ގްރޭޓަރ މެންޗެސްޓަރގެ މޭޔަރ އެންޑީ ބަރންހަމް، އިނގިރޭސިވިލާތުގެ ބޮޑުވަޒީރުކަމަށް ވަޑައިގެންފިނަމަ، އަވަސް ޢާންމު އިންތިޚާބެއް ބޭއްވުމަށް ދަނީ ވިސްނަވަމުން ކަމަށް ބުނެފިއެވެ. އިނގިރޭސި ލޭބަރ ޕާޓީގެ އިސް މަސްދަރުތަކާ ހަވާލާދީ ބުނެފައިވާ ގޮތުގައި، ބަރންހަމް އެންމެ ފުރަތަމަ ޖެހިވަޑައިގަންނަވާނީ އަންނަ މަހު މޭކަރފީލްޑް ދާއިރާގެ ބައި-އިލެކްޝަން ކާމިޔާބު ކުރައްވާށެވެ. މިއީ އިނގިރޭސިވިލާތުގެ ހައުސް އޮފް ކޮމަންސް އަށް އޭނާ އެނބުރި ވަޑައިގަތުމަށް އެޅޭނެ ފިޔަވަޅެކެވެ. އޭގެ ފަހުން ލޭބަރ ޕާޓީގެ ލީޑަރޝިޕަށް ވާދަކުރައްވައި، މިހާރުގެ ބޮޑުވަޒީރު ކިއަރ ސްޓާރމަރ މަގާމުން ދުރުކުރެއްވުމަށް އޭނާ މަސައްކަތްކުރައްވާނެއެވެ. ބަރންހަމް ދެކެވަޑައިގަންނަވާ ގޮތުގައި ނައިޖެލް ފަރާޖްގެ ރިފޯމް ޔޫކޭ ޕާޓީ ބަލިކުރެއްވުމުގެ އެންމެ ބޮޑު ގާބިލުކަމެއް ހުރީ އޭނާގެ ކިބައިގައެވެ.
އުތުރު އިންގްލެންޑްގެ ލޯކަލް ކައުންސިލުން މި މަހުގެ ކުރީކޮޅު އިޢުލާނުކޮށްފައިވާ ގޮތުގައި ޕާލަމެންޓް ގޮނޑިއަށް ވޯޓުލުން އޮންނާނީ އަންނަ ޖޫން މަހުގެ 18 ވަނަ ދުވަހުއެވެ.
ރިޕޯޓުތައް ބުނާގޮތުން މޭކަރފީލްޑް ދާއިރާގެ ބައި-އިލެކްޝަން ކާމިޔާބުކުރާނެ ކަމަށް އެންމެ ބޮޑަށް ބެލެވެނީ ބަރންހަމް އެވެ. މިކަމުގެ ސަބަބުން ހައުސް އޮފް ކޮމަންސް އަށް އޭނާ އެނބުރި ވަޑައިގަތުމަށް މަގުފަހިވެގެންދާނެއެވެ. އަދި އޭގެ ފަހުން ލޭބަރ ޕާޓީގެ ލީޑަރޝިޕް ރޭހުގައި ވާދަކުރައްވައި، ސަރުކާރުގެ އެންމެ އިސް މަގާމަށް ވަޑައިގަތުމަށް މަސައްކަތް ކުރައްވާނެއެވެ.
މީޑިއާގައި އިތުރަށް ބުނެފައިވަނީ، ބަރންހަމްއާ ގާތް ބައެއް ފަރާތްތަކުން ދެކޭގޮތުގައި ޕާޓީގެ މަގުބޫލުކަން އިތުރުވެއްޖެނަމަ، އޭނާގެ ފުޅާ ސިޔާސީ އެޖެންޑާއެއް ތަންފީޒުކުރުމަށްޓަކައި ރައްޔިތުންގެ ރުހުން ހޯދުމަށް އަވަސް ޢާންމު އިންތިޚާބަކަށް ގޮވާލުމުގެ ފުރުސަތު ލިބިގެންދާނެއެވެ. ނަމަވެސް، ޕާޓީގެ އެތެރޭގެ އެހެން ފަރާތްތަކުން އިންޒާރުދޭ ގޮތުގައި، ލޭބަރ ޕާޓީގެ މެމްބަރުން މި ފިޔަވަޅާ އެހެން މެމްބަރުން ދެކޮޅު ހެދުމަކީ އެކަށީގެންވާ ކަމެކެވެ. އެއީ މެޖޯރިޓީ ލިބުނު ނަމަވެސް، އެމީހުންގެ ޕާލަމެންޓް ގޮނޑިތައް ގެއްލިދާނެކަމުގެ ބިރަށެވެ.
ލޭބަރ ޕާޓީގެ އިސް މަސްދަރަކުން ބުނިގޮތުގައި އަވަސް އިންތިޚާބެއް ބޭއްވުމާ ގުޅޭގޮތުން ޕާޓީގެ އެތެރޭގައި ދަނީ މަޝްވަރާތައް ކުރެވެމުންނެވެ.
ނޫހުން ފާހަގަކުރާ ގޮތުގައި ބަރންހަމް ވެރިކަމަށް ވަޑައިގެންފިނަމަ، ދައުލަތުގެ ދައުރު ފުޅާކުރުމަށް ގޮވާލައްވައި، އަދި ޕާޓީގެ އާދަކާދައިގެ މަތިން މަސައްކަތްތެރިންގެ ބިންގަލާ ޕާޓީ އަލުން ގުޅުވާލައި، ލޭބަރ ޕާޓީގެ މިސްރާބު އަލުން ބައްޓަންކުރުމަށް އޭނާ ގަސްތުކުރައްވައެވެ.
މި ރިޕޯޓުގައިވާ ގޮތުން ބަރންހަމްގެ ޓީމުން ވަނީ އޭނާގެ ވެރިކަމުގެ ދައުރަށް ފުރަތަމަ މަރުހަލާގެ ރޭވުންތައް ރާވަން ފަށާފައެވެ. މިގޮތުން، މިހާރުގެ ހޯމް ސެކްރެޓަރީ ޝަބާނާ މަޙްމޫދު މާލީ ވަޒީރު ކަމަށް އައްޔަންކުރުން ހިމެނެއެވެ.
މިހާރުގެ ބޮޑުވަޒީރު ކިއަރ ސްޓާރމަރގެ ކުރީގެ މުޝީރު، ސޫ ގްރޭ ގެ ފަރާތުން ބަރންހަމް ގެންދަވަނީ ލަފާ ހޯއްދަވަމުންނެވެ. ސޫ ގްރޭ މަގާމާ ހަވާލުވިތާ މަދު މަސްތަކެއްގެ ތެރޭގައި އޭނާ ވަނީ މަގާމުން ވަކިކޮށްފައެވެ.
އަނެއްކޮޅުން، ޝަބާނާ މަޙްމޫދާ ގާތް މަސްދަރަކުން ވަނީ ކިއަރ ސްޓާރމަރއާ ދެކޮޅަށް އެއްވެސް ސިޔާސީ އެއްބަސްވުމެއް ވެފައިވާކަން ދޮގުކޮށްފައެވެ. އަދި އޭނާ މިހާރު މުޅިންވެސް ސަމާލުކަން ދެއްވަނީ ހޯމް ސެކްރެޓަރީގެ ހައިސިއްޔަތުން އަދާކުރަންޖެހޭ މަސްއޫލިއްޔަތުތަކަށް ކަމަށް ކަށަވަރުކޮށްދީ، އެ ދެކެވޭ ވާހަކަތަކަކީ "ސައްހަ ނޫން" ވާހަކަތަކެއް ކަމަށް ވަނީ ސިފަކޮށްފައެވެ.
