އެމެރިކާގެ އުތުރު ސަރަހައްދުގެ އިރުމަތީގެ މަތީ ވައިގެ ފަށަލައިގެ ތެރެއަށް ގިނިހިލައެއް ވަންނަނިކޮށް ވަނީ ގޮވާފައެވެ. މީގެ ސަބަބުން އެތައް ސްޓޭޓަކަށް ބާރުގަދަ އަޑެއް އިވި، ބައެއް ގޭގެއަށް ގުޑުން އަރާފައިވާކަމަށް ރިޕޯޓުކޮށްފައި ވެއެވެ.
މި ހާދިސާގެ ސަބަބުން އެ ސަރަހައްދުގެ ރަށްވެހިންގެ މެދުގައި ބިރުވެރިކަމާއި ކަންބޮޑުވުން އުފެދުނެވެ. ނަމަވެސް، "ނާސާ" އެޖެންސީން ކަށަވަރުކޮށްދީފައިވާ ގޮތުގައި، އެ ގިނިހިލައިގެ އެއްވެސް ބައެއް ބިމުގެ ސަތަހައަށް ވެއްޓުމުގެ ކުރިން ވަނީ އަލިފާން ބޯޅައެއްގެ ސިފަޔަށް ބަދަލުވެ މުޅިން ކުދިކުދިވެގެން ގޮސްފައެވެ.
ސައިންޓިފިކް ރިޕޯޓްތަކުން އެނގޭ ގޮތުގައި މި ގިނިހިލަ އުޅުނީ ބިމުން ފެށިގެން 64 ކިލޯމީޓަރު މަތީގައެވެ. އަދި، ބިމާ ދިމާއަށް ގަޑިއަކު 120،000 ކިލޯމީޓަރުގެ ބާރު މިނުގައި ދަތުރުކުރަނިކުރަމުން ދިޔައެވެ.
މި ގޮވުމުން އުފެދުނު ހަކަތަ 300 ޓަނުގެ ޓީ.އެން.ޓީގެ ގޮވބާ މާއްދާއާ އެއްވަރެވެ. ނަމަވެސް މާއްދީ މި ހިސާބުތަކުގެ ބޭރުން، މުއުމިނެއްގެ ލޮލަށް ފެންނާނީ މީގެ ފަހަތުގައިވާ ﷲ ތަޢާލާގެ ކުޅަދުންވަންތަކަމާއި ޙިކުމަތްތެރިކަމެވެ.
-
ވައިގެ ފަށަލަ.. اﷲގެ ރަޙުމަތުން ރައްކާތެރިކުރެވިފައިވާ ފުރާޅެއް
މި ހާދިސާއިން އެނގެނީ އަޅުގަނޑުމެންގެ ބިމާއި ދިރިއުޅުން ރައްކާތެރިކުރުމަށް ﷲ ލައްވާފައިވާ "އިލާހީ އައްޑަނަ" އެވެ. ސައިންސް ބުނާގޮތުން ބިމަށް މީގެ ނުރައްކާ ނުފޯރީ ދުނިޔޭގެ ރައްކަލަކަށް ލެވިފައިވާ ފަށަލައިގެ ސަބަބުންނެވެ. ކީރިތި ޤުރުއާނުން މި މާއްދީ ތަރުޖަމާ މަތިވެރި ތައުޙީދީ މަޤާމަކަށް އުފުލައިދެއެވެ. ﷲ ވަޙީކުރެއްވިއެވެ.
وَجَعَلْنَا السَّمَاءَ سَقْفًا مَّحْفُوظًا ۖ وَهُمْ عَنْ آيَاتِهَا مُعْرِضُونَ ﴿32﴾
އަދި ރައްކާތެރިކުރައްވާފައިވާ ފުރާޅެއްކަމުގައި، ތިމަންރަސްކަލާނގެ އުޑު ލެއްވީމެވެ. އަދި އެއުރެންނަކީ އެތާނގެ (އިރުހަނދާއި، ތަރިތައްފަދަ) ހެކިތަކަށް ފުރަގަސްދޭ ބަޔެކެވެ. الأنبياء
މިވައިގެ ފަށަލައާއި އޭގެ ރައްކާތެރިކަމުގެ ނިޒާމާއި އެ ފުރާޅު ނެތްނަމަ މިފަދަ ނުރައްކާތަކުން ބިން ސުންނާފަތިވީހެވެ. ﷲ ތަޢާލާ ވަޙީކުރައްވައެވެ.
أَلَمْ تَرَ أَنَّ اللَّهَ سَخَّرَ لَكُم مَّا فِي الْأَرْضِ وَالْفُلْكَ تَجْرِي فِي الْبَحْرِ بِأَمْرِهِ وَيُمْسِكُ السَّمَاءَ أَن تَقَعَ عَلَى الْأَرْضِ إِلَّا بِإِذْنِهِ ۗ إِنَّ اللَّهَ بِالنَّاسِ لَرَءُوفٌ رَّحِيمٌ ﴿65﴾
ހަމަކަށަވަރުން، ﷲ، ބިމުގައިވާހާތަކެއްޗެއް ތިޔަބައިމީހުންނަށްޓަކައި ޚިދުމަތްތެރިކުރެއްވިކަމާއި، ކަނޑުގައި ނާފަހަރު ދުވަނީ، އެކަލާނގެ އަމުރުފުޅާ އެކުގައިކަމާއި، އެކަލާނގެ އިޛުނަފުޅާލައިގެން މެނުވީ، ބިމުގެ މައްޗަށް އުޑު ނުވެއްޓޭގޮތުން ހިފަހައްޓަވާކަން، ތިބާއަށް ނޭނގެނީ ހެއްޔެވެ؟ ހަމަކަށަވަރުން، ﷲއީ، މީސްތަކުންނަށް ނުހަނު އޯގާވަންތަ، ރަޙީމްވަންތަ ރަސްކަލާނގެކަން ކަށަވަރެވެ. الحج
-
ކާއިނާތުގައިވާ އިލާހީ ސުންނަތްތައް
މާއްދިއްޔަތަށް ބަރޯސާވާ މީހުން މަސައްކަތްކުރަނީ މިފަދަ ހާދިސާތައް ޚާލިޤުވަންތަ ﷲ ވަކިކޮށް، އެއީ އިއްތިފާޤުން ހިނގާ ކަންކަން ކަމަށް ހަދާށެވެ. ނަމަވެސް އިސްލާމީ ނަޒަރިއްޔާތުގައި މިއީ ﷲގެ ކުޅަދުންވަންތަކަމުގެ ހެކިތަކެވެ.
- ކާއިނާތުގެ ފުރިހަމަކަން: މި ތަކެތި ދަތުރުކުރަނީ ވަކި ހިސާބަކުންނެވެ. الشَّمْسُ وَالْقَمَرُ بِحُسْبَانٍ ﴿5﴾
އިރާއި، ހަނދު، ބަރާބަރު ހިސާބެއްގެ މަތިންހިނގައެވެ. الرحمن - ބާޠިލު ކަމެއް ނެތުން:
إِنَّ فِي خَلْقِ السَّمَاوَاتِ وَالْأَرْضِ وَاخْتِلَافِ اللَّيْلِ وَالنَّهَارِ لَآيَاتٍ لِّأُولِي الْأَلْبَابِ ﴿190﴾
ހަމަކަށަވަރުން، އުޑުތަކާއި ބިން ހެއްދެވުމުގައްޔާއި ރޭދުވާ ތަފާތުވުމުގައި، ބުއްދީގެ އަހުލުވެރިންނަށް ކަށަވަރުވެގެންހުރި ހެކިތަކެއްވެއެވެ. آل عمران
-
ކާއިނާތީ ހާދިސާތަކުގައި ނަބަވީ އިރުޝާދު (ބިރުގަތުމުގެ ބަދަލުގައި އީމާންތެރިކަން އިތުރުވުން)
ރަސޫލާ (ޞައްލަ ﷲ ޢަލައިހި ވަސައްލަމަ) މިފަދަ ބޮޑެތި ހާދިސާތަކުން ޣާފިލުވެވަޑައެއް ނުގަންނަވައެވެ. ވައިގަދަވުމުން ނުވަތަ އިރާއި ހަނދު ކޭތަ ހިފުމުން އެކަލޭގެފާނުގެ މޫނުފުޅުގެ ކުލަ ބަދަލުވެ، ނަމާދަށާއި ދުޢާއަށް އަވަސްވެވަޑައިގަންނަވައެވެ.
ޞަޙީޙައިނިގައި އަބޫ މޫސާ އަލްއަޝްޢަރީގެ ކިބައިން ރިވާވެގެންވެއެވެ.
خَسَفَتِ الشَّمسُ، فقامَ النَّبيُّ صلَّى اللهُ عليه وسلَّم فزِعًا، يَخشى أن تَكونَ السَّاعةُ، فأتى المَسجِدَ، فصَلَّى بأطولِ قيامٍ ورُكوعٍ وسُجودٍ رَأيتُه قَطُّ يَفعَلُه، وقال: هذه الآياتُ التي يُرسِلُ اللهُ، لا تَكونُ لمَوتِ أحَدٍ ولا لحَياتِه، ولَكِن يُخَوِّفُ اللهُ به عِبادَه، فإذا رَأيتُم شيئًا مِن ذلك فافزَعوا إلى ذِكرِه ودُعائِه واستِغفارِه.
"އިރު ކޭތަހިފިއެވެ. ފަހެ، ނަބިއްޔާ ﷺ ޤިޔާމަތް ދެންމެ ދެންމެ ވެދާނެކަމުގެ ބިރުވެތިކަމާއެކު (ކަންބޮޑުވެވަޑައިގެން) ކުއްލިއަކަށް ތެދުވެވަޑައިގަތެވެ. އެއަށްފަހު މިސްކިތަށް ވަޑައިގެން، ތިމަންބޭކަލަކަށް އެކަލޭގެފާނު ދުވަހަކުވެސް ނަމާދު ކުރައްވަނިކޮށް ފެނިވަޑައިނުގަންނަވާ ފަދަ އެންމެ ދިގު ޤިޔާމަކާއި، ރުކޫޢަކާއި އަދި ސުޖޫދަކާއެކު ނަމާދު ކުރެއްވިއެވެ.
އަދި ޙަދީޘްކުރެއްވިއެވެ:
'މިއީ ﷲ ފޮނުއްވާ ހެކިތަކެކެވެ. އެއީ އެއްވެސް މީހެއްގެ މަރުވުމަކަށް ނުވަތަ ދިރިހުރުމަކަށް ހިނގާ ކަންކަމެއް ނޫނެވެ. ނަމަވެސް ﷲ އެކަލާނގެ އަޅުންނަށް ބِރުދައްކަވަނީއެވެ. ފަހެ، ތިޔަބައިމީހުންނަށް އޭގެތެރެއިން ކަމެއް ފެނިއްޖެނަމަ، ﷲ ހަނދުމަކޮށް ޛިކުރުކުރުމަށާއި، ދުޢާކުރުމަށާއި، އަދި އިސްތިޣްފާރު ކުރުމަށް އަވަސްވެގަންނާށެވެ." أخرجه البخاري، ومسلم
އެމެރިކާ މަތިން ގިނަ ހިލަ ގޮވި ހާދިސާއަކީ މި ޒަމާނުގެ އިންސާނާއަށް އޮތް އިންޒާރެކެވެ. ދުނިޔޭގެ މާއްދީ ސައިންސާއި ކުރިއެރުމުން ބިމުގެ ބާރު ލިބިއްޖެކަމަށް ހީކުރި ނަމަވެސް، އުޑުމަތިން އައި އެންމެ ހިލަގަނޑަކުން މުޅި ސަރަހައްދެއް ސުންނާފަތިކޮށްލެވިދާނެކަން މިއިން އެނގެއެވެ.
މުޢުޖިޒާތްތަކަށް އިންކާރު ކުރާ ވާހަކައަށް އިޝާރާތް ކުރައްވަމުން ކީރިތި ޤުރުއާނުގައި ﷲ ތަޢާލާ ވަޙީކުރައްވައެވެ.
وَمَا مَنَعَنَا أَن نُّرْسِلَ بِالْآيَاتِ إِلَّا أَن كَذَّبَ بِهَا الْأَوَّلُونَ ۚ وَآتَيْنَا ثَمُودَ النَّاقَةَ مُبْصِرَةً فَظَلَمُوا بِهَا ۚ وَمَا نُرْسِلُ بِالْآيَاتِ إِلَّا تَخْوِيفًا ﴿59﴾
އިހުއުޅުނު މީހުން މުޢުޖިޒާތައް ދޮގުކުޅަކަން މެނުވީ، ތިމަންރަސްކަލާނގެ މުޢުޖިޒާތައް ފޮނުއްވުން މަނާކުރާކަމެއް ނެތެވެ. އަދި ފާޅުވެގެންވާ މުޢުޖިޒާއެއްގެ ގޮތުގައި، ޘަމޫދު ބާގައި މީހުންނަށް ޖަމަލު ދެއްވީމެވެ. ދެން އެއުރެން އެއާމެދުގައި އަނިޔާވެރިވެގަތޫއެވެ. އަދި އިންޛާރެއް ކަމުގައި މެނުވީ ތިމަންރަސްކަލާނގެ މުޢުޖިޒާތައް ނުފޮނުއްވަމެވެ. الإسراء
اللهم اجعلنا ممن يتفكرون في خلقك، ويعظمون آياتك، ويخافون وعيدك، وزدنا بك إيمانًا، ولهيبتك إذعانًا، والحمد لله رب العالمين.
