އިތިއޯޕިއަން ރާއްޖެއަށް: އެޑިސް އަބާބާ އަދި މާލެ ގުޅުވާލަދޭ ތާރީހީ އެއްބަސްވުމެއް!

ދުނިޔޭގެ އެކި ކަންކޮޅުތަކުން ފަތުރުވެރިން އަތުލައިގަތުމަށް ރާއްޖެއިން ކުރަމުންދާ އިންގިލާބީ މަސައްކަތުގެ ތެރެއިން، އެފްރިކާ ބައްރުގެ އެންމެ ބޮޑު އަދި އެންމެ ނުފޫޒުގަދަ އޭވިއޭޝަން ޖަޔަންޓު ކަމަށްވާ އިތިއޯޕިއާއާއެކު ތާރީޚީ ވައިގެ ދަތުރުފަތުރުގެ އެއްބަސްވުމެއްގައި ދިވެހިރާއްޖެއިން ސޮއިކޮށްފިއެވެ.

ފަތުރުވެރިކަމާއި މަދަނީ އުދުހުންތަކާ ބެހޭ ވުޒާރާގައި ބޭއްވި ހާއްސަ ރަސްމިއްޔާތެއްގައި، ރާއްޖޭގެ ފަރާތުން މި އެއްބަސްވުމުގައި ސޮއިކުރެއްވީ ވަޒީރު މުހައްމަދު އަމީނެވެ. އިތިއޯޕިއާ ސަރުކާރުގެ ފަރާތުން ސޮއިކުރެއްވީ އެ ގައުމުގެ ސިވިލް އޭވިއޭޝަން އޮތޯރިޓީގެ ޑިރެކްޓަރ ޖެނެރަލް ޔޮއާނަސް އަބޭރާ ބެލެޓޭއެވެ.

އެފްރިކާގެ "އޭވިއޭޝަން ސުޕަޕަވަރު": އިތިއޯޕިއަން އެއާލައިންސް

މި އެއްބަސްވުމާއެކު ރާއްޖޭގެ އޭވިއޭޝަން މާކެޓަށް ވަދެގެން މިދަނީ އާދައިގެ އެއާލައިނެއް ނޫނެވެ. އިތިއޯޕިއަން އެއާލައިންސް އަކީ އެފްރިކާ ބައްރުގައި އޮތް އެންމެ ބޮޑު، އެންމެ ފައިދާ ބޮޑު އަދި އެންމެ ފުޅާ ވިއުގައެއް އޮތް ގައުމީ އެއާލައިނެވެ.

• ބޮޑު ފްލީޓާއި ވިއުގަ: 140 އަށްވުރެ ގިނަ ބޯއިންގް 787 ޑްރީމްލައިނާ އަދި އެއާބަސް އޭ350 ފަދަ އެންމެ ޒަމާނީ ބޯޓުފަހަރު ބޭނުންކޮށްގެން ދުނިޔޭގެ 130 އަށްވުރެ ގިނަ ބައިނަލްއަގުވާމީ މަންޒިލަށް ދަތުރުތައް ބާއްވައެވެ.

• މެގަ ހަބް "އެޑިސް އަބާބާ": އެއާލައިންގެ މައި މަރުކަޒު، ބޯލޭ އިންޓަނޭޝަނަލް އެއާޕޯޓަކީ މުޅި އެފްރިކާއާއި، ޔޫރަޕް، އެމެރިކާ އަދި މިޑްލް އީސްޓް ގުޅުވާލަދޭ އެންމެ ބޮޑު އެއް އޭވިއޭޝަން ހަބެވެ.

އިތިއޯޕިއަން އެއާލައިންސްއިން ވެރިރަށް އެޑިސް އަބާބާއިން މާލެއަށް ސީދާ ދަތުރުތައް ފެށުމަށް ތައްޔާރުވަމުންދާއިރު، މިއީ ރާއްޖޭގެ ގައުމީ އެއާލައިން "މޯލްޑިވިއަން" އަށްވެސް އެފްރިކާގެ މާކެޓަށް ވަނުމަށް ހުޅުވިގެންދިޔަ ރަން ފުރުސަތެކެވެ.

"އެފްރިކާގެ 6 ވަނަ ބައިވެރިޔާ" – އިގުތިސާދީ ވިލުންވެރިކަން

މި ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރު އަމީން ފާހަގަކުރެއްވި ގޮތުގައި، އިތިއޯޕިއާއަކީ މިސްރު، މޮރިޝަސް، ރުވާންޑާ، ސީޝެލްސް އަދި ސައުތު އެފްރިކާއަށްފަހު ރާއްޖެއިން މިފަދަ އެއްބަސްވުމެއް އެކުލަވާލި އެފްރިކާގެ 6 ވަނަ ގައުމެވެ.

"މިއީ ބައިނަލްއަގުވާމީ މަސްރަހަށް އަންނަ ލޮޅުންތަކުން ރާއްޖޭގެ އިގުތިސާދު ސަލާމަތްކޮށް، ދުނިޔޭގެ މައި ހަބް-އެއާޕޯޓުތަކުން ރާއްޖެއަށް ސީދާ ދަތުރުތައް ފެށުމަށް ރައީސުލްޖުމްހޫރިއްޔާ ގެންގުޅުއްވާ ހަރުދަނާ ސިޔާސަތުގެ ދަށުން ހާސިލުވި މުހިންމު ނަތީޖާއެއް،" މިނިސްޓަރު މުހައްމަދު އަމީން

އެފްރިކާގެ އެންމެ ހަލުވިކަމާއެކު ކުރިއަރަމުން އަންނަ އިގުތިސާދު ކަމަށްވާ އިތިއޯޕިއާއާއެކު ވެވުނު މި އެއްބަސްވުމަކީ، ދުނިޔޭގެ އިގުތިސާދީ އޮއިވަރަށް އަންނަ ބަދަލުތަކާއެކުވެސް ރާއްޖޭގެ ފަތުރުވެރިކަމުގެ ސިނާޢަތް ނުގުޑައި ދެމެހެއްޓުމަށް އެޅުނު ސްޓްރެޓީޖިކް މުހިންމު ފިޔަވަޅެކެވެ.