ކެނެޑާއިން ނިއުކްލިއަރ ހަކަތަ އުފެއްދުން އަވަސްކުރުމަށް އައު ސްޓްރެޓެޖީއެއް މިއަދު އިއުލާނުކޮށްފިއެވެ. މި ސްޓްރެޓެޖީގެ ދަށުން، ކުރިއަށް އޮތް ތަނުގައި 10 އައު ނިއުކްލިއަރ ރިއެކްޓަރު ބިނާކުރުމަށާއި، މިފަދަ މަޝްރޫއުތަކަށް ހުއްދަ ދިނުމުގެ ކަންކަން ފަސޭހަކުރުމަށް ވަނީ އަމާޒު ހިފާފައެވެ.
މި ސްޓްރެޓެޖީ އިއުލާނުކުރެއްވީ ކެނެޑާގެ ނެޗުރަލް ރިސޯސަސް މިނިސްޓަރު ޓިމް ހޮޖްސަންއެވެ. އަމާޒަކީ 2035 ވަނަ އަހަރާ ހަމައަށް ދެ ނިއުކްލިއަރ ރިއެކްޓަރު ގާއިމުކުރުމާއި، 2040 ވަނަ އަހަރާ ހަމައަށް އިތުރު ފަސް ރިއެކްޓަރު ރާވައި ނުވަތަ ބިނާކުރުމުގެ މަސައްކަތް ނިންމުމެވެ.
މި ސްޓްރެޓެޖީގައި އަލަށް އެއްވެސް މާލީ އެހީތެރިކަމެއް ހިމަނާފައިނުވި ނަމަވެސް، ސަރުކާރުން ބުނެފައިވަނީ 2027 ވަނަ އަހަރުގެ އޭޕްރީލް މަހާ ހަމައަށް، ނިއުކްލިއަރ މަޝްރޫއުތަކަށް ފެޑެރަލް ސަރުކާރުން އެހީތެރިވެދޭނެ ގޮތްތަކާއި ފައިސާ ހަމަޖައްސައިދޭނެ ވަސީލަތްތައް ކަނޑައަޅާނެ ކަމަށެވެ.
ކެނެޑާގެ ކަރަންޓުގެ 13% އުފައްދަނީ ނިއުކްލިއަރ ހަކަތައިންނެވެ. އަދި އެ ގައުމަކީ ދުނިޔޭގައި ދެވަނައަށް އެންމެ ގިނައިން ޔޫރޭނިއަމް އުފައްދާ ގައުމެވެ. ހަމައެއާއެކު، ދުނިޔޭގައި އެންމެ ފެންވަރު ރަނގަޅު ޔޫރޭނިއަމްގެ ރިޒާވް އެންމެ ގިނައިން ހުރީ ވެސް ކެނެޑާގައެވެ.
