ދީނަށް ފުރައްސާރަ ކުރުމުގެ މައްސަލައަކީ ޕާކިސްތާންގައި ވަރަށް ސީރިއަސް މައްސަލައެކެވެ. ޕާކިސްތާނަކީ އީރާނަށް ފަހު ދީނަށް ފުރައްސާރަ ކުރުމުން އެންމެ ހަރުކަށި އަދަބުދޭ ދެވަނަ ގައުމެވެ.
ޕާކިސްތާންގެ ޖަލުތަކުގައި މިހާރުވެސް ސަތޭކަޔަށް ވުރެ ގިނަ މީހުން ދީނަށް ފުރައްސާރަ ކުރުމުގެ ކުށުގައި ބަންދު ކޮށްފައި ވެއެވެ. މި ކުށް ސާބިތުވާމީހުންނަށް މަރުގެ އަދަބު ދެވެއެވެ. ޕާކިސްތާންގައި ދީނަށް ފުރައްސާރަ ކުރުމުން ދޭ އަދަބާ މެދު އިންސާނީ ހައްގަށް މަސައްކަތް ކުރާ ފަރާތްތަކާއި ޔޫރަޕްގެ ޖަމާއަތުން ކަންބޮޑުވުން ފާޅު ކުރެއެވެ.
ޕާކިސްތާންގައި ދީނަށް ފުރައްސާރަ ކުމުގެ މައްސަލާގައި ގިނަ ފަހަރަށް ބެދެނީ ބައި މަދު ނަސްލުތަކުގެ މީހުންނެވެ. އަދި އެފަދަ ފަރާތްތަކަށް މި ޤާނޫނުތަކުގެ ދަށުން ދަޢުވާ ކުރެވޭ މިންވަރު އިތުރުކަމަށްވެސް ފާހަގަކުރެވެއެވެ.
ޕާކިސްތާނުގެ އާބާދީގެ 2 އިންސައްތައަށް ވުރެ މަދު އަދަދެއްގެ މީހުންނަކީ ކްރިސްޓިއަނުންނެވެ. އެމީހުން ވަރަށް ގިނައިން މި މައްސަލާގެ ޝިކާރައަކަށް ވެފައިވާ ތަން ފެނެއެވެ.، އަދި އެއިން ބައެއް މީހުންގެ މައްޗަށް ކުށް ސާބިތު ނުކުރެވި ސަލާމަތް ވެފައިވެސް ވެއެވެ.
ބައެއް ފަހަރަށް ވަޒިފާގެ މާހައުލުގައި އުފެދޭ ދެބަސްވުމާއި ޚިޔާލު ތަފާތުވުމުގެ ސަބަބުންވެސް ދީނަށް ފުރައްސާރަ ކޮށްފިކަމަށް ބުނެ ތުހުމަތު ކުރެވެއެވެ. އެފަދަ މީހެއްގެ ނަސީބު ރަނގަޅުނަމަ ހަވަރަށް ނުދީ ސަލާމަތް ވެއެވެ. އެހެން ވެއްޖެނަމަ ދިގު މުއްދަތަކަށ ްޖަލުގައި ބެއްވޭނެއެވެ. އަދި ޒަމާން ގަނޑަކަށްފަހު އޭނާ ދޫކޮށްލެވޭނެއެވެ.
މިފަހުންވެސް ކްރިސްޓިއަން ފިރިހެނެއް ކަމަށްވާ ނަދީމް މަސީހް ނަމަކަށް ކިޔާ މީހަކަށް ދީނަށް ފުރައްސާރަ ކުރިކަމަށް ބުނެ ބަންދުކޮށްފައި ވެއެވެ. އޭނާގެ މައްޗަށްވެސް ކުށް ސާބިތު ވެއްޖެނަމަ މަރުގެ ނިޔާ އިއްވޭނެއެވެ.
މީގެ އިތުރުން، އޮގަސްޓު މަހު އިތުރު ކްރިސްޓިއަން ފިރިހެނެއް ކަމަށްވާ ރަޝީދު މަސީހް، އަށްވެސް އެފަދަ މައްލައެއްގައި ތުހުމަތު ކޮށްފައި ވެއެވެ.
ހުރިހައި ފަހަރެއްގައިވެސް ޕާކިސްތާންގެ އާބާދީވެސް ބަދުނާމެއް ނުކުރެވޭނެއެވެ. ބައެއްފަހަރު މިފަދަ ހަގީގީ މައްސަލަތައްވެސް ހިނގާފައި އެބަ ހުއްޓެވެ.
ދީނަށް ފުރައްސާރަ ކުރި މައްސަލައެއްގައި ދަޢުވާކޮށް 13 އަހަރު ދުވަހަށް ޖަލަށްލެވުނު ފަދިރީ ޒަފަރް ބައްޓީ މިނިވަންވީ، އޮކްޓޯބަރު މަހުއެވެ. އޭނާ މިނިވަންވިތާ މަދު ދުވަސްކޮޅެއްގެ ތެރޭގައި ހިތުގެ މައްސަލައެއްގައި މަރުވިއެވެ.
ޕާކސްތާންގައި 1987 ވަނަ އަހަރުން ފެށިގެން، ދީނަށް ފުރައްސާރަ ކުރުމުގެ ތުހުމަތުގައި 89 މީހުންނަށް ވުރެ ގިނަ މީހުން ވަނީ ހަވަރަށްދީގެން މަރާލާފައެވެ.
އަދި 2023 ވަނަ އަހަރުގެ އޮގަސްޓު މަހު ޖާރަންވާލާގައި ވެސް ދެ ކްރިސްޓިއަނަކު ޤުރުއާނަށް އިހާނެތިކޮށް ހިތިކަމަށް ބުނެ ފެތުރުނު ވާހަކަތަކާ ގުޅިގެން އެތައް ފައްޅިއަކާއި ގެތަނެއް އަންދާލާފައި ވެއެވެ.
ޕާކިސްތާންގެ އިންސާނީ ހައްގުތަކުގެ ހާލަތު މުރާޖައާ ކުރުމަށް ކުރީގެ އިސްތިއުމާރީ ވެރިކަން ކުރި ޔޫރަޕްގެ ގައުމުތަކުން ވަފްދެއް އިސްލާމްއާބާދަށް އައުމަށް ވަނީ ހަމަޖެހިފައެވެ. އެ މިޝަންގެ މަޤްޞަދަކީ، ޖީ.އެސް.ޕީ+ ސްކީމްގެ ދަށުން ޕާކިސްތާނަށް ލިބޭ ވިޔަފާރީގެ އިނާޔަތްތައް ދަމަހައްޓަންވީތޯ ނުވަތަ ނޫން ތޯ ބެލުމެވެ. ޔޫރަޕުން މިފަދަ އިނާޔަތްތައް ގައުމުތަކަށް ދެނީ އިންސާނީ ހާލަތުގެ ކަންކަން މުރާޖައާ ކުރުމަށް ފަހުއެވެ. އިޒްރޭލުގެ ޖެނޮސައިޑަށް ހަޔިތާރު ދީފައި ވަނީ ޔޫރަޕްގެ ގައުމުތަކުންނެވެ.







