އިނގިރޭސި ޕްރިމިއަރ ލީގުގެ ނޯތު ލަންޑަން ކްލަބު އާސެނަލްގެ ޓްރާންސްފަރ ޕްލޭންތަކަށް ބޮޑު ހުރަހެއް ކުރިމަތިވެއްޖެއެވެ. އެ ކްލަބުގެ އެޓޭކިންގ ޓާގެޓުތަކުގެ ތެރެއިން ދެ ކުޅުންތެރިއެއް ކަމަށްވާ ނިކޯ ވިލިއަމްސް އަދި ރޮޑްރިގޯ ގޯސް އާސެނަލަށް ބަދަލުވުމަށް ހުށަހެޅި އޮފަރތަކަށް އިންކާރުކޮށްފިއެވެ.
2025/26 ވަނަ އަހަރުގެ ޕްރިމިއަރ ލީގު މޫސުމަށް ތައްޔާރުވުމުގެ ގޮތުން އާސެނަލްގެ ސްކޮޑު ވަރުގަދަކުރުމަށް މަސައްކަތްކުރަމުންދާ ދަނޑިވަޅެއްގައި މި ދެ ކުޅުންތެރިން އިންކާރުކުރުމަކީ އެ ކްލަބަށް ލިބުނު ބޮޑު ހިތްދަތި ކަމެކެވެ.
23 އަހަރުގެ އެތްލެޓިކް ބިލްބާއޯގެ ވިންގަރު ނިކޯ ވިލިއަމްސްއަކީ އާސެނަލްގެ މެނޭޖަރު މިކެލް އަރޓެޓާ ވަރަށް ބޮޑަށް ބޭނުންވެފައިވާ ކުޅުންތެރިއެކެވެ. ނަމަވެސް، ވިލިއަމްސް ވަނީ ޖަރުމަނުގެ ޗެމްޕިއަން ބަޔަން މިއުނިކަށް ބަދަލުވުމަށް ޝައުގުވެރިކަން ފާޅުކޮށްފައެވެ. ބަޔަންގެ އިސްވެރިން މެކްސް އެބަރލް އަދި ކްރިސްޓޮފް ފްރޯންޑް ވަނީ ވިލިއަމްސްގެ އޭޖެންޓުންނާ މަޝްވަރާތައް ފަށާފައެވެ.
ބްރެޒިލްގެ ސްޓާރ ކުޅުންތެރިޔާ ރޮޑްރިގޯ ގޯސްއަކީވެސް އާސެނަލްގެ މައިގަނޑު ޓާގެޓުތަކުގެ ތެރޭގައި ހިމެނޭ ކުޅުންތެރިއެކެވެ. ނަމަވެސް، 24 އަހަރުގެ މި ކުޅުންތެރިޔާ ވަނީ ރިއަލް މެޑްރިޑްގައި ދެމިހުރުމަށް ނިންމާފައެވެ. ރޮޑްރިގޯ ބުނެފައިވަނީ އައު މެނޭޖަރު ޒާބީ އަލޮންސޯގެ ދަށުން ކުޅެން ބޭނުންވާ ކަމަށެވެ.
މި ދެ ކުޅުންތެރިންގެ އިއުތިރާޒް ކުރުމާ ގުޅިގެން އާސެނަލަށް ވަނީ އެހެން އޮޕްޝަންތަކެއް ހޯދުމަށް މަޖުބޫރުވެފައެވެ. މެންޗެސްޓަރ ސިޓީ އަދި ލިވަރޕޫލް ފަދަ ވާދަވެރި ކްލަބުތަކުން އާ ކުޅުންތެރިން ސޮއިކުރަމުންދާއިރު، އާސެނަލްގެ ޓްރާންސްފަރ ޕްލޭންތަކަށް ބޮޑު ހުރަހެއް ކުރިމަތިވެފައިވާކަން ފާހަގަކުރެވެއެވެ.
