ކުށުގެ ވެއްޓަށް ހުށަހެޅޭ ކުޑަކުދިންނާއި ޒުވާނުން ރީހެބިލިޓޭޓްކޮށް، މުޖުތަމަޢަށް ބޭނުންހިފޭ ފަރުދުންގެ ގޮތުގައި އަނބުރާ ގެނައުމަށް ސަރުކާރުން ހިންގާ އެންމެ ބޮޑު މަޝްރޫޢު، "ހޯޕް އައިލެންޑް"ގެ ޢަމަލީ މަސައްކަތް ވަރަށް އަވަހަށް ފެށޭނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. ރައީސްގެ "ދަ ޕަލްސް" ޕޮޑްކާސްޓް ސިލްސިލާގައި ވާހަކަފުޅު ދައްކަވަމުން ފާހަގަކުރެއްވި ގޮތުގައި، މި މަޝްރޫޢަކީ ދައުލަތުން ބޮޑު ޚަރަދެއް ކޮށްގެން، ކުށްކުރުން ހުއްޓުވުމަށް ދާއިމީ ހައްލެއް ހޯދުމަށް ކުރާ މަސައްކަތެއެވެ.
އުތުރު ތިލަފަޅުން 15 ހެކްޓަރުގެ ބިން ހިއްކައިގެން ތަރައްޤީކުރާ މި ރަށަކީ 700 މީހުންގެ ޖާގައަށް ޚާއްސަ، އެންމެ ޒަމާނީ ވަސީލަތްތައް ހުންނާނެ މަރުކަޒެކެވެ.
މި މަޝްރޫޢުގެ ތެރެއިން ތަރައްޤީކުރެވޭނެ މުހިންމު ބައިތައް:
- ތަޢުލީމާއި ތަމްރީން: އަސާސީ ތަޢުލީމާއި ދީނީ ތަރުބިއްޔަތު އަދި އެކި ކަހަލަ ފަންނީ ތަމްރީންތައް.
- ނަފްސާނީ ދުޅަހެޔޮކަން: ސައިކޯ ސޯޝަލް އިންޓަވެންޝަން އާއި ތެރަޕީ ޕްރޮގްރާމްތައް.
- ކުޅިވަރާއި ޞިއްޙަތު: ކުޅިވަރު ކުޅޭނެ ސަރަޙައްދުތަކާއި ޞިއްޙީ ޚިދުމަތް ފޯރުކޮށްދޭ މަރުކަޒު.
ރައީސް ވިދާޅުވީ ޕްރޮޕޯޒަލްތައް އިވެލުއޭޓް ކުރުމުގެ މަރުހަލާ މިހާރު ކުރިއަށްދާ ކަމަށާއި، މި ދައުރުގެ ތެރޭގައި މި މަޝްރޫޢުގެ ނަތީޖާ ފެނިގެންދާނެ ކަމަށެވެ. "މިހެން ކުރާ ކޮންމެ ކަމަކީވެސް ރަނގަޅު ކަމަކަށްވާން ބޭނުންވަނީ،" ރައީސް ވިދާޅުވިއެވެ. މި މަރުކަޒަށް ގެންދާ ކުދިން 18 އަހަރު ވަންދެން އެތަނުގައި ތިބޭނެއެވެ. އޭގެ ފަހުން، ދިވެހި ސިފައިން ނުވަތަ ފުލުހުންގެ ޚިދުމަތުގައި ވަކި މުއްދަތަކަށް ޚިދުމަތް ކުރުމުގެ ފުރުސަތު ދިނުމަކީ ވެސް ސަރުކާރުގެ ޕްލޭނެކެވެ. ރައީސް ތަކުރާރުކުރެއްވި ގޮތުގައި، ކުށްކުރުން ހުއްޓުވޭނީ ހަމައެކަނި ފިޔަވަޅު އަޅައިގެން ނޫނެވެ. ބޯހިޔާވަހިކަމާއި، ޒުވާނުންނަށް އާމްދަނީ ލިބޭނެ ފުރުސަތުތައް ފަހިކޮށްދީ، މުޖުތަމަޢުގެ އަސްލު މައްސަލަތައް ހައްލުކޮށްގެން ކަމަށް އެ މަނިކުފާނު ވިދާޅުވިއެވެ.
