އޮސްލޯ އެއްބަސްވުންތައް އުވާލައި، ރާމަﷲ ގައި އޮތް ފަލަސްޠީނު ސަރުކާރު ވައްޓާލުމަށާއި، ހުޅަނގު އައްސޭރީގެ މައްޗަށް އިސްރާއީލުގެ ސިޔާދަތީ ބާރު ފޯރުވުމަށް އިސްރާއީލުގެ ފިނޭންސް މިނިސްޓަރު ސމޯޓްރިޗް ގޮވާލައިފިއެވެ.
އޭނާ މިކަމަށް ގޮވާލީ ހުޅަނގު އައްސޭރީގެ އުތުރުގައި ޔަހޫދީ ޓެރަރިސްޓް ވަޒަންވެރިން ކުރިއަށްގެންދިޔަ މާޗެއްގައި ބައިވެރިވެ ވާހަކަދައްކަމުންނެވެ. ސްމޯޓްރިޗް ބުނީ އެ ސަރަޙައްދުގައި ޔަހޫދީ ޓެރަރިސްޓުންގެ އާބާދީ ފުޅާކުރުމަކީ ޔަހޫދީންގެ ބަސްތީތައް ކަމަށްވާ "ޢަފޫލާ" އާއި "ކަފާރު ސާބާ" ފަދަ ސިޓީތަކަށް ލިބޭ ސަލާމަތީ ރައްކާތެރިކަމެއް ކަމަށެވެ.
ޔަހޫދީންގެ ޗުއްޓީ ބަންދު ދުވަސްވަރާ ދިމާކޮށް ހުޅަނގު އައްސޭރީގެ އާ ވަޒަންވެރިންގެ ސަރަޙައްދުތަކަށާއި ދަނޑުތަކަށް އިސްރާއީލުގެ އެތައް ހާސް އާއިލާއެއް ޒިޔާރަތްކޮށްފައިވާ އިރު، ހައްދުފަހަނައަޅާފައިވާ ހަރުކަށި "ރިލިޖިއަސް ޒިއޮނިޒަމް" ޕާޓީން ލަފާކުރާ ގޮތުގައި ހުލަނގު އައްސޭރީގެ ޔަހޫދީ ބަސްތީތަކަށް ބައި ލައްކަ ޔަހޫދީން ޒިޔާރަތް ކޮށްފައި ވެއެވެ.
ސްމޯޓްރިޗް ބުނީ، ހުޅަނގު އައްސޭރީގެ އުތުރުގައި ޔަހޫދީ ޓެރަރިސްޓުން ހިންގަމުންދާ "ވަޒަންވެރިވުމުގެ އިންޤިލާބު" ގެ ސަބަބުން މުޅި ފަލަސްޠީނުގެ ބިން ފުރިހަމައަށް ޔަހޫދީންގެ މިލްކަކަށް ވާނެ ކަމަށެވެ.
އަދި ހުޅަނގު އައްސޭރީގައި ފަލަސްޠީނުގެ ސަރުކާރުގެ އަތުގައި ހުރި ހަތިޔާރުތައް އަތުލަން ވާނެ ކަމަށާއި ފަލަސްޠީނުގެ ޒާތީ ވެރިކަން ކުރާ އިދާރާ އުފަން ކުރުވި އޮސްލޯ އެއްބަސްވުން އުވާލަން ޖެހޭނެ ކަމަށެވެ. އޭގެ އިތުރުން ފަލަސްޠީނު ސަރުކާރު އުވާލުމަށްފަހު އިސްރާއީލުގެ ފުރިހަމަ ބާރު ރާމަﷲއާއި ފަލަސްޠީނުގެ ހުރިހަިއ ބިމަކަށް ހިންގަން ޖެހޭނ ކަމަށް ވެސް ބުންޏެވެ.
