ސްކޮޓްލޭންޑުގެ ވެރިރަށް އެޑިންބަރާގައި ފަސް މީހަކު ޒަޚަމްވާ ގޮތަށް ހިންގި ހަމަލާތަކަކާ ގުޅިގެން 36 އަހަރުގެ ފިރިހެނެއްގެ މައްޗަށް ދައުވާ އުފުލައިފިއެވެ. މި ހަމަލާތަކަކީ މުސްލިމުންނާ ދެކޮޅަށް ހިންގި ނަފްރަތުގެ އަމަލުތަކެއް ކަމަށް އިނގިރޭސިވިލާތުގެ ބޮޑުވަޒީރު ކިއާ ސްޓާމާ ވަނީ ސިފަކުރައްވާފައެވެ.
މިދިޔަ ހުކުރު ދުވަހު ހިންގި މި ހަމަލާތަކާ ގުޅިގެން ހައްޔަރުކުރި ފިރިހެން މީހާއަކީ ސްކޮޓްލޭންޑުގެ ރައްޔިތެއް ކަމަށާއި، މިހާރު އާންމުންނަށް އިތުރު ނުރައްކަލެއް ނެތް ކަމަށް ފުލުހުން ބުނެފައިވެއެވެ. އިންޓަނެޓުގައި އާންމުވި ވީޑިއޯތަކުން ފެންނަ ގޮތުގައި، މި މީހާ ވަނީ ހަތިޔާރެއް ހިފައިގެން އެޑިންބަރާގެ މަގުތަކުގައި ހަރަކާތްތެރިވެފައެވެ.
މި ހަމަލާތަކުގައި ޒަޚަމްވި ފަސް މީހުންނަކީ 22 އަހަރާއި 39 އަހަރާ ދެމެދުގެ ފިރިހެނުންނެވެ. އޭގެ ތެރެއިން ތިން މީހަކަށް ހޮސްޕިޓަލުގައި ފަރުވާދީފައިވާއިރު، އެއްވެސް މީހެއްގެ ފުރާނައަށް ނުރައްކަލެއް ނެތް ކަމަށް ފުލުހުން ކަށަވަރުކޮށްދެއެވެ. މި މައްސަލަ ޓެރަރިޒަމާ ދެކޮޅަށް މަސައްކަތްކުރާ ޔުނިޓުން ދަނީ ތަހުގީގު ކުރަމުންނެވެ.
މުސްލިމް ޖަމިއްޔާތަކުން ބުނާ ގޮތުގައި މި ހަމަލާތަކުގެ ޝިކާރައަކަށްވި މީހުންގެ ތެރޭގައި މުސްލިމުން ހިމެނެއެވެ. އަދި ހައްޔަރުކުރި މީހާ ހަމަލާދިން ވަގުތު މުސްލިމުންނާ ދެކޮޅަށް ނަފްރަތުގެ ބަސްތައް ގޮވަމުން ދިޔަކަން ވެސް ފާހަގަކުރެވެއެވެ. މިއީ މުސްލިމުންނާ ދެކޮޅަށް ހިންގާ ނަފްރަތުގެ އަމަލެއްގެ ގޮތުގައި ބަލައިދިނުމަށް އެ ޖަމިއްޔާތަކުން ވަނީ ފުލުހުންގެ ކިބައިން އެދިފައެވެ.
އިނގިރޭސިވިލާތުގެ ބޮޑުވަޒީރު ވިދާޅުވީ، މުސްލިމުންނާ ދެކޮޅަށް ހިންގާ މިފަދަ ނަފްރަތުގެ އަމަލުތަކަށް އެއްވެސް ވަރަކަށް ޖާގަ ނުދެއްވާނެ ކަމަށާއި ކުށްވެރިޔާއަށް ގާނޫނީ ފިޔަވަޅުތައް އެންމެ ހަރުކަށިކޮށް އަޅާނެ ކަމަށެވެ. ސްކޮޓްލޭންޑުގެ ފުރަތަމަ ވަޒީރު ޖޯން ސްވީނީ ވެސް މި ހަމަލާތައް ކުށްވެރިކުރައްވައި ވިދާޅުވީ، އަނިޔާވެރިކަމަށާއި ނަސްލީ ތަފާތުކުރުމަށް އެ ގައުމުގައި ޖާގައެއް ނެތް ކަމަށެވެ.
ފަހަކަށް އައިސް އިނގިރޭސިވިލާތުގެ އެކި ސަރަހައްދުތަކުގައި ހިނގަމުންދާ ނަސްލީ ހަމަނުޖެހުންތަކާއި މުސްލިމުންނާ ދެކޮޅަށް ދެވޭ ހަމަލާތަކުގެ ސަބަބުން މުސްލިމުންގެ މެދުގައި ބިރުވެރިކަން ވަނީ އިތުރުވެފައެވެ. މި ހަމަލާތައް ފެށިފައިވަނީ މިސްކިތެއްގެ ކައިރިން ކަމަށް ބީބީސީން ރިޕޯޓްކޮށްފައިވެއެވެ.
