2020 ވަނަ އަހަރު ޗައިނާއިން ފާސްކުރި ޤައުމީ ސަލާމަތުގެ ޤާނޫނަށްފަހު، ހޮންކޮންގުގެ ޒާތީ މިނިވަންކަން ކޮންޓްރޯލު ކުރުމުން އެ ސަރަޙައްދުގެ މާލީ މަރުކަޒުގެ މަޤާމަށް ބޮޑެތި ލޮޅުންތަކެއް އަރަން ފަށައިފިއެވެ.
"ބޭރުގެ ބާރުތަކާއެކު ބައިވެރިވުން" އަދި "ދައުލަތާ ދެކޮޅަށް އުޅުން" ފަދަ ކުށްތަކުގެ ދަށުން، ޤާނޫނު އުފެދުމުގެ ކުރިން ކޮށްފައިވާ ކަންކަމަށްވެސް ފަހުން ޖިނާއީ ދައުވާ އުފުލަމުންދެއެވެ. މީގެ ސަބަބުން، ކުރިން މިނިވަން ހަރަކާތްތަކުގެ މޫނުމަތީގެ ގޮތުގައި ފެނުނު ޖޯޝުއާ ވަންގަށް މިހާރު ވަނީ އުމުރު ދުވަހުގެ ޖަލު ހުކުމަކާ ކުރިމަތިލާންޖެހިފައެވެ.
ޖޯޝުއާ ޗޮންގާއި، ޗޯ ހަންގް-ތުންގް، ލީ ޗެއުކް-ޔަން އަދި އަލްބަޓް ހޯ ފަދަ އިސް އެކްޓިވިސްޓުންގެ މައްޗަށް ކުށް ސާބިތުވާކަމަށް ކަނޑައެޅުމަކީ، ޒާތީ ވެރިކަމުގެ އުސޫލުތައް ހޮންކޮންގުގައި ތަންފީޒުކުރުމަށް ބެއިޖިންގއިން ކުރަމުންދާ މަސައްކަތުގެ ސަރީޙަ ހެއްކެކެވެ.
މި ފިޔަވަޅުތަކުގެ ދަށުން 'އެޕަލް ޑެއިލީ' ފަދަ މިނިވަން ނޫސްތައް ބަންދުކުރަން މަޖުބޫރުވެ، ނޫސްވެރިންގެ މައްޗަށް ދައުވާކޮށް، ޖަމްޢިއްޔާތައް ވަނީ އުވާލާފައެވެ.
މިއާއެކު ހޮންކޮންގަށް ލިބިފައިވި ޚާއްސަ އިމްތިޔާޒުތަކާއި އަމިއްލަ މުސްތަޤިއްލުކަން ދަނީ ހީނަރުވަމުންނެވެ.
ހޮންގކޮންގައި ސިޔާސީ ބާރުވެރިކަން ހޯދުމަށް ސީ.ސީ.ޕީ އިން ކުރާ މަސައްކަތުގެ ސަބަބުން 5 ޓްރިލިއަން ޑޮލަރުގެ އަގުހުރި ހޮންކޮންގުގެ އިޤްތިޞާދަށް ބޮޑެތި ހުރަސްތަކެއް ވަނީ ކުރިމަތިވެފައެވެ.
ޤާނޫނީ ސިޔާދަތާއި މނިވަން ވިޔަފާރީގެ ނިޒާމަށް ބުުރޫއެރުމުން، ބޭރުގެ މަލްޓިނޭޝަނަލް ކުންފުނިތަކާއި ބޭރުގެ އިންވެސްޓަރުން ދަނީ ސިންގަޕޫރާއި ޓޯކިއޯ ފަދަ މަރުކަޒުތަކަށް އެމީހުންގެ ވިޔަފާރިތައް ބަދަލުކުރަމުންނެވެ.
ރިއަލް އެސްޓޭޓްގެ އަގުތައް ވެއްޓި، ޤާބިލު ގިނަ އަދަދެއްގެ ހުނަރުވެރި މަސައްކަތްތެރިން ވަނީ ހޮންކޮންގު ދޫކޮށް ގޮސްފައެވެ.
އެމެރިކާއާއި އިނގިރޭސިވިލާތުން ވަނީ ހޮންކޮންގުގެ ބައެއް މަސްއޫލުވެރިންނަށް ފިޔަވަޅު އަޅައި، އެ ސަރަޙައްދަށް ދީފައިވާ ވިޔަފާރީގެ ޚާއްސަ ހައިސިއްޔަތު އުވާލާފައެވެ. އަދި އިންސާނީ ޙައްޤުތަކާ ބެހޭ ޖަމްޢިއްޔާތަކުން ދަނީ މިއީ 'ސައިނޯ-ބްރިޓިޝް ޖޮއިންޓް ޑެކްލަރޭޝަން' އާ ޚިލާފު ކަމެއްގެ ގޮތުގައި ސިފަކުރަމުންނެވެ.
