ދިވެހިރާއްޖޭގައި ގަވާއިދާ ހިލާފަށް އުޅެމުންދާ ބިދޭސީންގެ މައްސަލައަށް ކުރިއަށް އޮތް 2027 ވަނަ އަހަރުގެ މެއި މަހުގެ ނިޔަލަށް އެއްކޮށް ހައްލެއް ހޯދައި ނިންމާލެވޭނެ ކަމަށް ދާހިލީ ސަލާމަތާއި ފަންނިއްޔާތާ ބެހޭ ވަޒީރު އަލީ އިހުސާން ވިދާޅުވެއްޖެއެވެ.
ބައެއް ބިދޭސީން ދިވެހިންގެ ނިވަލުގައި ތިބެގެން ގަވާއިދާ ޚިލާފަށް ވިޔަފާރިކުރަމުންދާ މައްސަލައަށް ދާއިމީ ހައްލެއް ހޯދުމަށް ސަރުކާރުން ވަނީ ވަރުގަދަ ފިޔަވަޅުތަކެއް ނިންމާފައެވެ. އެގޮތުން، ބިދޭސީން ރާއްޖެ ގެނައުމަށްފަހު އެމީހުންނާ މެދު އިހުމާލުވާ ފަރާތްތަކާ ދެކޮޅަށް ފިޔަވަޅު އަޅައި، އިހުމާލުވާ ކޮންމެ ބިދޭސީއަކަށް 3،242 އެމެރިކާ ޑޮލަރުގެ ޖޫރިމަނާއެއް އެ ފަރާތްތަކުގެ މައްޗަށް ކަނޑައަޅައި ތަންފީޒުކުރަން ފަށާނެ ކަމަށް ވަޒީރު އަލީ އިހުސާން ވަނީ ވިދާޅުވެފައެވެ.
އާންމުންނަށް މައުލޫމާތު ދިނުމަށް ބޭއްވި 'އަހާ' ފޯރަމުގައި ވާހަކަ ދައްކަވަމުން ވަޒީރު އިހުސާން ވިދާޅުވީ، ދިވެހިރާއްޖެއަށް ކުރިމަތިވެފައިވާ ޒަމާންވީ ބިދޭސީންގެ މައްސަލަ ހައްލުކުރުމަށް މި ސަރުކާރުން ހާއްސަ އިސްކަމެއް ދީގެން ބޮޑެތި މަސައްކަތްތަކެއް ކުރަމުންދާ ކަމަށެވެ. އެގޮތުން 1980 ގެ އަހަރުތަކުން ފެށިގެން 2023 ވަނަ އަހަރާ ހަމައަށް ވޭތުވެދިޔަ ދިގު މުއްދަތުގެ ތެރޭގައި މި މައްސަލައަށް އެކަށީގެންވާ އަދި ދާއިމީ ހައްލެއް ހޯދުމަށް ސަރުކާރުތަކުން ނުކުޅެދިފައިވާކަން ވަޒީރު ފާހަގަކުރެއްވިއެވެ.
"ބިދޭސީ އާބާދީގެ ތެރެއިން ބަޔޯމެޓްރިކް ޑޭޓާ ނުނެގި ހުރި މިންވަރު އެއް އިންސައްތައަށް ތިރިކުރެވިފައިވަނީ މުޅި ދުނިޔެއިންވެސް އެންމެ ތިން ޤައުމެއްގައި. އެއީ ދިވެހިރާއްޖޭގެ އިތުރުން ސިންގަޕޫރާއި ޔުނައިޓެޑް އަރަބް އެމިރޭޓްސް (ޔޫއޭއީ). ސަރުކާރުގެ އެންމެ ބޮޑު އަމާޒަކީ ރާއްޖޭގައި ތިބި ބިދޭސީންގެ 100 އިންސައްތަ ބަޔޯމެޓްރިކް މައުލޫމާތު ފުރިހަމަކޮށް ނިންމުން،" ވަޒީރު ވިދާޅުވިއެވެ.
ރާއްޖޭގައި ތިބި ބިދޭސީންގެ އާބާދީ ބައިނަލްއަޤްވާމީ ގޮތުން ބަލައިގަނެވޭ ވަކި ހަމަތަކަކަށް ގެނައުމުގެ މުހިންމު މަސައްކަތްތަކެއް ކުރިއަށްދާނެ ކަމަށް ވަޒީރު ފާހަގަކުރެއްވިއެވެ. މިގޮތުން، ކުރިއަށް އޮތް މަރުހަލާގައި ގަވާއިދާ އެއްގޮތަށް އުޅޭ ބިދޭސީންނާއި ގަވާއިދާ ޚިލާފަށް އުޅޭ ބިދޭސީން ވަކިކޮށް ދެނެގަނެވޭނެއެވެ. އަދި ރާއްޖެ އެތެރެވުމަށްފަހު ހުއްދަ ދެވިފައިވާ މަސައްކަތް ނޫން އެހެން މަސައްކަތްތައް ކުރަމުންދާ ބިދޭސީން ފާހަގަކޮށް، އެފަދަ ފަރާތްތައް ގާނޫނީ އިމުގެ ތެރެއިން ޑީޕޯޓްކުރާނެ ކަމުގެ އިންޒާރުވެސް ވަޒީރު ދެއްވިއެވެ.
