ރާއްޖޭގެ މާލީ ނިޒާމަށް އައި ބޮޑު އިންގިލާބީ ބަދަލު، މޯލްޑިވްސް އިންސްޓަންޓް ޕޭމަންޓް ސިސްޓަމް "ފަވަރަ" މެދުވެރިކޮށް ކުރި މުޢާމަލާތްތަކުގެ ޖުމްލަ ޢަދަދު 100 ބިލިޔަން ރުފިޔާއަށް އަރައިފިއެވެ. 2023 ވަނަ އަހަރުގެ އޮގަސްޓް މަހު ތައާރަފުކުރި މި ނިޒާމަކީ، ރާއްޖޭގެ ކޮންމެ ބޭންކަކުން އަނެއް ބޭންކަކަށް ވަގުތުން ފައިސާ ފޮނުވޭނެ އިންތިޒާމު ހަމަޖައްސައިދޭ ރައްކާތެރި މާލީ މާހައުލެކެވެ.
ޕޭމަންޓް މޯލްޑިވްސްގެ ސީއޯއޯ މަރިޔަމް ޝަބާ ވިދާޅުވި ގޮތުގައި، މި ސިސްޓަމްގެ ބޭނުން ހިފާ މިންވަރު އިތުރުވެފައިވެއެވެ. މިހާރު ކޮންމެ ދުވަހަކު ވެސް 71،000 އަށް ވުރެ ގިނަ މުޢާމަލާތް ފަވަރަ މެދުވެރިކޮށް ހިންގައެވެ. "އޭޕްރީލް މަހު އަޅުގަނޑުމެން މި ހާސިލްކުރީ 100 ބިލިޔަން ރުފިޔާގެ މުޢާމަލާތް. މީގެ މާނައަކީ އެއް ބޭންކުން އަނެއް ބޭންކަށް އިންސްޓަންޓްލީ ފައިސާގެ ޚިދުމަތްތައް ފަސޭހަކަމާއެކު ރައްޔިތުންނަށް ލިބެމުންދާކަން،" ޝަބާ ވިދާޅުވިއެވެ.
ފަވަރަ ސިސްޓަމް ފަރުމާކޮށްފައިވަނީ ބޭންކް އެކައުންޓްތައް ހުރި ފަރާތްތަކުގެ އިތުރުން، މާލީ ނިޒާމާ މީގެ ކުރިން ބީރައްޓެހި ފަރާތްތަކަށް ވެސް ފަސޭހައިން ބޭނުންކުރެވޭނެހެންނެވެ.
މި ނިޒާމުގެ މުހިންމު ސިފަތަކުގެ ތެރޭގައި:
- އިންސްޓަންޓް ޓްރާންސްފާ: މަދު ސިކުންތުކޮޅެއްގެ ތެރޭގައި ފައިސާ ޖަމާވުން.
- ފަވަރަ ރިކުއެސްޓް: އަމިއްލަ ފަރާތްތަކާއި ވިޔަފާރިތަކަށް ބިލް ފޮނުވައިގެން ފައިސާ ހޯދޭނެ ގޮތް ހަމަޖެހުން.
- ފުޅާ ދާއިރާއެއްގައި ބޭނުންކުރެވުން: ކޮންމެ ބޭންކެއްގައި އެކައުންޓް ހުޅުވާފައި ހުރި ކަމުގައި ވިޔަސް، ހުރިހާ ފަރާތްތަކަށް އެއް ހަމައެއްގައި މި ޚިދުމަތް ލިބުން.
ޕޭމަންޓް މޯލްޑިވްސްއިން މިހާރު ގެންދަނީ މި ޚިދުމަތްތައް އިތުރަށް ފުޅާކުރުމުގެ މަސައްކަތް ކުރަމުންނެވެ. މިގޮތުން، ހުޅުމާލެ ސެންޓްރަލް ޕާކުގައި މިހާރު ކުރިއަށްދާ މޯލްޑިވްސް ފައިނޭންޝަލް އެކްސްޕޯގެ ތެރެއިން ވެސް ފަވަރައާ ގުޅޭ އިތުރު މަޢުލޫމާތުތައް ލިބޭނެ އިންތިޒާމު ވަނީ ހަމަޖައްސާފައެވެ.
