އިނގިރޭސި ރައްޔިތުން ޔޫރަޕިއަން ޔޫނިއަން (އީޔޫ) އިން ވަކިވުމަށް 52% ގެ އަޣުލަބިއްޔަތަކުން ޖޫން 23، 2016 ގައި ވޯޓު ދިންތާ 10 އަހަރު ފުރިފައިވާއިރު، މި މުނާސަބާއާއެކު އިނގިރޭސިވިލާތުގެ ސިޔާސީ މަސްރަހުގައި ބޮޑު ބަހުސެއް ވަނީ އުފެދިފައެވެ. ބްރެކްސިޓްގެ ސަބަބުން ގައުމު ހީނަރުވެ، މަގު އޮޅިފައިވާ ކަމަށް ގިނަ ބަޔަކު ދެކޭއިރު، މި ކަމުގެ ސިޔާސީ ނަތީޖާއަކީ އަދިވެސް އޮޅުންބޮޅުން ބޮޑު ކަމެކެވެ.
ޔޫގޮވް އިން އާންމުކޮށްފައިވާ ޚިޔާލު ހޯދުމުގެ ނަތީޖާއިން ދައްކާ ގޮތުގައި، 56% އިނގިރޭސީން މިހާރު ބޭނުންވަނީ އަލުން އީޔޫއާ ގުޅޭށެވެ. އަދި 35% މީހުން އެކަމާ ދެކޮޅު ހަދައެވެ. މިއަދު އަލުން ވޯޓެއް ނަގައިފިނަމަ، 60% މީހުން ވޯޓު ދޭނީ އީޔޫގައި މަޑުކުރުމަށެވެ. ސިޔާސީ މާހިރުން ބުނާ ގޮތުގައި، މި ބަދަލު އައީ ޒުވާނުންގެ ޖީލުގެ ވިސްނުން ތަފާތުވުމާއި، ކުރިން ބްރެކްސިޓަށް ވޯޓު ދިން ބައެއް މީހުންގެ ވިސްނުން ބަދަލުވުމުންނެވެ.
މި ހިތްހަމަނުޖެހުން އުފެދުނީ ކުއްލިއަކަށް ނޫނެވެ. 2021 ވަނަ އަހަރު ލިބުނު މުދަލާއި ތެލުގެ ދަތިކަމާއި، 2022 ވަނަ އަހަރު ލިޒް ޓްރަސްގެ ސަރުކާރުން ހުށަހެޅި ބަޖެޓުގެ ސަބަބުން އިގުތިސާދަށް ލިބުނު ގެއްލުންތަކަކީ ބްރެކްސިޓްގެ ފެއިލިއަރެއް ކަމަށް ގިނަ ބަޔަކު ދެކޭ ސަބަބުތަކެވެ. މިދިޔަ އޭޕްރީލް މަހު ނެގި އިބްސޯސް ގެ ވޯޓަކުން ދައްކާ ގޮތުގައި 51% މީހުން ބްރެކްސިޓް ސިފަކުރަނީ ފެއިލްވެފައިވާ ޕްރޮޖެކްޓެއްގެ ގޮތުގައެވެ. މިކަމަކީ ބޮރުިން ޖޯންސަން އިނގިރޭސިންނަށް އޮޅުވާލި އޮޅުވާލުމެއް ކަމަށްވެސް މީހުން ބުނެއެވެ.
ރައްޔިތުން މާޔޫސްވި ނަމަވެސް، މިއީ އައު ވޯޓަކަށް ދާންޖެހޭ ސަބަބެއް ކަމަކަށް 46% މީހުން ނުދެކެއެވެ. އެ މީހުން ގަބޫލުކުރާ ގޮތުގައި ބްރެކްސިޓް ފެއިލްވީ އެކަން ތަންފީޒުކުރި ގޮތުންނެވެ. އަދި އަލުން އީޔޫއާ ގުޅިއްޖެނަމަ، ކުރިން ލިބުނު އިނާޔަތްތައް ނުލިބޭނެތީ، ސަރުކާރުތައް މިހާރު ގެންގުޅެނީ ވަރަށް ވިސްނުންތެރި، ބްރަސަލްސްއާ އެކު ގުޅުންތައް "ރީސެޓް" ކުރުމުގެ ސިޔާސަތެކެވެ.
މާލީ ގޮތުން ބަލާއިރު، 2016 ގައި ވޯޓުގެ ނަތީޖާ އިއުލާން ކުރުމާއެކު ބްރިޓިޝް ޕައުންޑްގެ އަގު 12% ވެއްޓިގެން ދިޔައެވެ. ލިޒް ޓްރަސްގެ ވެރިކަމުގައި އަގު އެންމެ ދަށަށް ވެއްޓުނު ނަމަވެސް، 2026 ވަނަ އަހަރާ ހަމައަށް އައިއިރު ޕައުންޑްގެ އަގު ވަނީ ރަނގަޅުވެފައެވެ. ނަމަވެސް، ދުނިޔޭގެ ވިޔަފާރީގެ މުއާމަލާތްތަކުގައި ޕައުންޑްގެ ހިއްސާ ވަނީ 6.5% އިން 5% އަށް ދަށްވެފައެވެ. މި ހުރިހާ ކަމަކާއެކު ލަންޑަންގެ މާލީ މަރުކަޒު އަދިވެސް ދުނިޔޭގެ ފެންވަރުގައި ކުރީގައި އޮތް ނަމަވެސް، ބްރެކްސިޓްގެ ސަބަބުން އިނގިރޭސިވިލާތަށް ކުރިމަތިވި ހީނަރުކަން ފިލައިގެން ދިއުމަށް އަދި ދުވަސްތަކެއް ނަގާނެކަން ކަށަވަރެވެ.
