އެމެރިކާގެ ރައީސް ޑޮނަލްޑް ޓްރަމްޕާއި ޗައިނާގެ ރައީސް ޝީ ޖިންޕިންގް ވައިޓް ހައުސްގައި ބޭއްވެވި މުހިންމު ސަމިޓަށްފަހު، ދެ ގައުމުގެ ދެމެދުގައި އުފެދިފައިވާ ވިޔަފާރީގެ ހަނގުރާމަ އިތުރު ދެ މަސްދުވަހުގެ މުއްދަތަށް މެދުކަނޑާލުމަށް އެއްބަސްވެއްޖެއެވެ.
ވޮޝިންގްޓަންގައި ބޭއްވި މަތީ ފެންވަރުގެ މި ބައްދަލުވުމަކީ، ޓްރަމްޕް ދެވަނަ ދައުރަކަށް އިންތިޚާބުވެވަޑައިގެންނެވި ފަހުން ޗައިނާގެ ރައީސް ވައިޓް ހައުސްއަށް ކުރެއްވި ފުރަތަމަ ޒިޔާރަތެވެ. މި ސަމިޓުގެ ތެރެއިން ދެ ބޭފުޅުން ވަނީ ދެ ގައުމުގެ ދެމެދުގައި ހުރި ޚިޔާލު ޚިލާފުވުންތަކާއި، ސްޓްރެޓެޖިކް މައިދާނުގައި ހުރި ގޮންޖެހުންތަކާ މެދު ފުޅާ ދާއިރާއެއްގައި މަޝްވަރާ ކުރައްވާފައެވެ.
ދެ ގައުމުގެ ދެމެދުގައި ވެފައިވާ އެއްބަސްވުމުގެ ދަށުން، އަންނަ ނޮވެމްބަރު މަހުގެ ނިޔަލަށް ހަމަވާގޮތަށް އޮތް އިގްތިސާދީ ސުލްހައިގެ މުއްދަތު މިހާރު ވަނީ އަންނަ އަހަރުގެ ޖަނަވަރީ 10 އާ ހަމައަށް އިތުރުކޮށްފައެވެ. މި ނިންމެވުމާ ގުޅޭގޮތުން ވާހަކަފުޅު ދައްކަވަމުން ޗައިނާގެ ރައީސް ޝީ ވިދާޅުވީ، މިއީ މުޅި ދުނިޔޭގެ އިގްތިސާދަށްވެސް ލިބިގެންދިޔަ ވަރަށް އުފާވެރި ޚަބަރެއް ކަމަށެވެ. އަދި ދުނިޔޭގެ އެންމެ ބޮޑު ދެ އިގްތިސާދުގެ ގޮތުގައި ތިބެ، މަސްރަހު ނުތަނަވަސް ނުކޮށް، ސުލްހަވެރިކަމާއެކު ވާދަކުރުމުގެ އާ އުސޫލުތަކެއް ގާއިމުކުރަންޖެހޭ ކަމަށް ފާހަގަކުރެއްވިއެވެ.
ނަމަވެސް، މި ސަމިޓުގައި އެންމެ ބޮޑަށް ބަހުސްކުރެވުނު ބައެއް އާންމު މައްސަލަތަކުގައި އެކަށީގެންވާ ނަތީޖާއެއް ނެރެވިފައެއް ނުވެއެވެ. ޚާއްސަކޮށް އާޓިފިޝަލް އިންޓެލިޖެންސް (އޭއައި) ގެ ވަސީލަތްތައް ކޮންޓްރޯލްކުރުމާއި، ގައުމީ ސަލާމަތަށް ހުރި ނުރައްކާތަކާ މެދު ދެ ގައުމުގެ މެދުގައި އެއްބަސްވުމަކަށް އާދެވިފައެއް ނުވެއެވެ. މީގެއިތުރުން، ތައިވާނުގެ މިނިވަންކަމުގެ މައްސަލައިގައި ޗައިނާގެ ރަތް ރޮނގުތަކެއް ހުރިކަން ހާމަކުރައްވައި، އެމެރިކާއިން އެކަމުގައި ވިސްނުންތެރިކަމާއެކު އަމަލުކުރުމަށް ޝީ ވަނީ ގޮވާލައްވާފައެވެ.
އީރާނާއެކު ހިނގަމުންދާ ހަނގުރާމައާއި ނިއުކްލިއަރ މައްސަލައިގައިވެސް ދެ ރައީސުން ވާހަކަފުޅު ދެއްކެވިއެވެ. ޗައިނާގެ ރައީސް ވަނީ މަޝްވަރާގެ މަގުން އީރާނުގެ ހަނގުރާމަ އަވަސް މުއްދަތެއްގެ ތެރޭގައި ނިންމުމަށާއި، އީރާނަށް ދޭ އުދުވާނީ ހަމަލަތައް ހުއްޓާލައި އިސްލާމްއާބާދު މެމޮރެންޑަމް އޮފް އަންޑަސްޓޭންޑިންގ އަށް އެމެރިކާއިން އަލުން އަމަލުކުރަން ފެށުމަށް ބާރުއަޅުއްވާފައެވެ.
މި ސަމިޓުގައި ދެ ގައުމުން އިގްތިސާދީ ސުލްހައެއް ގާއިމުކުރި ނަމަވެސް، މިއީ ދާއިމީ ހައްލެއް ނޫން ކަމަށާއި، މިއީ ހަމައެކަނި މަޝްވަރާގެ ދޮރުތައް ހުޅުވާފައި ބެހެއްޓުމަށް ވެވުނު ވަގުތީ އެއްބަސްވުމެއް ކަމަށް ފާހަގަކުރެއެވެ. އެމެރިކާގެ ޓްރެޜަރީ ސެކްރެޓަރީ ސްކޮޓް ބެސެންޓް ވިދާޅުވީ، ކުރިއަށް އޮތް ދެ މަސްދުވަހުގެ ތެރޭގައި ޗައިނާއިން ވެފައިވާ އެއްބަސްވުންތަކަށް ފުރިހަމައަށް އަމަލުކުރުމަށް ބާރުއަޅުއްވާނެ ކަމަށެވެ.
