ރާއްޖޭގެ ރިސޯޓްތަކުގައި ހަކަތަ ބޭނުންކުރާ މިންވަރާއި، ޚާއްސަކޮށް އިޔާދަކުރަނިވި ހަކަތަ (ރިނިއުވަބަލް އެނަރޖީ) ބޭނުންކުރާ މިންވަރުގެ މައުލޫމާތު ފޯރުކޮށްދިނުމަށް ޓޫރިޒަމް މިނިސްޓްރީން އެދިއްޖެއެވެ. މިކަމަށް އެދިފައިވަނީ 2028 ވަނަ އަހަރުގެ ނިޔަލަށް ރާއްޖޭގައި އުފައްދާ ހަކަތައިގެ 33 ޕަސެންޓް އިޔާދަކުރަނިވި ހަކަތައަށް ބަދަލުކުރުމަށް ސަރުކާރުން ކަނޑައަޅާފައިވާ ލަނޑުދަނޑި ހާސިލުކުރުމަށްޓަކައެވެ.
ޓޫރިޒަމާއި ތިމާވެއްޓާ ބެހޭ މިނިސްޓްރީން ނެރެފައިވާ ސާކިއުލާއެއްގައި ފާހަގަކޮށްފައިވާ ގޮތުގައި، މި ލަނޑުދަނޑި ހާސިލުކުރުމަށް ބޭނުންވާ މައުލޫމާތު އެއްކުރުމަކީ މުހިންމު ކަމެކެވެ. މިގޮތުން، ރިސޯޓްތަކުން ކަރަންޓު އުފައްދާ މިންވަރާއި، އޭގެ ތެރެއިން އިޔާދަކުރަނިވި ހަކަތަ ބޭނުންކުރާ މިންވަރުގެ ތަފްސީލު ހުށަހެޅުމަށް މިނިސްޓްރީން ވަނީ އެދިފައެވެ. މި މައުލޫމާތު ބޭނުންވަނީ ދެމެހެއްޓެނިވި ހަކަތައިގެ ސިޔާސަތުތައް ރާވައި ތަންފީޒުކުރުމަށެވެ.
ސަރުކާރުން މަސައްކަތް ކުރަމުން ގެންދަނީ ދައުލަތުގެ ބަޖެޓުގައި ހަކަތައަށް ކުރާ ޚަރަދު ކުޑަ ކުރުމަށެވެ. މީގެ އިތުރުން، އިމްޕޯޓު ކުރާ ތެލުގެ މިންވަރު ދަށްކުރުމަށް ގިނަ ފިޔަވަޅުތަކެއް އަޅަން ވަނީ ނިންމާފައެވެ. މިކަމުގެ ސަބަބުން އިގްތިސާދަށް ލުއި ލިބި، ތިމާވެއްޓަށް ކުރާ ނޭދެވޭ އަސަރުވެސް ކުޑަކުރެވޭނެކަމަށް ބެލެވެއެވެ.
ރާއްޖޭގެ ބައެއް ރިސޯޓުތަކުގައި ދުވަހުގެ ބޮޑުބައެއް ހިންގަމުން ދަނީ ސޯލާއިން ނެވެ. މިގޮތުން، ކްރައުން އެންޑް ޗަމްޕާ ރިސޯޓްސް (ސީސީއާރު) އިން އއ. އަތޮޅުގައި ހިންގާ ވެލިގަނޑު މޯލްޑިވްސް ރިސޯޓުގައި ދުވާލަކު 8 ގަޑިއިރު އަވިން ކަރަންޓު އުފައްދަން ވަނީ ފަށާފައެވެ. މިފަދަ މަސައްކަތްތަކަކީ ރާއްޖޭގެ މުޅި ހަކަތަ ނިޒާމު އިޔާދަކުރަނިވި ހަކަތައަށް ބަދަލުކުރުމަށް ސަރުކާރުން ކުރަމުންދާ މަސައްކަތަށް ލިބޭ ބާރެކެވެ.
