ފަލަސްޠީނު ޖެނޮސައިޑްގެ ތެރޭގައި ހަނގުރާމައިގެ ކުށްތަކާއި ނަސްލު ނައްތާލުމުގެ އަމަލުތައް ހިންގާފައިވާ ކަމަށް ތުހުމަތުކޮށް، އިސްރާއީލާއި އެމެރިކާ ރަށްވެހިކަން ގެންގުޅޭ ސިފައިންގެ މީހަކާ ދެކޮޅަށް ޖިނާއީ ތަހުގީގެއް ހިންގުމަށް އެދި ބެލްޖިއަމްގެ ގާނޫނީ ޖަމިއްޔާއަކުން އެމެރިކާގެ ފެޑަރަލް ކޯޓަކަށް މައްސަލައެއް ހުށަހަޅައިފިއެވެ.
ފަލަސްޠީނު ޖެނޮސައިޑަކީ އދން ބަލައިގެންފައިވާ ހިނގާފައިވާ ކަމަށް ގަބޫލު ކުރާ ލިސްޓުކޮށްފައިވާ ޖެނޮސައިޑެކެވެ.
ހިންދު ރަޖަބް ފައުންޑޭޝަން (އެޗް.އާރު.އެފް) އިން މި މައްސަލަ ހުށަހަޅާފައިވަނީ އިސްރާއީލު ސިފައިންގެ 603 ވަނަ ކޮމްބެޓް އިންޖިނިއަރިން ބެޓަލިއަންގެ ކުރީގެ ސާޖަންޓެއް ކަމަށްވާ އަދީ ކާނީ، ބޮސްޓަން ޔުނިވާސިޓީގައި ވާހަކަ ދެއްކުމަށް އެމެރިކާގައި ހުއްޓައެވެ. އެ ޖަމިއްޔާއިން ބުނި ގޮތުގައި ކާނީ އެމެރިކާގެ ފަސްގަނޑުގައި ހުރުމަކީ، ހަނގުރާމައިގެ ކުށްތަކާއި ނަސްލު ނައްތާލުމާ ބެހޭ ފެޑަރަލް ގާނޫނުތަކުގެ ދަށުން އެމެރިކާގެ އިޚުތިސާސް ހިނގާނެ ކަމެކެވެ.
މި ޝަކުވާ ބިނާކޮށްފައިވަނީ އެމެރިކާގެ 'ވޯ ކްރައިމްސް އެކްޓް' އަދި 'ޖެނޮސައިޑް ސްޓެޓިއުޓް' ގެ މައްޗަށެވެ. މި ގާނޫނުތަކުގެ ދަށުން، ބައިނަލްއަގުވާމީ ކުށްތަކެއް ކުރިކަމުގެ އިތުބާރު ހުރި ތުހުމަތުތަކެއް ކުރެވޭ މީހަކު އެމެރިކާގައި ހުރިނަމަ، އެމީހެއްގެ މައްސަލަ ތަހުގީގު ކުރުމުގެ ބާރު އެމެރިކާގެ ކޯޓުތަކަށް ލިބިގެންވެއެވެ.
ހިންދު ރަޖަބުން ހުށަހެޅި ތަހުގީގީ ރިޕޯޓުގައިވާ ގޮތުން، ޣައްޒާގެ މަދަނީ އުމްރާނީ ވަސީލަތްތަކާއި ރައްކާތެރިކަން ލިބިގެންވާ ދީނީ ބިނާތައް ހަލާކުކުރުމުގައި ކާނީ ބައިވެރިވެފައިވެއެވެ.
އޭނާ ސިފައިންގެ ޚިދުމަތުގައި އުޅުނުއިރު "ގައްޒާގައި އެއްވެސް އާންމު ރައްޔިތަކު ނެތް" ކަމަށް ބުނެ ކޮށްފައިވާ އާންމު ބަޔާންތަކަށްވެސް މި ރިޕޯޓުގައި ރިއާޔަތްކޮށްފައިވެއެވެ.
އެ ޖަމިއްޔާއިން ފާހަގަކުރި ގޮތުގައި މި އަމަލުތަކަކީ ހަނގުރާމައިގެ ކުށްތަކަށް ވުމުގެ ފުރުސަތު އޮތް ކަންކަމެވެ. އަދި މިއީ އިންސާނިއްޔަތާ ހިލާފު ކުށްތަކާއި ނަސްލު ނައްތާލުމުގެ އަމަލުތަކެއްގެ ގޮތުގައި ބެލެވިދާނެ ކަންކަމެވެ. މިފަދަ މައްސަލަތައް އެހެން ގައުމުތަކުގައިވެސް ހުށަހަޅާފައިވާ ކަމަށާއި، އޭގެ ތެރޭގައި ޕެރޫގައި ކުރިއަށްދާ ނަސްލު ނައްތާލުމުގެ ތަހުގީގެއް ހިމެނޭ ކަމަށްވެސް އެ ޖަމިއްޔާއިން ބުންޏެވެ.
މީގެ އިތުރުން، އިސްރާއީލުގެ ކުރީގެ ސިފައިންގެ މީހެއް ކަމަށްވާ ގާއި ހޮޗްމަންއާ ދެކޮޅަށްވެސް މިދިޔަ ޖެނުއަރީ މަހު އެމެރިކާގެ ޖަސްޓިސް ޑިޕާޓްމަންޓަށް މައްސަލައެއް ހުށަހަޅާފައިވާ ކަމަށް އެ ފައުންޑޭޝަނުން ފާހަގަކުރިއެވެ. މިއީ ޣައްޒާގެ މައްސަލައިގައި ބައިނަލްއަގުވާމީ ފެންވަރުގައި ކުރިއަށްދާ ގާނޫނީ މަސައްކަތްތަކުގެ ބައެކެވެ.
