ޕާކިސްތާނުގެ އިންސާނީ ހައްގުތަކަށް މަސައްކަތްކުރާ ވަކީލުން ކަމަށްވާ އީމާން ޒައިނަބް މަޒާރީ ހާޒިރް އާއި ހާދީ އަލީ ޗައްތާގެ މައްޗަށް 17 އަހަރުގެ ޖަލު ހުކުމެއް އިއްވުމަކީ ފަހުގެ ތާރީޚެއްގައި ޕާކިސްތާނުގެ ޝަރުއީ ނިޒާމުން ނިންމި އެންމެ ޚިޔާލު ތަފާތު އެއް ނިންމުމެވެ. މި ހުކުމަކީ އެއްވެސް ކަހަލަ އަނިޔާވެރި އަމަލެއް ނުވަތަ މާލީ ކުށަކާ ގުޅިގެން ކުރި ހުކުމެއް ނޫނެވެ. މިއީ ދައުލަތުގެ މުއައްސަސާތަކާ ދެކޮޅު ސޯޝަލް މީޑިއާ ޕޯސްޓުތަކަކާ ގުޅިގެން އިއްވި ހުކުމެކެވެ.
ޕާކިސްތާނުގެ އިލެކްޓްރޯނިކް ކުށްތަކާ ގުޅޭ ޕެކާ ގާނޫގެ ދަށުން އިއްވި މި ހުކުމާއެކު، ހިޔާލުފާޅުކުރުމުގެ މިނިވަންކަން މިހާރު ވަނީ ޖިނާއީ ކުށަކަށް ވެފައެވެ. މަޒާރީ އާއި ޗައްތާގެ މައްޗަށް ސާބިތުވެފައި ވަނީ "ކުށަށް ހިތްވަރުދިނުން"، "ސައިބަރ ޓެރަރިޒަމް" އަދި "ދޮގު މައުލޫމާތު ފެތުރުން" ފަދަ ދައުވާތަކެވެ. އިސްލާމްއާބާދުގެ ކޯޓަކުން ނިންމާފައިވަނީ އެކްސްގައި އެމީހުން ކުރި ޕޯސްޓުތަކަކީ މަނާކޮށްފައިވާ ޖަމާއަތްތަކުގެ ފިކުރާ އެއްގޮތް ޕޯސްޓުތަކެއް ކަމަށެވެ.
2016 ވަނަ އަހަރު ތައާރަފުކުރި ޕެކާ އަކީ ސައިބަރ ކުށްތަކާއި އޮންލައިން މަކަރާއި ހީލަތް ހުއްޓުވުމަށް ހެދި ގާނޫނެކެވެ. ނަމަވެސް، ޒަމާނާއެކު މި ގާނޫނުގެ ފުޅާ މާނަކުރުންތަކުގެ ބޭނުން ހިފައި، ދައުލަތުގެ ސިޔާސަތުތަކަށް ފާޑުކިޔާ ފަރާތްތަކާ ދެކޮޅަށް ޓެރަރިޒަމްގެ ދައުވާ އުފުލުމަށް ވަނީ މަގުފަހިވެފައެވެ. މި މައްސަލައިގައި ޕްރޮސެކިއުޓަރުން ވަކާލާތު ކުރީ ސަލާމަތީ ބާރުތަކުގެ އޮޕަރޭޝަންތަކަށް ފާޑުކިޔުމަކީ ޖިނާއީ ނިޔަތެއް އޮވެގެން ކުރާ ކަމެއް ކަމަށެވެ.
ކޯޓުގެ ހުކުމްގައި ބަޔާންކޮށްފައިވާ ގޮތުގައި، 2021 އާއި 2025 އާ ދެމެދު ކޮށްފައިވާ ޓުވީޓުތަކުން އެމީހުންނާއި މަނާކޮށްފައިވާ ޖަމާއަތްތަކާ ގުޅުން އޮތްކަން ހާމަވެއެވެ. ނަމަވެސް، ދިފާއީ ވަކީލުން ބުނަމުންދަނީ އެހެން ބައެއްގެ ޚިޔާލުތައް ރިޕޯސްޓު ކުރުމަކީ ނުވަތަ އެކްޓިވިސްޓުންނަށް ތާއީދު ކުރުމަކީ ޖިނާއީ ކުށެއް ނޫން ކަމަށެވެ. އިންސާނީ ހައްގުތަކަށް މަސައްކަތްކުރާ ޖަމާއަތްތަކުން ބުނާ ގޮތުގައި މި ހުކުމަކީ ބައިނަލްއަގުވާމީ މިންގަނޑުތަކާ ހިލާފަށް ދީފައިވާ ބޮޑު އަދަބެކެވެ.
އެމްނެސްޓީ އިންޓަނޭޝަނަލް ފަދަ ޖަމާއަތްތަކުން ވަނީ މި ޝަރީއަތް ކުރިއަށްދިޔަ ގޮތާ މެދު ސުވާލު އުފައްދާފައެވެ. އެ ޖަމާއަތުން ބުނި ގޮތުގައި ޝަރީއަތް ކުރިއަށް ގެންގޮސްފައިވަނީ އާދަޔާ ހިލާފު އަވަސް މިނެއްގައެވެ. އަދި ދައުވާ ލިބޭ ފަރާތްތަކަށް ހެކިންނާ ސުވާލުކުރުމަށާއި ދިފާއީ ހެކި ހުށަހެޅުމަށް އެކަށީގެންވާ ފުރުސަތެއް ދީފައި ނުވާކަން ފާހަގަކޮށްފައިވެއެވެ.
މަޒާރީ މިހާރު ތައްޔާރުވަމުންދަނީ މި ހުކުމް އިސްތިއުނާފު ކުރުމަށެވެ.
