ޖަޕާނުގެ ވެރިރަށް ޓޯކިޔޯއާ ކައިރީގައި އޮންނަ ޗީބާ ސަރަހައްދަށް ބޯކޮށް ވެހުމުގެ ސަބަބުން ފެންބޮޑުވެ، 8 މީހަކު މަރުވެ، އެތައް ހާސް ބަޔަކު ނަރިތާ އެއާޕޯޓުގައި ތާށިވެއްޖެއެވެ.
މި ވިއްސާރައިގައި 24 ގަޑިއިރުގެ ތެރޭގައި 360 މިލިމީޓަރަށް ވުރެ ގިނައިން ވާރޭ ވެހިފައިވާ ކަމަށް ރިޕޯޓުތައް ބުނެއެވެ. މިއީ 2013 ވަނަ އަހަރުގެ އޮކްޓޯބަރު މަހު އެ ސަރަހައްދުގައި ރެކޯޑު ކުރެވުނު 309 މިލިމީޓަރުގެ ވާރޭގެ ރެކޯޑު މުގުރާލި މިންވަރެކެވެ. މި ހާދިސާއާ ގުޅިގެން ޗިބާ ސަރަހައްދުގެ 20،000 އެއްހާ ގެއަކުން ކަރަންޓު ކެނޑިފައިވާއިރު، ގޭސް ސަޕްލައި ވެސް ވަނީ ވަގުތީ ގޮތުން މެދުކެނޑިފައެވެ.
ފެންބޮޑުވުމުގެ ސަބަބުން މަގުތަކާއި ރޭލު ދަތުރުފަތުރުގެ ނިޒާމަށް ބުރޫތަކެއް އަރައި، ޖަޕާނުގެ ޗުއްޓީ ދުވަސްވަރުގެ އެންމެ ބާރުބޮޑު ދުވަސްވަރު އެތައް ހާސް ބަޔަކު ދަތުރުފަތުރު ކުރުމަށް ދަތިތަކާ ކުރިމަތިވެފައި ވެއެވެ. މަރުވި މީހުންގެ ތެރޭގައި ފެންބޮޑުވެފައިވާ މަގެއްގައި އޮތް ކާރެއްގެ ތެރޭގައި ތާށިވި މީހަކު ވެސް ހިމެނެއެވެ.
މިކަމާ ގުޅޭގޮތުން ޗިބާގެ ގަވަރުނަރު، ޓޮޝިހިޓޯ ކޮމަޖާއީ ނޫސްވެރިންނަށް މައުލޫމާތު ދެއްވަމުން ވިދާޅުވީ، މިއީ ވަރަށް ނާދިރު އަދި އާދަޔާ ޚިލާފު ހާލަތެއް ކަމަށެވެ. އަދި އޭނާގެ މަސައްކަތުގެ ހަޔާތުގައި މިފަދަ ބޮޑު ކާރިސާއަކާ ކުރިމަތިލާން ޖެހިފައި ނުވާ ކަމަށް އޭނާ ފާހަގަކުރެއްވިއެވެ.
ނަރިތާ އެއާޕޯޓުގައި ތާށިވި 7،000 އެއްހާ ފަސިންޖަރުންނަށް އެހީތެރިވުމުގެ ގޮތުން، އެއާޕޯޓުގެ މުވައްޒަފުން ވަނީ ރަޖާއާއި ފެނާއި ކާބޯތަކެތި ފޯރުކޮށްދީފައެވެ. ގިނަ ފަސިންޖަރުން ވަނީ ރޭގަނޑުގެ ވަގުތު އެއާޕޯޓުގައި ހޭދަކޮށްފައެވެ.
މި ކާރިސާއިން އަރައިގަތުމަށްޓަކައި މިލިޓަރީ ސިފައިން ވަނީ ހަރަކާތްތެރިވާން ފަށާފައެވެ. އަދި މިހާރު ފެންގަނޑު ހިނދި، ބައެއް ރޭލު ދަތުރުތައް އަލުން ފެށުމުގެ މަސައްކަތް ކުރަމުންދާ ކަމަށް އެއާޕޯޓުގެ ތަރުޖަމާނު ވިދާޅުވިއެވެ.
މޫސުމީ މި ކާރިސާއާ ގުޅިގެން ރައްކާތެރިކަމުގެ ފިޔަވަޅެއްގެ ގޮތުން ސަރުކާރުގެ ބައެއް އިމާރާތްތައް ވަގުތީ ބޯހިޔާވަހިކަމުގެ މަރުކަޒުތަކެއްގެ ގޮތުގައި ވަނީ ބޭނުންކުރަން ފަށާފައެވެ. މޫސުމާ ބެހޭ އިދާރާތަކުން ލަފާކުރާ ގޮތުގައި ކުރިއަށް އޮތް ތަނުގައި ވެސް މޫސުމީ މިފަދަ ހާދިސާތައް ތަކުރާރުވުމުގެ ފުރުސަތު އޮތުމުން، ރައްޔިތުން ސަމާލުވުމަށް ވަނީ އިލްތިމާސްކޮށްފައެވެ.
