އިރާގުގެ ބޮޑުވަޒީރު އަލީ އައްޒައިދީ، ވަނީ މަސްއޫލުވެރިން ކޮރަޕްޝަނާއި ނާޖާއިޒު ގޮތުގައި މުއްސަނދިވުމުގެ މައްސަލަތަކުގެ ތަހުގީގުން އަނބުރާ ހޯދާ ފައިސާ ޖަމާކުރުމަށްޓަކައި ޚާއްސަ ބޭންކް އެކައުންޓެއް ހެދުމަށް އެ ގައުމުގެ މިނިސްޓްރީ އޮފް ފައިނޭންސަށް އަމުރުކުރައްވައިފައެވެ. ސަރުކާރުގެ ތަރުޖަމާނު ހައިދަރު އަލްއަބޫދީ ހާމަކުރެއްވި ގޮތުގައި، ދައުލަތުގެ ފައިސާ އާއި މުދާ ރައްކާތެރިކުރުމަށާއި ކޮރަޕްޝަނާ ދެކޮޅަށް ކުރާ މަސައްކަތްތަކަކީ ސަރުކާރުން ވަރަށް ބޮޑު އަހައްމިއްޔަތުކަމެއް ދޭ ކަމެކެވެ.
އިރާގުގެ ކޮރަޕްޝަނާ ދެކޮޅަށް މަސައްކަތްކުރާ އިދާރާ ހައިއަތުއް ނަޒާހާ އިން ބުނިގޮތުގައި، ގައުމުން ބޭރުގައި ހުރި އިރާގުގެ ގިނަ އަދަދެއްގެ ފައިސާ މިހާރު ވަނީ ހިފަހައްޓާފައެވެ. މީގެ ސަބަބުން ކޮރަޕްޝަނުގެ އަމަލުތައް ހިންގި މީހުންނަށް އެ ފައިސާ ބޭނުންކުރުމަށް ވަނީ ހުރަސްއެޅިފައެވެ. އަދި މި ފައިސާ އަނބުރާ ގައުމަށް ހޯދުމަށްޓަކައި ގާނޫނީ ގޮތުން ކުރަންޖެހޭ މަސައްކަތްތައް ވުޒާރާއަކާ ގުޅިގެން ދަނީ ކުރަމުންނެވެ. މީގެ އިތުރުން، ފައިސާ އަނބުރާ ހޯދުމާ ބެހޭ އާ ގާނޫނެއްގެ ކޮޕީއެއް ވަރަށް އަވަހަށް ގައުމުގެ ބަރުލަމާނަށް ހުށަހަޅާނެއެވެ.
މި ސިޔާސަތުގެ ދަށުން، ކޮރަޕްޝަނުގެ ތުހުމަތުގައި ގިނަ އަދަދެއްގެ މީހުން ހައްޔަރުކުރުމުގެ ބޮޑު ހަރަކާތެއް އިރާގުގެ ވެރިރަށް ބަޣުދާދުގައި ވަނީ ހިންގާފައެވެ. މިގޮތުން ހައްޔަރުކުރެވުނު މީހުންގެ ތެރޭގައި ގައުމުގެ މިހާރުގެ ޕާލަމެންޓްގެ މެންބަރުންނާއި، ކުރީގެ މެންބަރުންގެ އިތުރުން ސަރުކާރުގެ މަތީ ފަންތީގެ ބައެއް މަސްއޫލުވެރިން ހިމެނެއެވެ. މި ހައްޔަރުކުރުންތައް ހިންގާފައިވަނީ މިނިސްޓްރީއެއްގެ އިސްވެރިއެއްގެ ފަރާތުން ލިބުނު މައުލޫމާތާއި އިއުތިރާފުތަކެއްގެ މައްޗަށް ބިނާކޮށް، ކޯޓު އަމުރުގެ ދަށުން ގާނޫނީ ހަމަތަކުގެ މަތިންނެވެ.
ސަރުކާރުން ބުނިގޮތުގައި ކޮރަޕްޝަނާ ދެކޮޅަށް ހިންގާ މި ހަރަކާތްތަކަކީ އެއްވެސް މީހަކަށް ބެލުމެއްނެތި، ދައުލަތުގެ ގާނޫނީ ބާރު ދެމެހެއްޓުމަށްޓަކައި ކުރިއަށްގެންދާ މުހިންމު މަސައްކަތްތަކެކެވެ.
