ފްރާންސްގެ ސުކޫލުތަކާއި ކޮލެޖުތަކުގެ ހާލަތު ރަނގަޅުކުރުމަށް ގޮވާލައި އެ ގައުމުގެ ދަރިވަރުން މުޅި ގައުމުގައި ކުރިއަށްގެންދާ މުޒާހަރާތަކުގެ ތެރެއިން 488 މީހަކު ފުލުހުންގެ ބެލުމުގެ ދަށަށް ގެންގޮސްފި އެވެ. މި މުޒާހަރާތަކާ ގުޅުވައި އެމެރިކާގެ ރައީސް ޑޮނަލްޑް ޓްރަންޕް ދެއްކެވި ވާހަކަފުޅުތަކާ ގުޅިގެން ފްރާންސްގެ ސަރުކާރާއި އިދިކޮޅު ފަރާތްތަކުގެ ނުރުހުން ވަނީ އަމާޒުވެފައެވެ.
ފްރާންސްގެ އިންޓީރިއާ މިނިސްޓްރީން މައުލޫމާތުދޭ ގޮތުގައި މުޅި ގައުމުގައި ކުރިއަށްދިޔަ މުޒާހަރާތަކުގައި 266،000 އަށްވުރެ ގިނަ މީހުން ބައިވެރިވެފައިވެއެވެ. އޭގެ ތެރެއިން 56،000 މީހުން މުޒާހަރާކޮށްފައިވަނީ ވެރިރަށް ޕެރިސްގައެވެ. ނަމަވެސް މުޒާހަރާ އިންތިޒާމުކުރި ފަރާތްތަކުން ބުނާ ގޮތުގައި މުޅި ގައުމުން 450،000 އަށްވުރެ ގިނަ ދަރިވަރުން ވަނީ މަގުމައްޗަށް ނުކުމެފައެވެ. ޕެރިސްގެ ފުލުހުންގެ ވެރިޔާ ބާޓްރިސް ފޯ ވިދާޅުވީ، ޕެރިސްއިން އެކަނިވެސް 32 މީހަކު ހައްޔަރުކުރެވުނު އިރު، ސިފައިންނާއި ފުލުހުންގެ 43 އޮފިސަރަކަށް ވަނީ އެކިވަރުގެ އަނިޔާތައް ލިބިފައެވެ.
މި މުޒާހަރާތައް އުފެދެން މެދުވެރިވި މައިގަނޑު ސަބަބަކީ ފްރާންސްގެ ސެކަންޑަރީ ސުކޫލުތަކުގެ ހާލަތު ދަށަށް ގޮސް ޓީޗަރުން މަދުވުމާއި، ކްލާސްރޫމްތައް ތޮއްޖެހުމުގެ މައްސަލައެވެ. މީގެއިތުރުން، މަތީ ތައުލީމަށް ކުރިމަތިލާ ދަރިވަރުން ބޭނުންކުރާ ސަރުކާރުގެ "ޕާކޯސިޕް" ޕްލެޓްފޯމުގައި ސުކޫލުތަކުން ޖާގަ ލިބުމުގައި އިންސާފުވެރިކަމެއް ނެތުމާއި، މަސްތަކެއް ވަންދެން އިންތިޒާރުކުރަންޖެހޭ މައްސަލައިގައި ދަރިވަރުން ވަނީ ބޮޑު ކަންބޮޑުވުމެއް ފާޅުކޮށްފައެވެ. މުޒާހަރާތަކަށް އިތުރު ބާރެއް ލިބިގެންދިޔައީ މުދައްރިސުންނާއި، ބެލެނިވެރިންގެ އިތުރުން ލޭބާ ޔޫނިއަންތަކުންވެސް ދަރިވަރުންނާ ގުޅުމުންނެވެ.
ފްރާންސްގެ ބޮޑުވަޒީރު ސެބަސްޓިއަން ލެކޯނޫ ވިދާޅުވީ ދަރިވަރުންގެ ކަންބޮޑުވުންތަކަށް ސަރުކާރުން އަޑުއަހާނެ ކަމަށާއި، ސިޔާސީ ފަރާތްތަކުން މި މައްސަލައިގެ ނާޖާއިޒު ފައިދާ ނެގުމަށް ފުރުސަތު ނުދެއްވާނެ ކަމަށެވެ. އަދި ސުކޫލުތަކުގެ އެތެރޭގައި މަޝްވަރާކުރުމުގެ ފުރުސަތު ހުޅުވާލައްވާނެ ކަމަށްވެސް އޭނާ ވިދާޅުވިއެވެ. ނަމަވެސް، އިންސާނީ ހައްގުތަކަށް މަސައްކަތްކުރާ ޖަމިއްޔާތަކުން ވަނީ ފުލުހުން ދަރިވަރުންނާ ދެކޮޅަށް ނުރައްކާތެރި ހަތިޔާރު ބޭނުންކޮށް، އިންތިހާއަށް ބާރުގެ ބޭނުންކުރަމުންދާ ކަމަށް ބުނެ އދ. އަށް މައްސަލަ ހުށަހެޅުމަށް ނިންމާފައެވެ.
މި މުޒާހަރާތަކާ ގުޅިގެން އެމެރިކާގެ ރައީސް ޑޮނަލްޑް ޓްރަންޕް، މިއީ ހުޅަނގުގެ ގައުމުތަކަށް އިމިގްރޭޝަނުގެ ސަބަބުން ކުރިމަތިވަމުންދާ ނުރައްކަލެއްގެ ގޮތުގައި ސިފަކުރެއްވުމުން ފްރާންސްގެ ޚާރިޖީ ވަޒީރު ޖީން-ނޮއެލް ބާރޯ ވަނީ އެކަމަށް ރައްދުެއް ދެއްވާފައެވެ. ބާރޯ ވިދާޅުވީ، ފްރާންސްގައި ހިނގާ ކަންކަމުގެ އަސްލު އޮޅުވާލައި، ބޭރުގެ ފަރާތްތަކުން އެމީހުން ބޭނުންވާ ގޮތަށް ވާހަކަތައް ބައްޓަންކުރުމަށް ފުރުސަތު ނުދޭނެ ކަމަށެވެ. އިދިކޮޅު "ފްރާންސް އަންބޯޑް" ޕާޓީގެ ލީޑަރު ޖީން-ލޫކް މެލެންޗޮންވެސް ވަނީ ޓްރަންޕްގެ ވާހަކަފުޅަކީ ޚިޔާލީ އަދި ހަގީގަތާ ޚިލާފް ވާހަކަތަކެއް ކަމަށް ވިދާޅުވެފައެވެ.
