ޕާކިސްތާންގެ ޕެޝާވަރުގައި ގިނަގިނައިން ބޮން ގޮއްވާލުމާއި ޖާނު ގޮއްވާލުމުގެ ހަމަލާތައް އާންމު ވުމުގެ ސަބަބުން ހޮސްޕިޓަލްތަކަށް، ބާރުބޮޑުވުމާއެކު ޕެޝާވަރުގެ ލޭޑީ ރެޑިން ހަސްފަތާލު ކުއްލި ހާލަތަށް ތައްޔާރު ކޮށްފިއެވެ. ލޭޑީ ރެޑިން ހަސްފަތާލަކީ އެސަރަހައްދުގެ އެންމެ ބޮޑު ހަސްފަތާލެވެ.
މި ހަސްފަތާލުން މިދިޔަ ދުވަސްތަކުގައި މިފަދަ ހަމަލަތަކުން ލިބުނު ތަޖުރިބާގެ އަލީގައި، އެ ހަސްފަތާލުން ވަނީ ކަރާޗީ، ލާހޯރު އަދި އެހެން ސިޓީތަކުގެ ހެލްތްކެއާ ޕްރޮފެޝަނަލުންނަށް ކުއްލި ހާލަތުގެ ތަމްރީނުތައް ދީފަ އެވެ.
ޕެޝާވަރުގެ އެންމެ ދުވަސްވީ 1،800 އެނދުގެ ހޮސްޕިޓަލް ލޭޑީ ރެޑިންގައި ކުއްލި ހާލަތުގެ ޚާއްސަ ޚިދުމަތްތައް ދިނުމަށް ވަކި ޔުނިޓެއް ގާއިމްފައި ވުމުގެ ސަބަބުން ޓެރަރިސްޓް ހަމަލާތަކުގައި މަރުވާ މީހުންގެ އަދަދު ވަރަށް ބޮޑަށް ދަށްވެ އެވެ.
އެ ހަސްފަތާލުން ބުނާ ގޮތުގައި މިދިޔަ ދުވަސްތަކުގައި ޖާނު ގޮއްވާލުމާއި ބޮމުގެ ހަމަލާތަކުގެ ކުއްލި ހާލަތުގެ 320 ކޭސްތަކަށް އެހަސްފަތާލުން ފަރުވާދީފައި ވެއެވެ. މިއިން ގިނަ ކޭސްތަަކކީ ވަރަށް ސީރިއަސް ކޭސްތަކެއް ކަމަށް ހަސްފަތާލުން ބުނެއެވެ.
މި ހަސްފަތާލުގައި ޑޮކްޓަރުންނާއި ނަރުހުންނާއި ޕެރަމެޑިކްސްގެ 600 އަށް ވުރެ ގިނަ މުވައްޒަފުން އެކްސިޑެންޓް އަދި އިމަޖެންސީ ޑިޕާޓްމަންޓުގައި ރޭޑިއޮލޮޖިސްޓުންނާއި ޕެތޮލޮޖިސްޓުންނާއި ކާޑިއޮލޮޖިސްޓުންނާއި އެހެނިހެން ދާއިރާތަކުން ވަޒީފާ އަދާކުރެއެވެ.
