ތިލަމާލެ ބްރިޖު މަތިން މާލެއިން ވިލިމާލެއަށް ތާރީޚީ ހިނގާލުން

ހަވީރު 5:15 ހާއިރު ފެށިގެންދިޔަ މި ހާއްސަ ހިނގާލުމުގައި ރައީސުލްޖުމްހޫރިއްޔާގެ އަރިހުގައި ވަޒީރުންގެ މަޖިލީހުގެ މެންބަރުންނާއި، ސަރުކާރުގެ އިސްވެރިންގެ އިތުރުން ނޫސްވެރިން ވަނީ ބައިވެރިވެފައެވެ. މިއީ ތިލަމާލެ ބްރިޖުގެ މަސައްކަތްތައް މީޑިއާއަށް މިފަދަ ގޮތަކަށް ހުޅުވާލައި، ބްރިޖު މަތިން ފައިމަގުގައި ދަތުރުކުރުމުގެ ފުރުސަތު ދިން ފުރަތަމަ ފަހަރެވެ.

"ގްރޭޓަރ މާލެ ކަނެކްޓިވިޓީ ޕްރޮޖެކްޓް" ގެ ނަމުގައި ކުރިއަށްދާ 6.7 ކިލޯމީޓަރުގެ މި ބިޔަ މަޝްރޫއަކީ މާލެ، ވިލިމާލެ، ތިލަފުށި އަދި ގުޅީފަޅު އެކީ ގުޅުވާލުމަށް ހިންގާ މަޝްރޫއެކެވެ. މިއީ އިންޑިއާ ސަރުކާރުގެ 100 މިލިއަން އެމެރިކާ ޑޮލަރުގެ ހިލޭ އެހީއާއި، 400 މިލިއަން ޑޮލަރުގެ ލައިން އޮފް ކްރެޑިޓްގެ އިތުރުން ދިވެހި ސަރުކާރުގެ މާލީ ބައިވެރިވުމާއެކު ކުރިއަށްގެންދާ ތަރައްގީގެ މުހިންމު ހަރުމުދަލެކެވެ. ކުރީގެ އެމްޑީޕީ ސަރުކާރުން ފެށި މި މަޝްރޫއުގެ މަސައްކަތް އެ ސަރުކާރު ނިމުނުއިރު ކުރިއަށްގޮސްފައިވަނީ އެންމެ 27 އިންސައްތައެވެ. ނަމަވެސް، ރައީސް މުއިއްޒު ވެރިކަމާ ހަވާލުވެވަޑައިގަތުމަށްފަހު މަޝްރޫއުގެ ދުވެލި ވަރަށް ބޮޑަށް އަވަސްކޮށް، މިއަދު މިވަނީ މާލެއާއި ވިލިމާލެ ސީދާ އެއްގަމު މަގުން ގުޅާލުމުގެ ބޮޑު ކާމިޔާބީ ހޯދާފައެވެ.

ދިވެހިރާއްޖޭގެ އިންޖިނޭރުންގެ ދުވަހާ ދިމާކޮށް ކުރެއްވި މި ޒިޔާރަތުގައި ރައީސް މުއިއްޒު ވަނީ މަޝްރޫއުގެ ފަންނީ ބޭފުޅުންނާ ބައްދަލުކުރައްވައި، މަސައްކަތުގެ އެންމެ ފަހުގެ މައުލޫމާތު އޮޅުންފިލުއްވާފައެވެ. އެއަށްފަހު ނޫސްވެރިންނަށް މައުލޫމާތު ދެއްވަމުން އެމަނިކުފާނު ވިދާޅުވީ، ތިލަމާލެ ބްރިޖަކީ ދިވެހިރާއްޖެއާއި އިންޑިއާއާ ދެމެދުގައި އޮތް ވަރުގަދަ ގާތް ގުޅުން ރަމްޒުކޮށްދޭ އަގުހުރި އުމުރާނީ ބިނާއެއް ކަމަށެވެ. އަދި މި ރިޔާސީ ދައުރުގެ ތެރޭގައި ބްރިޖުގެ މަސައްކަތްތައް އެއްކޮށް ނިންމައި، އާންމު ރައްޔިތުންނަށް ދަތުރުފަތުރުގެ ހިދުމަތް ރަސްމީކޮށް ހުޅުވާލުމަކީ ސަރުކާރުގެ އިސް އަމާޒެއް ކަމަށްވެސް ވިދާޅުވިއެވެ.

ރައީސް މުއިއްޒަކީ އަމިއްލަފުޅަށް ސިވިލް އިންޖިނިއަރިންގ ދާއިރާއިން މަތީ ތައުލީމު ހާސިލުކުރައްވައިގެން ހުންނެވި ބޭފުޅަކަށްވާއިރު، އެމަނިކުފާނު ވަނީ އިްޔެ ހެނދުނު ސިނަމާލެ ބްރިޖަށްވެސް ޒިޔާރަތް ކުރައްވާފައެވެ. އެއީ އެ ބްރިޖަށް 8 އަހަރު ފުރުމުގެ މުނާސަބަތާ ގުޅުވައިގެން ކުރެއްވި ޒިޔާރަތެކެވެ. ސިނަމާލެ ބްރިޖު ބިނާކުރިއިރު އޭރުގެ ހައުސިންގ މިނިސްޓަރުގެ މަގާމުގައި ހުންނެވީ ވެސް ރައީސް މުއިއްޒެވެ.

ތިލަމާލެ ބްރިޖު އެޅުމަށް ކަނޑުގެ އޮއިވަރާއި ފުންމިނުގެ ގޮންޖެހުންތަކާ ކުރިމަތިލައިގެން ކުރި އިންޖިނިއަރިންގ މަސައްކަތުގެ މުޅި ކްރެޑިޓް ލިބެނީ އިންޑިއާގެ ކޮންޓްރެކްޓަރު އެފްކޮންސް އިންފްރާސްޓްރަކްޗަރ އަށެވެ. ދުނިޔޭގެ އެކި ކަންކޮޅުތަކުގައި އިންޖިނިއަރިންގގެ އުނދަގޫ ބޮޑެތި މަޝްރޫއުތައް ހިންގައިގެން މަގުބޫލުކަން ހޯދާފައިވާ މި ކުންފުންޏަކީ ދެކުނު އޭޝިއާ، މެދުއިރުމަތި، އެފްރިކާ އަދި ޔޫރަޕްގެ 30 އަށްވުރެ ގިނަ ގައުމުގައި ހަރަކާތްތެރިވަމުން އަންނަ ބައިނަލްއަގުވާމީ ބޮޑު ކުންފުންޏެކެވެ.

އެފްކޮންސްގެ ތާރީހަށް ބަލާއިރު، ގުދުރަތީ ގޮތުން މަސައްކަތްކުރަން އެންމެ އުނދަގޫ މާހައުލުތަކުގައި ބޮޑެތި މަޝްރޫއުތައް ހިންގުމުގެ މާޒީއެއް އެ ކުންފުންޏަށް އޮތްކަން ފާހަގަކޮށްލެވެއެވެ:

ކޯރުތަކުގެ އަޑިން ޓަނަލް ކޮނުމާއި، ފުން ކޭންޔަންތަކުގެ މަތީގައި އެންމެ އުސް ބްރިޖުތައް ބިނާކުރުމާއި، އަދި ރާއްޖެ ފަދަ ޖަޒީރާ ގައުމުތަކުގެ ފުން ކަނޑުތަކުގައި ތަމްބުޖަހައިގެން ބްރިޖު އެޅުމުގައި އެފްކޮންސްއިން ވަނީ ގުދުރަތީ ގޮންޖެހުންތަކަށް ނުބަލައި، އިންޖިނިއަރިންގގެ ދާއިރާއިން އެ ކުންފުނީގެ ގާބިލުކަން ސާބިތުކޮށްދީފައެވެ.