ފަރަންސޭސިވިލާތުގެ ވެރިރަށް ޕެރިސްއާ އެހެނިހެން ސަހަރުތަކުގައި ހިންގި ނުރައްކާތެރި ހަމަނުޖެހުންތަކާ ގުޅިގެން، ޤައުމުގެ ސަލާމަތީ ކަންކަމުގައި ބޮޑެތި އިހުމާލުތަކެއް ވެވިފައިވާ ކަމަށް ރައީސް އެމެނުއެލް މެކްރޯން ވިދާޅުވެއްޖެއެވެ. ޓްރަމްޕްގެ ހަނގުރާމައާއި ދުނިޔޭގެ އިގްތިސާދު ހީނަރުކޮށްލުމާ ދިރިއުޅުމުގެ ޚަރަދުތައް ބޮޑުވުމާއި ތެލުގެ އަގު މައްޗަށް ދިއުމާ ދެކޮޅަށް ކުރިއަށް ގެންދިޔަ މި މުޒާހަރާތަކުގައި މުޅި ފްރާންސްގައި ބޮޑެތި ހަމަނުޖެހުންތަކެއް ހިންގާފައިވާއިރު، މިކަމާ ގުޅިގެން ދާޚިލީ ވަޒީރު ލޮރަންޓް ނުނޭޒް މަޤާމުން އިސްތިއުފާދެއްވުމަށް ހުށަހެޅުއްވި އެވެ. ނަމަވެސް، ޤައުމުގެ މަސްލަޙަތަށްޓަކައި ރައީސް މެކްރޯން ވަނީ އެ އިސްތިއުފާ ޤަބޫލުކުރައްވަން ދެކޮޅުހައްދަވާފައެވެ.
މި ހަމަނުޖެހުންތަކާ ގުޅިގެން 2,400 އަށްވުރެ ގިނަ މީހުން ހައްޔަރުކޮށްފައިވާ އިރު މަތީ، ސިޓީތަކުގެ ސަރުކާރު އިމާރާތްތަކާއި ވިޔަފާރިތަކަށް ވަނީ ބޮޑެތި ގެއްލުންތަކެއް ލިބިފައެވެ. ޤައުމާ މުޚާތަބުކުރައްވައި ދެއްކެވި ވާހަކަފުޅުގައި ރައީސް މެކްރޯން ވަނީ މަގުތަކުގައި ހިންގާފައިވާ ހަރުކަށި ޢަމަލުތައް ހަރުކަށި އިބާރާތުން ކުށްވެރިކުރައްވައި، މިއީ ޤައުމަށް ލިބުނު ބޮޑު ހުތުރެއްގެ ގޮތުގައި ސިފަކުރައްވާފައެވެ. އަދި ސަލާމަތީ ބާރުތަކުގެ ތައްޔާރީތަކާއި އިންޓެލިޖެންސްގެ ދާއިރާއިން ހުރި ގޯސްތައް ދެނެގަނެ، އެކަންކަން ރަނގަޅުކުރުމަށް އިންޓީރިއާ މިނިސްޓަރަށް އަންގާފައިވާނެ ކަމަށް ވިދާޅުވިއެވެ.
މި ހަމަނުޖެހުންތަކުގެ އަޞްލަކީ ޓްއރަމްޕްގެ ހަނގުރާމައިގެ ސަބަބުން ދުނިޔޭގެ ބާޒާރުގައި ތެލުގެ އަގަށް އައިސްފައިވާ ބަދަލުތައް ކަމަށް ފާހަގަކުރައްވަމުން، މިކަމަށް ޙައްލެއް ހޯދުމުގެ ގޮތުން ބައިނަލްއަޤުވާމީ ފެންވަރުގައި މަޝްވަރާކުރައްވަމުންދާ ކަމަށް މެކްރޯން ވިދާޅުވިއެވެ. އަދި ވިޔަފާރިތަކަށް ލިބުނު ގެއްލުންތަކުން އަރުވައިގަތުމަށް ބޮޑުވަޒީރު ސެބަސްޓީން ލެކޯނޫގެ ބެއްލެވުމުގެ ދަށުން ޚާއްޞަ ކާރިސާއާ ކުރިމަތިލާ ކޮމިޓީއެއް އެކުލަވައިލައްވައި، އަވަސް އެހީތެރިކަން ފޯރުކޮށްދޭނެ ކަމަށް ވެސް މެކްރޮން ވަނީ ވައުދުވެވަޑައިގެންފައެވެ.
ޤާނޫނާ ޚިލާފަށް މުދަލާއި ތަކެތި ހަލާކުކޮށް ލޫޓުވި ފަރާތްތަކާ މެދު ޤާނޫނީ ފިޔަވަޅު އެޅުމުގައި އެއްވެސް ފަސްޖެހުމެއް ނުދައްކަވާނެ ކަމަށާއި، ކުށްވެރިންނަށް އެކަށީގެންވާ އަދަބު ލިބިދޭނެ ކަމުގެ ޔަޤީންކަން މެކްރޮން ރައީސް ދެއްވިއެވެ. ނަމަވެސް، ޞުލްޙަވެރިކަމާއެކު ޚިޔާލުފާޅުކުރާ މުޒާހަރާގެ ބައިވެރިންނާއި ޖަރީމާތައް ހިންގާ ފަރާތްތައް ވަކިކޮށް ދެނެގަންނަންޖެހޭނެ ކަން ފާހަގަކުރެއްވިއެވެ. ކުރިއަށް އޮތް ރިޔާސީ އިންތިޚާބަށް މަގުބޫލުކަން ހޯދުމުގެ ނިޔަތުގައި ބައެއް ފަރާތްތަކުން މިފަދަ ހަމަނުޖެހުންތައް ނަހަމަގޮތުގައި ބޭނުންކުރަމުންދާ ކަމަށް ތުހުމަތުކުރައްވައި، މަގުމަތީގެ ހަމަނުޖެހުންތަކުގެ ބަދަލުގައި ސިޔާސީ މަޝްވަރާތަކުގެ ތެރެއިން ޙައްލު ހޯދުމަށް ރައީސް މެކްރޯން ވަނީ ގޮވާލައްވާފައެވެ.
