އިންޑިއާގެ ޚާރިޖީ ވަޒީރު ޑރ. އެސް ޖަޔަޝަންކަރަށް މަރުހަބާ ވިދާޅުވަމުން، ޚާރިޖީ ވަޒީރު މޫސާ ޒަމީރު ވަނީ ރާއްޖެއިން އިންޑިއާއާއެކު ބަދަހި ގުޅުމެއް ދަމަހައްޓަވާނެ ކަމުގެ ޔަޤީން ކަން ދެއްވާފައެވެ. ދެކުނު އޭޝިއާ ސަރަޙައްދަށް ދިމާވެފައިވާ، އާދަޔާ ޚިލާފު ޙައްސާސް ދުވަސްވަރެއްގައި ރާއްޖެއަށް ޖަޔަޝަންކަރު ކުރައްވާ 4 ވަނަ ދަތުރުފުޅުގައި އެމަނިކުފާނަށް ވަނީ ރަތް ދޫލައިގެ މަރުޙަބާއެއް އަރުވާފައެވެ.
މިދަތުރުފުޅު ކުރައްވާ ދުވަސްވަރުގެ ގޮތުން، އިންޑިއާއާއި ރާއްޖޭގެ ގުޅުމަށް ނިއުދިއްލީން ދޭ އަހަންމިއްޔަތުކަން ފާހަގަ ވެގެން ދެއެވެ. ރާއްޖެއަށް ޒިޔާރަތް ކުރެއްވުމުގެ ކުރިން، މިއަދު ހެނދުނު ޖަޔަޝަންކަރު ވަނީ އިންޑިއާގެ ބޮޑު ވަޒީރު ނަރެންދްރަ މޮދީއާ ބައްދަލުކުރައްވާފައެވެ. އަދި، އިންޑިއާގެ މިނިވަންދުވަހާ ހަމައަށް އިންޑިއާގެ ޤައުމީ ދިދަ ނެގުމާއި ދިދައަށް ޚާއްޞަ ސަމާލުކަމެއް ދިނުމަށް ހިންގާ ކެމްޕޭން ޙަފްލާގައި ވެސް އެމަނިކުފާނު ބައިވެރިވެ ވަޑައިގެންނެވިއެވެ.
ޖަޔަޝަންކަރުގެ މިދަތުރުފުޅުގައި، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އަރިހަށް އިޙުތިރާމްގެ ޒިޔާރަތެއްވެސް ކުރައްވާނެއެވެ.
ރާއްޖޭގައި އެމަނިކުފާނު ބާއްވަވާ މަޝްވަރާތަކުގެ ތެރޭގައި، ދިފާއީ، އިޤްތިޞާދީ، މާލީ، އަދި ޢުމްރާނީ ތަރައްޤީއާއި ބޯހިޔާވަހިކަމާ ބެހޭ ވުޒާރާތަކުގެ ވަޒީރުންނާ އެކު މަޝްވަރާތަކެއް ބާއްވަވާނެއެވެ. އަދި އެއްބަސްވުންތަކެއްގައި ސޮއި ކުރެއްވުމުގެ އިތުރުން، އިންޑިއާ ސަރުކާރުން ފަށާފައިވާ މަޝްރޫޢުތަކެއްގެ ނިމުންވެސް މަޖާޒީ ގޮތަށް އިފްތިތާޙު ކޮށްދެއްވާނެއެވެ. އަދި ތިލަ މާލެ ބްރިޖުގެ މަޝްރޫޢާއި އައްޑޫ ސިޓީގައި ކުރިއަށް ގެންދާ މަޝްރޫޢުތައްވެސް އެމަނިކުފާނު ބައްލަވާލައްވާނެއެވެ.
މިނިސްޓަރ އޮފް ފޮރިން އެފެއާޒް މޫސާ ޒަމީރު އިންޑިއާއަށް ކުރެއްވި ދަތުރުފުޅަށް ފަހު، އިންޑިއާ ސަރުކާރާއި ދިވެހި ސަރުކާރާ ދެމެދު ގުޅުން ބަދަހި ކުރުމަށް ފިޔަވަޅުތަކެއް އެޅިފައި ވެއެވެ.
މި ދަތުރުފުޅުގައި، ކުރެވޭ މަޝްވަރާތަކުގައި، ސެޕްޓެމްބަރު މަހު އިންޑިއާއަށް ދައްކަން ޖެހޭ، 50 މިލިއަން ޑޮލަރު ދެއްކުން ފަސްކޮށްދިނުމަށާއި ބަޖެޓް ސަޕޯޓަށް ބޭނުންވާ އިތުރު 50 މިލިއަން ޑޮލަރަށް އިންޑިއާ ސަރުކާރުގައި ދެންނެވުން ހިމެނެއެވެ.
އޭގެ އިތުރުން އިންޑިއާގެ ޔުނިފައިޑް ޕޭމެންޓް ސިސްޓަމް ރާއްޖޭގައި ތަޢާރަފް ކުރުމަށް ބޭނުންވާ އެއްބަސްވުމުގައި ދިވެހި ސަރުކާރާއެކު ސޮއިކުރުންވެސް އޮންނާނެއެވެ. މިއީ އިންޑިއާ ފަތުރުވެރިން ރާއްޖެއަށް ގެނައުމަށް ކުރަމުންދާ މަސައްކަތުގައި ފަސޭހަކަމާއެކު ފައިސާ ދެއްކުމަށް އެޅޭ ފިޔަވަޅެއް ކަމުގައި ބެލެވެއެވެ.
ޖަޔަޝަންކަރުގެ މިދަތުރުފުޅަކީ، ސަރަޙައްދީ ނުތަނަވަސް ދުވަސްވަރެއްގައި ކުރައްވާ ދަތުރުފުޅެކެވެ. އިންޑިއާގެ އަވަށްޓެރިޔާ ބަނގްލަދޭޝް ހަލަބޮލިކަމަކަށް ވެއްޓި ބަދަލެއްގެ ތެރޭގައި އޮތް ޙައްސާސް ދުވަސްވަރު، އިންޑިއާގެ ޚާރިޖީ ވަޒީރުގެ ސަމާލުކަން މުހިންމުވާނެކަން ކަށަވަރެވެ. އަދި ރާއްޖެއަށް ކުރައްވާ ދަތުރުފުޅު ނިންމަވާތާ މާގިނަ ދުވަހެއް ނުވެ، އިންޑިއާއިން މިނިވަންދުވަސްވެސް ފާހަގަ ކުރާނެއެވެ.
