ޑިމޮކްރެޓިކް ރިޕަބްލިކް އޮފް ކޮންގޯ އިން ރްވަންޑާގެ މައްޗަށް ބައިނަލްއަގްވާމީ ކޯޓުގައި ދައުވާކޮށްފިއެވެ. ކޮންގޯއިން ތުހުމަތުކުރާ ގޮތުގައި، ރްވަންޑާއިން ވަނީ ކޮންގޯގެ ތެރޭގައި ހަރަކާތްތެރިވާ ހަނގުރާމަވެރި ޖަމާއަތްތަކަށް އެހީތެރިވެ، އެ ގައުމުގައި ނަސދްލު ނައްތާލުމުގެ ޖެނޮސައިޑް ޖަރީމާތައް ހިންގާފައެވެ.
ދައުވާގެ މައިގަނޑު ކަންތައްތައް:
-
ބައިނަލްއަގްވާމީ ގާނޫނުތަކާ ޚިލާފުވުން: ކޮންގޯއިން ބުނާ ގޮތުގައި ރްވަންޑާއިން ވަނީ ޖެނޮސައިޑާއި ނަސްލީ ތަފާތުކުރުމާއި، އަނިޔާކުރުން ހުއްޓުވުމުގެ ބައިނަލްއަގްވާމީ އެއްބަސްވުންތަކާ ޚިލާފުވެފައެވެ.
-
ހަނގުރާމަވެރި ޖަމާއަތްތަކަށް އެހީވުން: ރްވަންޑާގެ ސިފައިން ކޮންގޯގެ ބިމަށް ވަދެ، ގާނޫނާ ޚިލާފު އަސްކަރީ ހަރަކާތްތައް ހިންގުމަށް ހަނގުރާމަވެރި ގްރޫޕްތަކަށް އެހީތެރިވެދޭ ކަމަށް ކޮންގޯއިން ތުހުމަތުކުރެއެވެ.
-
1996 އިން ފެށިގެން ހިނގަމުންދާ ޖަރީމާތައް: ކޮންގޯގެ އިރުމަތީ ސަރަހައްދުގައި 1996 އިން ފެށިގެން ރްވަންޑާއިން ހިންގަމުންދާ "ފުޅާ ދާއިރާއެއްގެ އިންސާނީ ހައްގުތަކާ ޚިލާފު" އަމަލުތަކުގެ ތެރޭގައި:
-
ގަސްތުގައި މީހުން މެރުމާއި (Massacres).
ގާނޫނުން ބޭރުން މީހުން މެރުން.
ޖިންސީ އަނިޔާކުރުމާއި، މީހުން ގެދޮރުން ބޭރުކުރުމާއި، ނަސްލީ ތަފާތުކުރުން ހިމެނެއެވެ.
-
-
ޓާގެޓް ކުރި ފަރާތްތައް: މި ހަމަލާތައް މައިގަނޑު ގޮތެއްގައި އަމާޒުކޮށްފައިވަނީ 1994 ވަނަ އަހަރު ރްވަންޑާގައި ހިނގި ހަމަނުޖެހުންތަކަށް ފަހު ކޮންގޯގައި ތިބި "ހޫޓޫ" ނަސްލުގެ މީހުންނަށާއި، ކޮންގޯގެ އެހެނިހެން ނަސްލުތަކަށް ކަމަށް އެ ގައުމުން ބުނެއެވެ.
ކޮންގޯއިން ބައިނަލްއަގްވާމީ ކޯޓުގައި އެދެމުންދަނީ، ރްވަންޑާއިން ހިންގާ މި އަމަލުތައް ވަގުތުން ހުއްޓުވުމަށް އަމުރުކުރުމަށާއި، މި ޖަރީމާތަކަށް ބަދަލު ދިނުމަށެވެ.
މި މައްސަލައަކީ އެފްރިކާގެ މެދުތެރޭގެ ސަރަހައްދުގައި އޮތް ބޮޑު ނުތަނަވަސްކަމެއް ފާޅުކޮށްދޭ ކަމެކެވެ. ރްވަންޑާއާއި ކޮންގޯއާ ދެމެދު އޮތް މި ދުޝްމަންކަމަކީ އެ ސަރަހައްދުގެ ސުލްހައަށް އަޅާފައިވާ ވަރަށް ބޮޑު ހުރަހެއް ކަމަށް ބައިނަލްއަގްވާމީ މަސްރަހު ދިރާސާކުރާ ފަރާތްތަކުން ފާހަގަކުރެއެވެ.
