ފާއިތުވި ވިއްސަކަށް އަހަރު ދުވަހުގެ ތެރޭގައި ޗައިނާއިން ބިނާކޮށްފައިވާ މައުލޫމާތުގެ ވަސީލަތްތަކުގެ ބޭނުން ފުޅާކޮށް، މުޅި މުޖުތަމަޢުގައި މައުލޫމާތު އުފައްދައި ފަތުރާ ގޮތް ސަރުކާރުން ބައްޓަންކުރަން ފަށައިފިއެވެ. ރައީސް ޝީ ޖިންޕިންގގެ ވެރިކަމުގައި ސަރުކާރުން ދަނީ ޚަބަރުތަކާއި، ތާރީޚީ ހާދިސާތަކާއި، އަދި ސަގާފީ ކަންކަން މާނަކުރާނެ ގޮތް ސަރުކާރުގެ ސްޓްރެޓެޖީ އާ އެއްގޮތަށް ބަދަލުކުރަމުންނެވެ.
މި ސިޔާސަތުގެ ދަށުން ދައުލަތުގެ މީޑިއާއާއި، ސަރުކާރުގެ އިދާރާތައް އަދި ޑިޖިޓަލް ޕްލެޓްފޯމްތައް ގުޅިގެން ދަނީ ސަރުކާރުގެ އިމޭޖު ރަނގަޅަށް ދައްކައިދޭ މައުލޫމާތު ކުރިއަރުވައި، ސަރުކާރާ ޚިލާފު ޚިޔާލުތަކަށް ހުރަސް އަޅަމުންނެވެ. މީގެއިތުރުން 2024 ވަނަ އަހަރުގެ ޖަނަވަރީ މަހު އަމަލުކުރަން ފެށި 'ޕޭޓްރިއޮޓިކް އެޑިއުކޭޝަން ލޯ' ގެ ދަށުން އަދަބިއްޔާތާއި، ފިލްމު، މިއުޒިކް އަދި އޮންލައިން މީސް މީޑިއާގެ ވަސީލަތްތައް ބޭނުންކޮށްގެން ޤައުމީ ރޫޙު އާލާކުރުމަށް ޚާއްސަ ސަމާލުކަމެް ދީފައި ވެއެވެ.
މި އުސޫލުތަކާ ޚިލާފުވެގެން ފިޔަވަޅު އެޅުންވެސް އާންމު ކޮށްފައި ވެއެވެ. އެއިން އެކަކީ ކޮމެޑިއަން ގުއޯ ދެގޭންގްއެވެ. ވޫހާންގައި ބޭއްވި ޝޯއެއްގައި އިނގިރޭސިވިލާތާއި ޖަޕާނާ ދެކޮޅަށް ކުރި ހަނގުރާމައިގެ ދުވަސްވަރުގެ ޤައުމީ ލަވައެއްގެ ރާގާއި އިބާރާތްތަކަށް ބަދަލު ގެނެސްގެން ކިޔުމުން، ދައުލަތުގެ އިދާރާތަކުން ވަނީ އެ ހަފްލާ އިންތިޒާމުކުރި ކުންފުނިތައް ޖޫރިމަނާކޮށްފައެވެ.
ސަރުކާރުން ބުނެފައިވަނީ އެއީ ޤައުމީ އަބްތާލުންގެ ހަނދާންތަކަށް ހުރުމާތްތެރިވާން ޖެހޭނ ކަމަށެވެ. މީގެއިތުރުން، 2022 ވަނަ އަހަރުގެ 'ވައިޓް ޕޭޕަރ' މުޒާހަރާތަކުގެ މައްޗަށް މައުލޫމާތު އެއްކޮށް ޑޮކިއުމެންޓްރީއެއް ހެދި ފިލްމު އުފައްދާ ޗެން ޕިންލިންއަށް 2025 ވަނަ އަހަރުގެ ޖަނަވަރީ މަހު ވަނީ ތިން އަހަރާއި ބައިގެ ޖަލު ހުކުމެއް އިއްވާފައެވެ.
ކޮވިޑް-19 ގެ ދުވަސްވަރު ވޫހާންއިން މިނިވަންކަމާއެކު ޚަބަރު ފެތުރި ނޫސްވެރިޔާ ޜަންގް ޜަންއަށް 2025 ވަނަ އަހަރުގެ ސެޕްޓެމްބަރު މަހު ވަނީ އިތުރު ހަތަރު އަހަރުގެ ޖަލު ހުކުމެއް އިއްވާފައެވެ.
ޤުދުރަތީ ކާރިސާތަކުގެ މައުލޫމާތު ފެތުރުމުގައިވެސް ސަމާލުކަން ދިނުމަށް އިރުޝާދުތައް ދީފައި ވެއެވެ.
އެގޮތުން، 2026 ވަނަ އަހަރުގެ އޮގަސްޓް މަހު ޗައިނާއާއި ނޭޕާލް ގުޅޭ ސަރަޙައްދަށް އައި ފެންބޮޑުވުމުގެ ކާރިސާގައި ނޭޕާލް ފަރާތުން މަރުވި މީހުންގެ މައުލޫމާތު އާންމުކޮށް، ނޫސްވެރިންނަށް ފުރުޞަތު ދިން ނަމަވެސް، ޗައިނާގެ ސަރަޙައްދުން ޚަބަރު ފެތުރުން ވަނީ ވަރަށް ބޮޑަށް ގަވާއިދަށް ފައްތާފައެވެ.
ސަރުކާރުގެ "ކްލީން އިންޓަރނެޓް 2026″ ކެމްޕޭނުގެ ދަށުން، އޮންލައިންކޮށް މައުލޫމާތު ހިއްސާކުރުން ވަނީ ގަވާއިދުގެ ތެރެއަށް ފައްތާފައެވެ.
އެމެރިކާ-ޗައިނާ އިޤްތިޞާދީ އަދި ސެކިއުރިޓީ ރިވިއު ކޮމިޝަނުން 2024 ވަނަ އަހަރު ނެރުނު ރިޕޯޓެއްގައިވާ ގޮތުން، ޗައިނާއިން މިހާރު އިސްކަންދެނީ ހަމައެކަނި ސަރުކާރާ ދެކޮޅު މައުލޫމާތު ހުއްޓުވުމަކަށް ނޫނެވެ. އޭގެ ބަދަލުގައި، އާންމުންގެ ޚިޔާލު ސަރުކާރުން ބޭނުންވާ ގޮތަށް ބައްޓަންކުރުމަކީ އަމާޒެކެވެ. މީގެ ނަތީޖާއެއްގެ ގޮތުން، ނޫސްވެރިންނާއި، ލިޔުންތެރިން އަދި އާންމު ރައްޔިތުން ދަނީ ސަރުކާރުގެ ފިޔަވަޅަކުން ރައްކާތެރިވުމަށްޓަކައި އަމިއްލައަށް ޚިޔާލުފާޅުކުރުމާ މެދު ފަރުވާތެރި ވަމުންނެވެ.
