އަބޫދާބީގެ މަޝްހޫރު ރިއަލް އެސްޓޭޓް ޑިވެލޮޕަރު ކުންފުނި އީގަލް ހިލްސް އިން، ރާއްޖޭގައި 20 ބިލިއަން އެމެރިކާ ޑޮލަރު އިންވެސްޓް ކުރުމަށް ސޮއިކޮށްފިއެވެ. މިއީ ރާއްޖޭގެ ތާރިޚުގައި މިހާ ބޮޑު އަދަދެއް އިންވެސްޓް ކުރާ ފުރަތަމަ ފަހަރެވެ. މި އިންވެސްޓްމެންޓްގައި ހިމެނެނީ، ވޯޓާފްރަންޓާއި މެރީނާ ޕްރޮޖެކްޓެއް ތަރައްގީ ކުރުމުގެ މަސައްކަތެވެ. މި އެއްބަސްވުމުގައި އީގަލް ހިލްސް އިން ސޮއިކޮށްފައި ވަނީ ދިވެހި ސަރުކާރާ އެކު އެވެ.
އަބުދާބީގެ ދަ ނޭޝަނަލް ނިއުސްއިން ރިޕޯޓު ކުރިގޮތުގައި މި އެއްބަސްވުމުގައި ސޮއިކުރުން އޮތީ ދުބާއީގައެވެ. މި ރަސްމިއްޔާތުގައި އީގަލް ހިލްސްގެ ބާނީ އަދި ޗެއާމަން މުހައްމަދު އަލްބާރާއި އާއި ދިވެހި ސަރުކާރުގެ އިސް މަންދޫބުން ބައިވެރިވެވަޑައިގެންނެވިއެވެ.
"މޯލްޑިވްސް ވޯޓާފްރަންޓް އެންޑް މެރީނާ" ތަރައްގީ ކުރާނީ، ވެރިރަށް މާލެއާ ގާތްގަނޑަކަށް 17 މިނެޓުގެ ސްޕީޑްބޯޓު ދަތުރަކުން ދެވޭ ފުށިދިއްގަރު ފަޅުގައި އަލަށް ހިއްކަމުންދާ "ރަސްމާލެ" ގައެވެ.
މަޝްރޫއުގެ ތަފްސީލު
މި އިންޓަގްރޭޓެޑް ޑިވެލޮޕްމަންޓް މަޝްރޫއުގައި ބައިނަލްއަގްވާމީ ފެންވަރުގެ ހޮޓަލްތަކާއި، ރިސޯޓުތަކާއި، ޕްރީމިއަމް އަދި ބްރޭންޑެޑް ރެސިޑެންސްތަކުގެ އިތުރުން ދުނިޔޭގެ ފެންވަރުގެ މެރީނާއަކާއި، ވޯޓާފްރަންޓް ޕްރޮމެނާޑްތަކާއި، ރެސްޓޯރެންޓްތަކާއި، ފިހާރަތަކާއި، ޗުއްޓީ ހޭދަކުރާ މަރުކަޒުތަކުގެ އިތުރުން ވެލްނެސް ސެންޓަރުތައް ހިމެނޭނެއެވެ.
އީގަލް ހިލްސް އިން ހާމަކުރާ ގޮތުގައި، އެކި މަރުހަލާތަކަށް ބަހާލައިގެން ކުރިއަށްގެންދާ މި މަޝްރޫއުގެ ޖުމްލަ އިންވެސްޓްމަންޓަކީ ގާތްގަނޑަކަށް 20 ބިލިއަން އެމެރިކާ ޑޮލަރެވެ. މިއީ އީގަލް ހިލްސް އިން އެއްފަހަރާ ހުރިހާ ފައިސާއެއް ހަރަދުކުރުމުގެ ބަދަލުގައި، މަޝްރޫއުގެ އެކި ފޭސްތަކަށް ބަހާލައިގެން އިންވެސްޓްކުރުމަށް ތަސައްވަރުކޮށްފައިވާ އަދަދެކެވެ.
އިބްތިދާއީ އަންދާޒާތަކުން ދައްކާ ގޮތުގައި:
- ޖުމްލަ އިންވެސްޓްމަންޓް: މަޝްރޫއުގެ މުއްދަތުގެ ތެރޭގައި 30 ބިލިއަން ޑޮލަރަށް ވުރެ ގިނަ ފޮރިން އިންވެސްޓްމަންޓް ލިބޭނެ ކަމަށް ބެލެވެއެވެ. އޭގެ ތެރޭގައި ރާއްޖެއަށް ވަންނާނެ 18 ބިލިއަން ޑޮލަރަކީ ސާފު ފޮރިން އިންވެސްޓްމަންޓްގެ ފައިސާއެވެ.
- ވަޒީފާގެ ފުރުސަތު: ސީދާ އަދި ނުސީދާ ގޮތެއްގައި 54،000 އަށް ވުރެ ގިނަ ވަޒީފާ އުފެއްދޭނެއެވެ.
- ފަތުރުވެރިކަމުގެ އާމްދަނީ: މަޝްރޫއު ފުރިހަމައަށް ނިމުމާއެކު، އަހަރަކު 1 މިލިއަނަށް ވުރެ ގިނަ ފަތުރުވެރިން މި މަންޒިލަށް ޝައުގުވެރިވާނެއެވެ. އަދި އަހަރަކު 2 ބިލިއަން ޑޮލަރަށް ވުރެ ގިނަ އާމްދަނީއެއް ފަތުރުވެރިކަމުގެ ދާއިރާއިން ލިބޭނެއެވެ.
މި މަޝްރޫއުގެ ފައިނޭންސިން، ކޮންސްޓްރަކްޝަން ޓައިމްލައިންއާއި އީގަލް ހިލްސް އިން ޚަރަދުކުރާނެ ކެޕިޓަލްގެ ތަފްސީލުތައް އަދި ހާމަކޮށްފައެއް ނުވެއެވެ.
ރާއްޖޭގެ އިގްތިސާދީ ކުރިއެރުމާއި ރަށްވެހިކަން ފުޅާވުން
ރަސްމާލެއަކީ މާލެއަށް ބާރުބޮޑުވެފައިވާ އާބާދީގެ މައްސަލައަށް ހައްލެއް ހޯދައިދިނުމުގެ ބޭނުމުގައި ރައީސް މުއިއްޒު ކުރިއަށްގެންދަވާ މަދަނީ ރަށްވެހިކަން ފުޅާކުރުމުގެ މަޝްރޫއެކެވެ. މިއީ 1،100 ހެކްޓަރަށް ވުރެ ބޮޑު ސަރަހައްދެއްގެ ބިން ހިއްކައިގެން، ގާތްގަނޑަކަށް 65،000 ހައުސިން ޔުނިޓް ހިމެނޭ ގޮތަށް ރެސިޑެންޝަލް، ވިޔަފާރި އަދި ފަތުރުވެރިކަމުގެ ދާއިރާތައް އެކުލެވޭ އާ ސިޓީއެއް ގާއިމުކުރުމަށް ރާވާފައިވާ މާސްޓަރޕްލޭނެކެވެ.
މި އެއްބަސްވުމަކީ ފަތުރުވެރިކަމަށް އެކަނި ބަރޯސާވެފައިވާ ރާއްޖޭގެ އިގްތިސާދު ސިންދަފާތު ކުރުމަށާއި ބޭރުގެ އިންވެސްޓްމަންޓްތައް އިތުރުކުރުމަށް ސަރުކާރުން ކުރަމުންދާ މަސައްކަތުގެ ދަށުން ވެފައިވާ އެއްބަސްވުމެކެވެ. މީގެ ކުރިން، 2025 ވަނަ އަހަރުގެ މެއި މަހު ސަރުކާރުން ވަނީ ދުބާއީގެ އެމްބީއެސް ގްލޯބަލް އިންވެސްޓްމަންޓްސްއާ ގުޅިގެން މާލޭގައި 8.8 ބިލިއަން ޑޮލަރުގެ ފައިނޭންޝަލް ސެންޓަރެއް ތަރައްގީކުރުމަށް ވެސް ސޮއިކޮށްފައި ކަމަށް އެނޫހުން ބުނެފައި ވެއެވެ.
އީގަލް ހިލްސްގެ ޕޯޓްފޯލިއޯ
އީގަލް ހިލްސްއަކީ އަބޫދާބީގެ އަމިއްލަ ރިއަލް އެސްޓޭޓް ކުންފުންޏެކެވެ. މި ކުންފުނި އުފެއްދެވި މުހައްމަދު އަލްބާރަކީ ދުނިޔޭގެ އެންމެ އުސް އިމާރާތް ކަމަށްވާ ބުރުޖް ޚަލީފާ އަދި ދުބާއީ މޯލް ތަރައްގީކުރި އީމާރް ޕްރޮޕަޓީސް ގެވެސް ބާނީއެވެ.
އީގަލް ހިލްސްގެ ބައިނަލްއަގްވާމީ މަޝްރޫއުތަކުގެ ތެރޭގައި:
- އަބޫދާބީ: 20،000 މީހުންގެ އާބާދީއަކަށް އަމާޒުކޮށްގެން އަބޫދާބީގެ ލޫލޫ އައިލެންޑް އަލުން ތަރައްގީކުރުން.
- އަލްބޭނިއާ: 12،000 ގެއާއި، ހޮޓާ، ރީޓެއިލް އަދި ސުޕަޔޮޓް މެރީނާ ހިމެނޭ ގޮތަށް 'ޑޫރެސް ޔޮޓްސް އެންޑް މެރީނާ' ގައި ހިންގާ 2.5 ބިލިއަން ޑޮލަރުގެ މަޝްރޫއު.
- ޝާރުޖާ: 1.2 ބިލިއަން ޑޮލަރުގެ 'މަރިޔަމް އައިލެންޑް' ވޯޓާފްރަންޓް ޑިވެލޮޕްމަންޓް.
