ޗައިނާގެ އައު ކުންފުނިތައް ހިއްސާގެ ބާޒާރުގައި ބައިވެރި ކުރުމަށް ދަތިތަކެއް ކުރިމަތިވެ، އިންވެސްޓަރުންގެ އިތުބާރު ކުޑަވަމުންދާތީ ޗައިނާގެ ސްޓާޓްއަޕް އިކޯސިސްޓަމަށް ޕްރެޝަރު ބޮޑުވެފައިވެ އެވެ. 2023 ވަނަ އަހަރު 641 އަށް ވުރެ ގިނަ ކުންފުނި ސްޓޮކް އެކްސްޗޭންޖްތަކުގައި ލިސްޓް ނުކުރެވުނު ކަމަށް ރިޕޯޓުކޮށްފައި ވެއެވެ. އަދި އެކަމުގެ ސަބަބުން އިންވެސްޓަރުން ވަނީ އެމީހުން އިންވެސްޓް ކުރި ފައިސާ އަނބުރައި ހޯދަން އެދެފައެވެ.
އާންމު އުސޫލުން އެއްބަސްވެފައިވާ މުއްދަތެއްގެ ތެރޭގައި ސްޓާޓްއަޕްތައް ހިއްސާގެ ބާޒާރުގައި ބައިވެރި ނުކުރެވިއްޖެނަމަ އިންވެސްޓަރުންނަށް ފައިސާ އަނބުރާ ހޯދުމުގެ ހައްގު ލިބިގެންވެ އެވެ. މިކަމުގެ ސަބަބުން 8.6 ޓްރިލިއަން ޔުއާން (1.2 ޓްރިލިއަން ޑޮލަރު) ގެ އިންވެސްޓްމަންޓްތައް ތަމްސީލުކުރާ 14،000 ސްޓާޓްއަޕްތަކާ ގުޅޭ މައްސަލަތައް އުފެދިފައިވެ އެވެ.
ޗައިނާގެ ޕްރޮޕަޓީ ބާޒާރަށް ދިމާވެފައިވާ މައްސަލަތަކާއި ހިއްސާގެ ބާޒާރު ދަށަށް ދިއުމާއި ޖިއޮޕޮލިޓިކަލް ޓެންޝަންތަކުގެ ސަބަބުން އިގްތިސާދީ ހީނަރުކަން ވަނީ އިތުރަށް ގޯސްވެފައެވެ.
އޭގެ އިތުރުން ގަވާއިދުތައް ހަރުކަށި ކުރުމުގެ ސަބަބުން ސްޓާޓްއަޕްތަކަށް އިތުރު ހުރަސްތަކެއް ކުރިމަތިވެފައި ވެއެވެ. އަދި ފައިސާ ނުދެއްލުމުގެ ސަބަބުން، ސްޓާޓްއަޕްތައް އުފެއްދި ފައުންޑަރުންގެ އެކައުންޓް ފްރީޒް ކުރަން ޖެހިފައި ވެއެވެ.
އެފަދަ ހައި ޕްރޮފައިލް މައްސަލައެއްގައި މަޝްހޫރު ލަކްސިން ކެޕިޓަލުން ވަނީ ޝާންޑޮންގްގެ “އިންލާރިން ޓެކްނޮލޮޖީ”ގެ ބާނީއާ ދެކޮޅަށް ދައުވާކޮށްފައެވެ. އޭނާ މުވައްޒަފުންނަށް މުސާރަ ނުދީ ހުރި ކަމަށާއި އިންވެސްޓަރުންނާއެކު ވެފައިވާ އެއްބަސްވުމާ ޚިލާފްވެފައިވާ ކަން ފާހަގަ ވެފައި ވެއެވެ.
ޗައިނާގެ އައިޕީއޯތައް ލިސްޓު ކުރުމުގައި މިފަދަ މައްސަލަތަކާ މަދުން ނަމަވެސް ކުރިމަތިލާން ޖެހެއެވެ.
ޗައިނާ ސަރުކާރުން ހިތްވަރު ދިނުމުގެ ޕެކޭޖުތައް ތައާރަފް ކުރިނަމަވެސް އަދިވެސް އިގްތިސާދު ދިރި، އާލާވެފައެއް ނުވެ އެވެ. އިގްތިސާދުގައި އިތުބާރު ކުޑަވަމުންދާ ވަރަކަށް ވެންޗާ ކެޕިޓަލިސްޓުން ފައިސާ އަނބުރައި ހޯދަން އެދޭ ނިސްބަތް އިތުރު ވެއެވެ. މިއީ ޗައިނާގެ ވިޔަފާރިވެރިކަމުގެ މާހައުލަށް ފުން ގޮންޖެހުންތަކެއް ކުރިމަތިވެފައިވާ ކަމުގެ އިޝާރާތެކެވެ.
