ޖަޕާނުގެ ދެކުނުގެ ކުމަމޮޓޯ ޕްރިފެކްޗަރއަށް 7.1 މެގްނިޓިއުޑްގެ ބާރުގަދަ ބިންހެލުމެއް އަތުވެއްޖެއެވެ. މި ބިންހެލުމުގެ ސަބަބުން އެތައް ހާސް ގެއަކުން ކަރަންޓު ކެނޑި، މަގުތައް ހަލާކުވެ، ޝޮޕިންގ މޯލެއްގައި ގޮވުމެއް ހިނގާފައިވެއެވެ. އެ މޯލްގައި ތިބި ބަޔަކު މަރުވެފައިވާ ކަމަށް ބެލެވޭ ކަމަށާއި، އަދިވެސް ބަޔަކު ތާށިވެފައި ތިބި ކަމަށް ފުލުހުން މައުލޫމާތު ދެއެވެ. އަދި މި ބިންހެލުމަށްފަހު އިތުރު ބާރުގަދަ ލޮޅުންތަކެއް އަރާފާނެ ކަމުގެ އިންޒާރު ކަމާބެހޭ ފަރާތްތަކުން ވަނީ ދީފައެވެ.
އަންގާރަ ދުވަހުގެ މެންދުރުފަހު ހިނގި މި ހާދިސާގައި 50 އަށްވުރެ ގިނަ މީހުންނަށް އަނިޔާވެފައިވާ ކަމަށް ހޮސްޕިޓަލަކުން ރިޕޯޓުކޮށްފައިވާ ކަމަށް ޕަބްލިކް ބްރޯޑްކާސްޓަރ އެންއެޗްކޭ އިން ބުނެއެވެ. އަދި ބިންހެލުމުގެ ސަބަބުން ހައި-ސްޕީޑް ރޭލެއް ދަގަނޑުން ކައްސާލުމުގެ ސަބަބުން އިތުރު ބަޔަކަށް ވަނީ އަނިޔާވެފައެވެ.
ބިންހެލުމާ ގުޅިގެން ސުނާމީގެ އިންޒާރު ފުރަތަމަ ދިން ނަމަވެސް، ފަހުން އެ އިންޒާރު ވަނީ އުވާލާފައެވެ. އަދި ކައިރީގައި ހުރި ތިން ނިއުކްލިއަރ ޕަވަރ ޕްލާންޓަކަށް އެއްވެސް ގެއްލުމެއް ލިބިފައި ނުވާ ކަމަށް ޖަޕާނުގެ ނިއުކްލިއަރ ރެގިއުލޭޝަން އޮތޯރިޓީން ބުނެއެވެ.
"މީހުންނަށް އަނިޔާވެފައިވާކަން އަޅުގަނޑުމެންނަށް މިހާރު ވަނީ އެނގިފައި. ބައެއް ސަރަހައްދުތަކުން ކަރަންޓު ކެނޑި، އަލިފާނުގެ ހާދިސާތައް ހިނގައި، މަގުތަކަށާއި ފާލަންތަކަށް ގެއްލުންވެ، އިމާރާތްތައް ވެއްޓިފައިވޭ،" ބޮޑުވަޒީރު ސަނާއޭ ޓަކައިޗީ ވިދާޅުވިއެވެ.
"އެންމެހާ ފަރާތްތަކުން ވެސް ރައްކާތެރިކަމުގެ ފިޔަވަޅު އެޅުމަށާއި، ރައްކާތެރި ތަންތަނަށް ބަދަލުވުމަށް އިލްތިމާސް ކުރަން." ބޮޑު ވަޒީރު ވިދާޅުވިއެވެ.
ޑިޒާސްޓަރ މެނޭޖްމަންޓް އޭޖެންސީން ބުނާ ގޮތުގައި، ގާތްގަނޑަކަށް 300،000 މީހުންނަށް ރައްކާތެރި މަރުކަޒުތަކަށް ދިއުމަށް އަންގާފައިވެއެވެ. އަދި ބިންހެލުމަށްފަހު ލޮޅުންތައް ކުރިއަށްދާތީ، ކާރިސާއިން އަރައިގަތުމަށް އެހީތެރިވުމަށް 3،600 ސިފައިން ހަރަކާތްތެރިވާނެ ކަމަށް ޓަކައިޗީ ވިދާޅުވިއެވެ.
ކިއުޝޫގައި ދަތުރުކުރާ ޝިންކަންސެން ބުލެޓް ޓްރެއިންތަކާއި ލޯކަލް ރޭލުތައް ރައްކާތެރިކަމުގެ ފިޔަވަޅެއްގެ ގޮތުން ވަނީ ހުއްޓާލާފައެވެ. އަދި އަސޯ ކުމަމޮޓޯ އެއަރޕޯޓުގެ ރަންވޭ ބަންދުކޮށްފައިވާއިރު، އެއަރޕޯޓުގެ ވެބްސައިޓުގައިވާ ނޯޓިހެއްގައި ބުނެފައިވަނީ "އޮޕަރޭޝަންތައް އަލުން ފެށުމުގެ އެއްވެސް ފުރުސަތެއް މިވަގުތު ނެތް" ކަމަށެވެ.
އެންމެ ބޮޑު ހާދިސާއަކަށް ފެންނަނީ ކުމަމޮޓޯގެ އިއޯން މޯލްގައި ހިނގި ގޮވުމުގެ ހާދިސާއެވެ.
ކަޒޫޔާ ސުރުނަގާ، ބްރޯޑްކާސްޓަރ ޓީބީއެސްއަށް މައުލޫމާތު ދެމުން ބުނީ، މޯލްއާ ގާތްގަނޑަކަށް 300 މީޓަރު (980 ފޫޓ) ދުރުގައި ހުރި ޕަބެއްގެ ތެރޭގައި ތަށިތައް ސާފުކުރަނިކޮށް، ބިންހެލުމުގެ ސަބަބުން އެ ގޮވުމުގެ އަޑު އިވުނު ކަމަށެވެ.
