މޫސުމަށް އަންނަ ބަދަލުތަކާ ބެހޭ އދ.ގެ މުޢާހަދާގެ 31 ވަނަ ކޮންފަރެންސް އޮފް ދަ ޕާޓީސް (ކޮޕް31) ގައި، ކުދި ޖަޒީރާ ޤައުމުތަކުގެ ތަރައްޤީގެ މިސްރާބު އަމިއްލައަށް ކަނޑައެޅުމުގެ ފުރިހަމަ ޙައްޤު ލިބިދޭންޖެހޭނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވެއްޖެއެވެ.
ތުރުކީވިލާތުގެ އަންތާލިޔާގައި މިހާރު ކުރިއަށްދާ މި ސަމިޓުގެ މަތީ ފަންތީގެ ޖަލްސާތަކުގައި ވާހަކަފުޅުދައްކަވަމުން ރައީސް ވިދާޅުވީ، ކުދި ޖަޒީރާ ޤައުމުތަކަށް މިހާރު ބޭނުންވަނީ ހަމްދަރުދީއެއް ނޫން ކަމަށާއި، ބައިނަލްއަޤުވާމީ މުޢާހަދާތަކުގެ ދަށުން ވެފައިވާ ވަޢުދުތައް ފުއްދުމަށް އަޅަންޖެހޭ ހަރުދަނާ ފިޔަވަޅުތަކާއި އިންސާފު ކަމަށެވެ. މީގެ އިތުރުން، މޫސުމީ މާލީ އެހީތެރިކަން ފޯރުކޮށްދިނުމަށް މުއްސަނދި ޤައުމުތަކުން ވެފައިވާ ވަޢުދުތައް ވީ އެންމެ އަވަހަކަށް ފުއްދުމަށާއި، ބައިނަލްއަޤުވާމީ މާލީ އޮނިގަނޑުތަކުގެ ރައްކާތެރިކަން ހަރުދަނާކޮށް، ކުދި ޤައުމުތަކުގެ ނާޒުކު ޙާލަތަށް ރިޢާޔަތްކުރުމުގެ ގޮތުން އެ އޮނިގަނޑުތައް ޒަމާނީ ފެންވަރަށް އިޞްލާޙުކުރުމަށް އެމަނިކުފާނު ވަނީ ގޮވާލައްވާފެވެ.
މި ސަމިޓުގެ ހަވާސާގައި، ތުރުކީގެ ރައީސްގެ އަނބިކަނބަލުން އާމިނާ އުރުދުޣާން އިންތިޒާމުކުރެއްވި "ހައި-ލެވެލް މީޓިންގ އޮފް ދަ ގްލޯބަލް ޒީރޯ ވޭސްޓް އެލަޔަންސް" ގައި ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދު ބައިވެރިވެވަޑައިގެން ވާހަކަފުޅުދެއްކެވިއެވެ. އެކަމަނާ ފާހަގަކުރެއްވި ގޮތުގައި، ކަނޑުގެ މާޙައުލު ޙިމާޔަތްކުރުމަށްޓަކައި އުފެއްދުންތެރިންގެ ޒިންމާ އިތުރުކުރަންޖެހޭއިރު، ކުނި ނައްތާލުމާބެހޭ ޤައުމުތަކުގެ ޤާނޫނަށް ގެނައި އިޞްލާޙުތަކުގެ ދަށުން ޤަވާޢިދާ ޚިލާފަށް ކުނި އެތެރެކުރުން ރާއްޖެއިން ވަނީ މަނާކޮށްފައެވެ. އަދި އުފެއްދުންތެރިންގެ ޒިންމާއަކީ މުދާ ވިއްކުމާ ހަމައިން ނިމޭ ކަމަކަށް ވެގެންނުވާނެ ކަމަށްވެސް އެކަމަނާ ވިދާޅުވިއެވެ. އަދި ތިމާވެށި ރައްކާތެރިކުރުމަށް ރާއްޖެއިން އަޅަމުންދާ ޤާނޫނީ ފިޔަވަޅުތަކުގެ ތެރެއިން، މިދިޔަ އޮގަސްޓްމަހު ރައީސުލްޖުމްހޫރިއްޔާ ތަޞްދީޤުކުރެއްވި ކުނި ނައްތާލުމާބެހޭ ޤާނޫނަށް ގެނެސްފައިވާ އިޞްލާޙުތައް އެކަމަނާ ފާހަގަކުރެއްވިއެވެ.
ކޮޕް31 ސަމިޓުގެ ހަވާސާގައި، ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދު، އެ ޤައުމުގެ ރައީސްގެ އަނބިކަނބަލުނާ ބައްދަލުކުރައްވައި، ތމާވެށީގެ ރައްކާތެރިކަމާއި "ޒީރޯ ވޭސްޓް" ޙަރަކާތްތައް ދެމެހެއްޓެނިވި ގޮތެއްގައި ކުރިއަށްގެންދިއުމާ ގުޅޭގޮތުން މަޝްވަރާކުރައްވައިފިއެވެ. މި ބައްދަލުކުރެއްވުމުގައި ދެ ޤައުމުގެ ދެމެދުގައި ތިމާވެށީގެ މައްސަލަތަކަށް ޙައްލު ހޯދުމަށް ގުޅިގެން މަސައްކަތްކުރުމުގެ މުހިންމުކަމުގެ މައްޗަށް ވަނީ އަލިއަޅުވާލާފެވެ.
މި ބައްދަލުކުރެއްވުމުގެ އެންމެ ބޮޑު ސަމާލުކަމެއް ދީފައިވަނީ 2017 ވަނަ އަހަރު އާމިނާ އުރުދުޣާންގެ އިސްނެންގެވުމުގެ މަތިން އުފެއްދެވި "ޒީރޯ ވޭސްޓް ފައުންޑޭޝަން" ގެ މަސައްކަތްތަކާއި، އެ ނިޒާމު ހަރުދަނާކޮށް އެހެން ޤައުމުތަކަށް ފުޅާކުރުމާ ގުޅޭގޮތުންނެވެ. އެގޮތުން، ދިވެހިރާއްޖެފަދަ ނާޒުކު ޖަޒީރާ ޤައުމުތަކުގައި ޤައުމީ ފެންވަރުގައި "ޒީރޯ ވޭސްޓް" ޙަރަކާތްތައް އިތުރަށް ހަރުދަނާކުރުމަށް އުރުދުޣާން ވަނީ ރައީސުލްޖުމްހޫރިއްޔާގެ އަނބިކަނބަލުންނަށް ހިތްވަރުދެއްވާފައެވެ. އަދި މިފަދަ ޚާއްސަ މަޝްރޫޢުތައް ތަންފީޒުކުރުމުގައި ސަރުކާރުގެ ކަމާބެހޭ ވުޒާރާތަކާއި އިދާރާތަކުގެ ދައުރު ފުޅާކޮށް، އެކުގައި މަސައްކަތްކުރުމުގެ މުހިންމުކަން އެކަމަނާ ފާހަގަކުރެއްވިއެވެ.
މި މަޝްވަރާތަކާ ގުޅިގެން، ރާއްޖެއިން ތިމާވެށި ޙިމާޔަތްކުރުމަށް އަޅަމުންދާ ހަރުދަނާ ފިޔަވަޅުތަކުގެ މައްޗަށް ރައީސުލްޖުމްހޫރިއްޔާގެ އަނބިކަނބަލުން އަލިއަޅުވާލެއްވިއެވެ. ޚާއްސަކޮށް، ރާއްޖޭގެ ހުރިހާ ސްކޫލްތަކެއްގައި އެއްފަހަރު ބޭނުންކޮށްފައި އުކާލާ ޕްލާސްޓިކް ބޭނުންކުރުން މުޅިން މަނާކޮށްފައިވާކަން ފާހަގަކުރައްވަމުން، ތިމާވެށި ސާފުކޮށް ބެލެހެއްޓުމުގައި ޒުވާން ޖލުތަކާއި ކުޑަކުދިން އަދި އަންހެނުން ބައިވެރިކުރުމުގެ މުހިންމުކަން އެކަމަނާ ފާހަގަކުރެއްވިއެވެ.
