ކުޑަކުދިންނަށް ސޯޝަލް މީޑިއާގެ ސަބަބުން ކުރާ ނޭދެވޭ އަސަރުތަކުން ސަލާމަތްކުރުމަށްޓަކައި، އުމުރުން 16 އަހަރުން ދަށުގެ ކުދިން ސޯޝަލް މީޑިއާ އެކައުންޓްތައް ހެދުން މަނާކުރުމަށާއި، އާޓިފިޝަލް އިންޓެލިޖެންސް ޗެޓްބޮޓްތަކުން ނުރައްކާތެރި މައުލޫމާތު އުފެއްދުން ހުއްޓުވުމަށް ބާރުއަޅާ އާ ބިލެއް ކެނެޑާގެ ސަރުކާރުން ތައާރަފުކޮށްފިއެވެ.
"ޑިޖިޓަލް ސޭފްޓީ އެކްޓް" ގެ ނަމުގައި ކެނެޑާގެ ކަލްޗަރ މިނިސްޓަރ މާކް މިލަރ ހުށަހެޅުއްވި މި ބިލާއެކު، ކެނެޑާ ވެގެން ގޮސްފައިވަނީ ކުޑަކުދިންގެ ރައްކާތެރިކަމަށްޓަކައި ސޯޝަލް މީޑިއާއާ ދެކޮޅަށް ހަރުކަށި ފިޔަވަޅުތައް އަޅަން ފެށި ދުނިޔޭގެ އެންމެ ފަހުގެ ގައުމަށެވެ.
"ކުދިންގެ ރައްކާތެރިކަމަކީ ފަހުން ވިސްނަން އޮތް ކަމެއް ނޫން"
ބިލު ތައާރަފުކުރައްވަމުން މިނިސްޓަރ މާކް މިލަރ ވިދާޅުވީ، އޮންލައިންކޮށް ލިބޭ ގެއްލުންތަކުގެ ސަބަބުން ވަރަށް ހިތާމަވެރި ނަތީޖާތަކާ ކުރިމަތިލާންޖެހޭ ކަމަށާއި ކުދިންގެ ސަލާމަތަކީ އެންމެ އިސްކަންދޭންޖެހޭ ކަންތައް ކަމަށެވެ. މި ގާނޫނުގެ ދަށުން:
- 16 އަހަރުން ދަށުގެ ކުދިންނަށް ސޯޝަލް މީޑިއާ މަނާވާނެއެވެ. ނަމަވެސް، ކުންފުންޏަކަށް ކުދިން ރައްކާތެރިކުރުމުގެ ފުރިހަމަ ނިޒާމެއް އޮތްކަން ސާބިތުކޮށްދެވިއްޖެނަމަ އިސްތިސްނާ ފުރުސަތެއް ލިބިދާނެއެވެ.
- ބޮޑެތި މީހުންނަށް ޚާއްސަ ކޮންޓެންޓް ގެންގުޅޭ ޕްލެޓްފޯމްތަކުންވެސް ނުރައްކާތެރި މައުލޫމާތުތަކަށް ކުދިން ހުށަހެޅުން ހުއްޓުވަން ފިޔަވަޅު އަޅަންޖެހޭނެއެވެ.
- އޭއައި ބޭނުންކޮށްގެން ހަދާފައި ހުންނަ ފޮޓޯއާއި ވީޑިއޯ ފަދަ ތަކެތީގައި އެއީ އަމިއްލައަށް އުފައްދާފައިވާ އެއްޗެއްކަން އެނގޭނެ "ލޭބަލް" ޖަހަންޖެހޭނެއެވެ.
ކެނެޑާގެ ހެލްތު މިނިސްޓަރ މާޖޮރީ މިޝެލް ވިދާޅުވި ގޮތުގައި، މި ގާނޫނުގެ ސަބަބުން ޒުވާން ކެނެޑާގެ ރައްޔިތުންނަށް ރައްކާތެރި މާހައުލެއް ލިބި، އަމިއްލައަށް މީހުންނާ ބައްދަލުކޮށް، އެކުވެރިކަން ބަދަހިކޮށް، ކިޔެވުމަށް ސަމާލުކަންދީ، ހަގީގީ ދުނިޔޭގެ ހުނަރުތައް ދަސްކުރުމަށް މަގުފަހިވާނެއެވެ.
އޭއައި ޗެޓްބޮޓްތަކަށް ހަރުކަށި އުސޫލުތަކެއް: ޓަމްބްލަރ ރިޖްގެ ހާދިސާގެ އަސަރު
މި ބިލުގައި ސޯޝަލް މީޑިއާގެ އިތުރުން ޗްޓްޖީޕީޓީ ފަދަ އޭއައި ޗެޓްބޮޓްތައް ކޮންޓްރޯލް ކުރަން ވަނީ ހިމަނާފައެވެ. ޗެޓްބޮޓްތަކުން އިންސާނުންނަށް ގެއްލުންހުރި މައުލޫމާތު ދިނުން ހުއްޓުވުމާއި، ޚާއްސަކޮށް ޔޫޒަރަކު އަމިއްލައަށް މަރުވާން ނުވަތަ އެހެން މީހަކަށް ގެއްލުމެއް ދޭން އުޅޭކަން އެނގޭ ހާލަތްތަކުގައި ކަމާބެހޭ ފަރާތްތަކަށް ރިޕޯޓުކުރުމުގެ ދެފުށް ފެންނަ ނިޒާމެއް އޮންނަންޖެހޭނެއެވެ.
މި ފިޔަވަޅު އަޅާފައިވަނީ މިއަހަރުގެ އެޕްރީލް މަހު ކެނެޑާގެ ކުޑަ ރަށެއް ކަމަށްވާ "ޓަމްބްލަރ ރިޖް" ގައި ހިނގި ބަޑީގެ ހަމަލާއެއްގައި 9 މީހުން މަރުވި ހިތާމަވެރި ހާދިސާއަށް ފަހުއެވެ. އެ ހަމަލާދިން މީހާ ނުރައްކާތެރި ވާހަކަތަކެއް ދެއްކުމުން އޯޕަން އޭއައި އިން އޭނާގެ އެކައުންޓް މިދިޔަ އަހަރުގެ ޖޫން މަހު ބަންދުކުރި ނަމަވެސް، ކެނެޑާގެ ފުލުހުންނަށް އެކަން ރިޕޯޓުކޮށްފައެއް ނުވެއެވެ. އެހެންކަމުން އެ ކުންފުންޏަށް ވަނީ ބޮޑެތި ފާޑުކިއުންތަކެއް ކުރިމަތިވެފައެވެ.
ބޮޑެތި ޖޫރިމަނާތަކެއް
މި ގާނޫނު ތަންފީޒުކުރާނީ އަލަށް އުފައްދާ "ޑިޖިޓަލް ސޭފްޓީ ކޮމިޝަން" އިންނެވެ. ގާނޫނާ ޚިލާފުވާ ޓެކް ކުންފުނިތައް، އެ ކުންފުންޏެއްގެ މުޅި ދުނިޔޭގެ އާމްދަނީގެ 3 އިންސައްތައިން ނުވަތަ 10 މިލިއަން ކެނެޑާ ޑޮލަރުން ޖޫރިމަނާ ކުރުމުގެ ބާރު މި ކޮމިޝަނަށް ލިބިގެންވެއެވެ.
އޮޓާވާ ޔުނިވަރސިޓީގެ އެޑިއުކޭޝަން ޕްރޮފެސަރ ސަޗިން މަހާރާޖް ވިދާޅުވީ، މިއީ ރަނގަޅު މިސްރާބަކަށް އެޅުނު ފިޔަވަޅެއް ކަމަށާއި، ކުދިން ގާނޫނުން ރެކެން އުޅުނަސް، އަސްލު ބަދަލު ކުރަންވީ އެޕްލިކޭޝަންތައް މަސައްކަތްކުރާ ގޮތް ކަމަށެވެ.
ދުނިޔޭގެ އެހެން ގައުމުތަކަށް ބަލާއިރު، މިދިޔަ ޑިސެމްބަރު މަހު އޮސްޓްރޭލިއާ ވެގެންގޮސްފައިވަނީ 16 އަހަރުން ދަށުގެ ކުދިންނަށް ޓިކްޓޮކް، ޔޫޓިއުބް އަދި ސްނެޕްޗެޓް މަނާކުރި ފުރަތަމަ ގައުމަށެވެ. އަދި މިއަހަރުގެ މާރިޗު މަހު އިންޑޮނޭޝިއާ އިންވެސް ވަނީ މިފަދަ ގާނޫނެއް ހިންގަން ފަށާފައެވެ. ޔޫރަޕްގެ ގިނަ ގައުމުތަކުންވެސް މިފަދަ ފިޔަވަޅުތައް އަޅަން ދަނީ ތައްޔާރުވަމުންނެވެ.
