު ދާބިތުކޮށްދޭ އަމަލެކެވެ.
