އެމެރިކާގެ ގޮނޑިކޮއްކޮއެއްގެ ގޮތުގައި ބައިނަލްއަގްވާމީ މައިދާނުގައި ހަރަކާތްތެރިވާ ޕަލާއޯގެ ރައީސް ސުރަންޖެލް ވިޕްސް ޖޫނިއާ ވަނީ ޗައިނާއިން ޕެސިފިކް ގައުމުގެ ކަނޑުގެ ބޯޑަރުތަކާ ހިލާފުވާ ކަމަށް ތުހުމަތު ކުރައްވާފައެވެ.
އޭނާ ވިދާޅުވަނީ ހުއްދަ ނެތި އެގައުމުގެ ކަނޑުގެ ސަރަހައްދުތަކަށް ޗައިނާއިން ރިސާޗް އުޅަނދުތައް ފޮނުވާ ކަމަށެވެ.
“ޗައިނާއން އަޅުގަނޑުމެންގެ އިސްތިގުލާލަށް އިހުތިރާމެއް ނުކުރޭ،” ޕަލާއޯގެ ވިޔަފާރީގެ މަރުކަޒު ކަމަށްވާ ކޮރޯރު އިން ދެއްވި އިންޓަރވިއުގައި ވިޕްސް ވިދާޅުވި އެވެ. އޭނާ މި ތުހުމަތު ކުރެއްވީ އަލުން އިންތިހާބު ކަށަވަރުވިތާ ދުވަސްކޮޅެއް ފަހުންނެވެ.
ވިޕްސް ވިދާޅުވި ގޮތުގައި ޕަލާއުގެ އެކްސްކްލޫސިވް އިކޮނޮމިކް ޒޯން އިން މި ހަފްތާގެ ކުރީކޮޅު ޗައިނާގެ އުޅަނދުތައް ފެނިފައިވާކަމަށެވެ.
ޕަލާއުއާއި ޗައިނާގެ ކޯޅުން އައިސްފައި ވަނީ، ޗައިނާގެ އޮފިޝަލުން ޕަލާއު އިން ދައުވާކުރާ ކަނޑުއަޑީގެ ދެ ފަރުބަދައަކަށް އާ ނަންތަކެއް ދިނުމުންނެވެ.
ވިޕްސް ދެކޭ ގޮތުގައި ގަސްތުގައި ޕަލާއު ރުޅިއަރުވާލުމަށް ޗައިނާއިން ކުރި ކަމެކެވެ.
ގާތްގަނޑަކަށް 20،000 މީހުންގެ އާބާދީއެއް އޮންނަ ޕަލާއު އަކީ ޓައިވާން ގަބޫލުކުރާ މަދު ގައުމުތަކުގެ ތެރެއިން ގައުމެކެވެ.
ޕަލާއުގެ ވެރިކަމާ ހަވާލުވެވަޑައިގެންނެވި ފަހުން ވިޕްސް ވަނީ އެމެރިކާގެ ގޮނޑިކޮއްކޮއަކަށް ބަދަލުވެ ޗައިނާއާ ހަތުރުވެރި ސިޔާސަތެއް ގެންގުޅެން ފަށާފައެވެ. މިހަފްތާގައި އދގައި ފަލަސްޠީނު މައްސަލާގައި ދިން ވޯޓުގައިވެސް ޕަލާއުއަކީ އެމެރިކާއާއެކު ދެކޮޅަށް ވޯޓުލީ 4 ގައުމުން އެއް ގައުމެވެ.
