ރާއްޖޭގެ ތާރީޚުގައި ފުރަތަމަ ފަހަރަށް ޤައުމީ ފެންވަރުގައި "ގަރލް ގައިޑް ދުވަސް" ފާހަގަކުރުމަށް ބޭއްވި ރަސްމިއްޔާތު، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއާއި އެމަނިކުފާނުގެ އަނބިކަނބަލުން، ސާޖިދާ މުޙައްމަދު ޝަރަފްވެރިކޮށްދެއްވައިފިއެވެ. މި ރަސްމިއްޔާތަކީ ރާއްޖޭގައި ގަރލް ގައިޑް ޚިދުމަތަށް 75 އަހަރު ފުރުން ފާހަގަކުރުމުގެ ގޮތުން ބޭއްވުނު ޚާއްސަ ހަރަކާތެކެވެ.
މި ރަސްމިއްޔާތުގައި ވާހަކަފުޅު ދައްކަވަމުން، ޗީފް ގައިޑްގެ މަޤާމުގައި ހުންނެވި ސާޖިދާ މުޙައްމަދު ވިދާޅުވީ، މިއީ ގަރލް ގައިޑް ހަރަކާތުގެ އަގުވަޒަންކޮށް، ސަރުކާރުން ރަސްމީކޮށް މި ދުވަސް ފާހަގަކުރަން ފެށި ތާރީޚީ ދުވަހެއް ކަމަށެވެ.
"ޤައުމު ބިނާކުރުމަކީ މީހުން ބިނާކުރުން. އަންހެނުންނާއި ފިރިހެނުން ހަމަހަމަކޮށް ބިނާކުރުމުގައި ގަރލް ގައިޑް ހަރަކާތުން ކުރަނީ ވަރަށް އަގުހުރި މަސައްކަތެއް،" އެކަމަނާ ފާހަގަކުރެއްވިއެވެ.
ރައީސުލްޖުމްހޫރިއްޔާ ޑރ. މުޢިއްޒު ވަނީ އޭޝިއާ ޕެސިފިކް ރީޖަން އޮފް ވޯލްޑް އެސޯސިއޭޝަން އޮފް ގަރލްގައިޑްސް އެންޑް ގަރލް ސްކައުޓްސް (ވެގްސް) އިން ދޭ ޚާއްސަ އެވޯޑުތަކެއް 14 ގައިޑަރަކާ ހަވާލުކޮށްދެއްވާފައެވެ. މީގެ އިތުރުން، މި ރަސްމިއްޔާތުގައި "ކޮމިއުނިޓީ ސަރވިސް ޓޫލް ކިޓް" އިފްތިތާޙްކޮށްދެއްވުމާއި، ގައިޑުންނަށް ބެޖާއި ވޮރަންޓް ހަވާލުކުރުން ވެސް ކުރިއަށް ދިޔައެވެ.
1951 ވަނަ އަހަރު ރާއްޖެއަށް ތައާރަފްވި ގަރލް ގައިޑް ހަރަކާތް، މިއަދު ރާއްޖޭގެ 90 އަށްވުރެ ގިނަ ރަށަށް ފުޅާވެ، 14،000 އަށްވުރެ ގިނަ މެންބަރުން މި ހަރަކާތުގައި ހަރަކާތްތެރިވަމުން އާދެއެވެ.
