ޗައިނާއިން ޓިބެޓް އޮޓޮނޮމަސް ރީޖަންގައި 167 ބިލިއަން އެމެރިކާ ޑޮލަރު ޚަރަދުކޮށްގެން ފެނުން ކަރަންޓު އުފައްދާ ދުނިޔޭގެ އެންމެ ބޮޑު ހައިޑްރޯޕަވާ ޑޭމް ބިނާކުރުމުގެ މަޝްރޫއު ކުރިއަށްދާއިރު، މީގެ ސަބަބުން އެ ސަރަހައްދުގެ ތިމާވެއްޓަށާއި ޓިބެޓުގެ މުއްސަނދި ސަގާފަތަށް އިއާދަނުކުރެވޭ ފަދަ ބޮޑެތި ގެއްލުންތަކެއް ކުރިމަތިވެދާނެ ކަމުގެ އިންޒާރު ސައިންސްވެރިންނާއި އިންސާނީ ހައްގުތަކަށް މަސައްކަތްކުރާ ބައިނަލްއަގުވާމީ ޖަމާއަތްތަކުން ދީފިއެވެ.
ޓިބެޓުގެ ޔާލުންގް ސަންގްޕޯ ކޯރުގައި 60 ގިގަވޯޓުގެ ކަރަންޓު އުފެއްދުމުގެ ގާބިލުކަން ލިބިގެންވާ ގޮތަށް ތައްޔާރު ކުރާ މި ސުޕަޑޭމް ގާއިމުކުރާ ސަރަހައްދަކީ ބިންހެލުން އައުމުގެ ނުރައްކާ އިންތިހާއަށް ބޮޑު، އަދި ބިންގަނޑު ކަނޑައިގެން ދިއުމާއި ހިމާލިޔާގެ ގަނޑުފެންތައް ގިރުމުގެ ފުރުސަތު އޮތް ނާޒުކު ހިސާބެކެވެ. ޗައިނާގެ އަމިއްލަ ޖިއޮލޮޖިސްޓުން ވެސް ވަނީ މިއީ ގުދުރަތީ ކާރިސާއަކަށް މަގުފަހިވެދާނެ ކަމެއް ކަމަށް ބުނެ އިންޒާރުދީފައެވެ. ނަމަވެސް، ޗައިނާ ސަރުކާރުން ދަނީ ތިމާވެށީގެ އިލްމީ އިރުޝާދުތަކަށް ފަރުވާލެއް ނެތި، އިގްތިސާދީ އަދި ކަރަންޓު އުފެއްދުމުގެ މަގުސަދުތައް ހާސިލުކުރުމަށްޓަކައި މަޝްރޫއުގެ މަސައްކަތް ބާރަށް ކުރިއަށް ގެންދަމުންނެވެ.
މި ބިޔަ މަޝްރޫއުގެ ސަބަބުން ޗައިނާގެ މައި ސަރަހައްދުތަކުން އެތައް ހާސް މަސައްކަތްތެރިންނެއް ޓިބެޓަށް ހިޖުރަކުރާނެ ކަމަށް ބެލެވެއެވެ. މީގެ ސަބަބުން ޓިބެޓުގެ އާބާދީގެ ނިސްބަތަށް ބޮޑެތި ބަދަލުތަކެއް އައިސް، އެމީހުންގެ ތާރީހީ އަދި ސަގާފީ ސަރަހައްދުތަކާއި ބިންތައް ނެތިގެންދިއުމުގެ ބިރު ވަނީ ބޮޑުވެފައެވެ. މީގެއިތުރުން، ސަރަހައްދީ ސިޔާސީ މަސްރަހަށް ބަލާއިރު، ކޯރުގެ ތިރީގައިވާ އިންޑިއާއާއި ބަންގްލާދޭޝް ފަދަ ގައުމުތަކަށް ލިބޭ ފެނުގެ މިންވަރު ކޮންޓްރޯލްކުރުމުގެ ބާރު ޗައިނާއަށް ލިބި، އެ ގައުމުތަކުގެ ފެނުގެ ރައްކާތެރިކަމަށް ވެސް ނުރައްކާތެރި ގޮންޖެހުންތަކެއް ކުރިމަތިވާނެއެވެ.
މިވާހަކަތައް އާންމު ވެފައި މި ވަނީ، ޓިބެޓްގެ ކިޔޮރޮންގް ސަރަހައްދަށް އައި ބާރުގަދަ ފެންބޮޑުވުމުގެ ކާރިސާގައި ލިބުނު ގެއްލުންތަކުގެ ހަގީގީ މައުލޫމާތު ޗައިނާ ސަރުކާރުން ފޮރުވަމުންދާ ކަމަށް ބައިނަލްއަގުވާމީ މީޑިއާއިންނާއި ޓިބެޓްގެ ހައްގުތަކަށް މަސައްކަތްކުރާ ފަރާތްތަކުން ތުހުމަތުކޮށްފައިވާ ދަނޑި ވަޅެއްގައެވެ.
މި ފެންބޮޑުވުން އެ ސަރަހައްދުން ފެށިގެން ނޭޕާލްގެ އިމުން އެތެރެއަށް ފެންތައް ފެތުރިގެން ގޮސް، ނޭޕާލުން އެތައް ސަތޭކަ މީހުން މަރުވެފައިވާ އިރު، ޗައިނާއިން ރަސްމީކޮށް ބުނެފައިވަނީ މަރުވީ 7 މީހުން ކަމަށާއި 554 މީހުން ގެއްލިފައިވާ ކަމަށެވެ. ނަމަވެސް، ޗައިނާގެ ސޯޝަލް މީޑިއާއިން މި ކާރިސާއާ ގުޅޭ ވީޑިއޯތަކާއި އަސަރުކުރި މީހުންގެ ޕޯސްޓްތައް ވަނީ ސެންސަރުކޮށް، ނަގާފައެވެ.
ޓިބެޓަކީ ބޭރުގެ ނޫސްވެރިންނަށް ވަދެއުޅުން މަނާ ސަރަހައްދަކަށް ވުމުން، އެތަނުގައި ލިބުނު ގެއްލުންތަކުގެ ހަގީގީ އަދަދު ދެނެގަތުމަށް ވަނީ އުނދަގޫވެފައެވެ. ޗައިނާގެ ބޮޑުވަޒީރު ލީ ކިއަންގް އެ ސަރަހައްދަށް ޒިޔާރަތްކުރެއްވި ނަމަވެސް، ކާރިސާގެ ހަގީގަތް ސިއްރުކުރުމަކީ ސަރަހައްދީ އެހީތެރިކަމަށް ހުރަސްއެޅޭނެ ކަމެއް ކަމަށް ރިޕޯޓްތައް ބުނެއެވެ.
