ދިވެހިރާއްޖެއާއި ޖަޕާނާ ދެމެދު އޮތް ވިޔަފާރީގެ ގުޅުން އިތުރަށް ބަދަހިކޮށް، ރާއްޖޭގެ ވިޔަފާރީގެ މާހައުލަށް ޖަޕާނުގެ އިންވެސްޓަރުންގެ ޝައުގުވެރިކަން ގެނައުމުގެ އަމާޒުގައި، މޯލްޑިވްސް އިންވެސްޓްމަންޓް ވެބިނާއެއް ބޭއްވުމަށް ނިންމައިފިއެވެ. މި މަހުގެ 23 ވަނަ ދުވަހު ބޭއްވުމަށް ހަމަޖެހިފައިވާ މި ޚާއްސަ ވެބިނާއަކީ ރާއްޖޭގެ މިނިވަން ދުވަހާ ދިމާކޮށް، ޖަޕާނުގައި ހުންނަ ދިވެހި އެމްބަސީ އާއި ޖަޕާން އެކްސްޓަރނަލް ޓްރޭޑް އޮގަނައިޒޭޝަން (ޖެޓްރޯ) ގުޅިގެން އިންތިޒާމުކުރާ ހަރަކާތެކެވެ.
ރާއްޖޭގައި އިންވެސްޓްކުރުމަށް ހުރި ފުރުސަތުތަކާއި، ރާއްޖޭގެ އިގްތިސާދީ މަންޒަރު ޖަޕާނުގެ ވިޔަފާރިވެރިންނަށް ތަފްސީލުކޮށްދިނުމަކީ މި ވެބިނާގެ މައިގަނޑު މަގްސަދެވެ. ޖަޕާނަށް ކަނޑައަޅުއްވާފައި ހުންނަވާ ދިވެހި ސަފީރު އަޙްމަދު މަޚްލޫފް ވިދާޅުވި ގޮތުގައި، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިސްނެންގެވުމުގެ މަތިން ވިޔަފާރިތަކަށް ފަހިވާނެހެން ޤާނޫނުތަކަށް ގެނެވުނު މުހިންމު ބަދަލުތަކުގެ މައުލޫމާތު މި ވެބިނާގެ ތެރެއިން އިންވެސްޓަރުންނާ ހިއްސާކުރެވޭނެއެވެ.
"ރާއްޖެއަކީ ބޭރުގެ އިންވެސްޓަރުންނަށް އިތުބާރު ހުރި އަދި ފަހި މާހައުލަކަށް ހެދުމަށް ސަރުކާރުން ކުރަމުންދާ މަސައްކަތްތަކުގެ މައުލޫމާތު ޖަޕާނުގެ ވިޔަފާރިވެރިންނަށް ފޯރުކޮށްދިނުމަކީ، ދެ ޤައުމުގެ ދެމެދުގައި އޮތް ވިޔަފާރީގެ ގުޅުން އިތުރު ހަރުފަތަކަށް ގެންދިއުމަށް ލިބޭނެ މުހިންމު ފުރުސަތެއް،" މަޚްލޫފް ވިދާޅުވިއެވެ.
މި ވެބިނާގައި ދިވެހިރާއްޖޭގެ ފަރާތުން އިކޮނޮމިކް މިނިސްޓަރު މުޙައްމަދު ސަޢީދުއާއި ފޮރިން މިނިސްޓަރު އިރުތިޝާމް އާދަމް ބައިވެރިވެވަޑައިގެން ވާހަކަފުޅު ދައްކަވާނެއެވެ. މީގެ އިތުރުން ޖަޕާނުގެ އިކޮނޮމިކް މިނިސްޓްރީއާއި، ޖައިކާ އަދި ޖެޓްރޯގެ އިސްވެރިންގެ ފަރާތުން ވެސް މި ވެބިނާގައި ބައިވެރިވެ، ވިޔަފާރީގެ ގުޅުންތައް ބަދަހިކުރުމާ ގުޅޭގޮތުން މަޝްވަރާކުރެވޭނެއެވެ.
ޖެޓްރޯގެ މެދުވެރިކޮށް، ޖަޕާނުގެ ގިނަ އަދަދެއްގެ ވިޔަފާރިތަކަކަށް މި ވެބިނާގައި ބައިވެރިވުމަށް ދައުވަތު އަރުވާފައިވާއިރު، މިއީ ރާއްޖޭގެ އިންވެސްޓްމަންޓް ދާއިރާއަށް އާ އުންމީދުތަކެއް ގެނެސްދޭނެ ކަމެއް ކަމަށް ބެލެވެއެވެ.
